LETTRE Du Sieur Louis De Gand Seigneur De Brachey & De Romecour A SON ALTESSE.

JE ſuis forcé pour beaucoup de rai­ſons Divines & Humaines, de rendre en deſpit de l'envie, ce public & ſo­lennel teſmoignage a la verité, de ce que V. A. S. a faict monſtre & preuve d'une grandeur de courage pas moindre que Royalle, en m'honorant de ſon Heroique liberalité, a raiſon de quelques pro­ductions de mon eſprit ſur L'Olive, que ie fis dernierement paroiſtre au jour ſoubs le nom de V. A. S.

Or a n'en mentir pas elles avoient eſtè plus que ſuffiſament recompenſées, tant par le bon, gratieux, & favorable accueil, qu'elles avoient trouvé d'abord aupres de V.A. que par la haute, authentique, & ho­norable approbation, que V.A. m'en avoit donnée maintes fois, non ſeulement immediatement par ſoy meſme en preſence de pluſieurs perſonnes de qualitè; mais auſſy mediatement par Monſeigneur le Preſident Laurence, & par Monſieur Thurloe Se­cretaire des eſtats de V.A.S.

Ce grand honneur diie, m'eſtoit une glorieuſe, & ſuffiſante recompenſe, & un bouclier a l'eſpreuve contre les dards les plus acerez des envieux, des igno­rants, & des langues malignes de mes ennemis, ie voulois dire de ceux de V. A. qui ſans doute euſſent triomphè de moy, de ma reputation, & peut eſtre de ma vie, S'ils euſſent creu que V.A.S. n'eut pas faict eſtat de mon travail.

D'ou vient que pour avoir conſacrée mon Olive a V.A. ie ne me ſuis en aucune façon acquittè des obligations que ie luy avois, mais en ay contractées deux toutes nouvelles, qui ſont comme un ſurcroy aux Precedentes. La premiere eſt L'honneur & les offres advantageus que V.A.S. ma faicts en ſuitte dudict oeuvre. La ſeconde eſt la generoſitè de V. A. en recompenſant ſi liberalement les efforts de celuy, qui neaumoins eſtoient deus a V. A. pour pluſieurs tres juſtes, & tres puiſſantes raiſons.

Et pour ne parler pas de mon inclination na­turelle, qui m'a touſiours portè a aimer & honorer V.A. de puis que i'ay eu le bon heur de ſa cougnoiſ­ſance. I'advoueray franchement & ingenuement a V.A. qu'ayant icy veſcu long temps fort paiſible­ment & fort honorablement ſoubs la Protection & ſauvegarde de V. A. & y ayant apperceues les mer­veilles prodigieuſes que Dieu avoit faictes par V. A. en trois divers Royaumes, en ſi peu de temps, avec une pougnée d'hommes non aguerris, contre des ennemis innombrables, tres forts, tres puiſſants, & pieça duits pour la plus part a ce meſtier, dont le propre eſt de faire des veufves, & des orphelins: I'ay creu dije qu'ayant quelque cougnoiſſance des bonnes lettres, i'eſtois obligé de faire dire a ma plu­me ce que i'avois remarquè d'extraordinaire es hauts faicts d'armes, & rares exploits de V. A.

Dabondant i'euſſe eſtè le plus ingrat de tous les hommes, & tenu pour un de ceux, qui habitent l'endroit de la terre le plus eſloigné de cet aſtre qui faict les jours, ſi apres que V. A. S. par mes pour­ſuittes & inſtances, contre toutes ſortes d'oppoſiti­ons, a recougnu un Prince pour Souverain, lors qu'il eſtoit quaſi abandonnè de tout le monde, & m'a ordonné en qualitè de ſon Plenipotentier des honeurs & des reſpects eſgauls a ceux, qu'on ne rend qu'aux plus ſignalez miniſtres des plus grands Monarques de l'univers. J'euſſe eſtè diie, apres tant & de ſi extraordinaires faveurs indigne de vivre parmy les hommes, ſi ie n'euſſe taſchè ſelon mon pouvoir de me revancher des obligations, que i'ay toutes priſes ſur moy, par la mort du Prince, dont ie repreſentois icy la perſonne.

Je paſſe le reſte ſoubs ſilence, de peur d'eſtre en­nuyeux a V. A. S. eu egard aux affaires de conſequence, qui l'environnent continuellement & ſans relaſche de toutes parts. Et Partant pour mettre fin a la preſente, ie prendray la hardieſſe de baiſer la main liberale de V.A. veu qu'au dire des An­ciens, il n'y a rien en ce bas monde, en quoy un Monarque puiſſe reſembler de plus pres a Dieu, que la liberalitè. C'eſt ce qu'advoue pour l'egard de V.A.S. en ſon endroit celuy, qui eſt avec autant de ve­ritè que de ſincerité,