An den guͤnſtigen / beſonders der Buͤchſenmeiſterey Kunſt liebhabenden Leſer.

WAnn wir / ſonders Guͤnſtiger / vnd Ehrngeliebter Leſer / mit den lautern vnd hellen Augen / deſſen / einem jeden / von dem allein weiſen GOtt verlihnen natuͤrlichen Verſtands / die uͤberauß ſchoͤne / nothwendige / vnd dem menſchlichen Leben allzumahlen nutzliche / vnd erbawliche Kuͤnſten / mit allem fleiß beſichtigen vnnd anſchawen: Deroſelben Principia, Hauptgrund Vrſachen / darauff ſie beſtehen / ſo wol auch Proprieteten vnd Aigenſchafften / ſo ſelbigen angeboren / vnd allezeit nit anderſt / als der ſchoͤne Glantz bey der hellen Sonnen ſich finden laſſen; nit weniger / deren vil vnd mancherley Arten / mit ſolchen der Menſch / als welchem / wie der ſchaͤrpffſinnige vnd weiſe Heyd Ariſtoteles bezeuget / die Begierde alle Ding zu wiſſen vnd zu erforſchen / von Natur eingepflantzet / ſich in ſeinem ſterblichen Leben gleichſam als mit einer ſonderbaren Labſaal er - quicket vnd erfriſchet / allerſeits wol betrachten vnd erwegen: wird vns der gewiſe Augenſchein vnd vn - verneinliche Experienz vnfehlbar zu erkennen geben / daß bey denſelbigen zwey Stuck / ſo da allermaſſen hoch notwendig / vnd ohne welche keine Kunſt / wie ſie auch jmmermehr mag einen Namen haben / einen ſteiffen Fuß ſetzen / vnd beſtaͤndig ſeyn kan / ſich eraignen / nemblich die rechte Theoria, oder waare Praxis. Was die Theoriam betrifft / vnd anlangt / verſtehn wir allhie durch dieſelbige / nit eben eine ſolche Wiſſen - ſchafft vnd Erkantnuß / ſo da in ſich ſelbſten ſich terminiret vnd endet / vnd uͤber das bloſſe Wiſſen / ſo fer - ne ſie in jhrem Circk verbleibet / nit weiter ſchreitet: doch nit alſo vnd dergeſtalt / als ob ſie nit ſolte zu Er - lernung Gottes vnendtlicher Allmacht vnd Weißheit gerichtet ſeyn: Dann freylich diſes aller Wiſſen - ſchafften vornembſter Zweck vnd Zihl iſt: ſondern vff diſe weiſe / daß ſie das jenige / was ſie erkennet / nit ſelbſten mache / ſondern wie es von dem Schoͤpffer aller Dingen / anfangs erſchaffen vnd gemacht / einig vnd allein erforſchet vnd erkundiget / was geſtalt wir die Natur vnd Eigenſchafft deß Himmels / der Sternen / deren gewiſen curſum vnd Lauff / die Natur der Elementen / deß Feurs / Luffts / Waſſers / Er - den / vnd aller andern natuͤrlichen Dingen / erforſchen. Jn welchem Puncten die Theoria von der Pra - xi wird vnderſchieden / maſſen bey den Philoſophis auß diſem Fundament die Philoſophiſche Diſciplinæ in Theoreticas vnd Practicas abgetheilet werden. Wir verſtehn aber allhie eine ſolche Theoriam, wel - che da mit allen Vmbſtaͤnden zeigt vnd weiſet den rechten waaren Grund vnd Fundament deß jenigen / das man in das Werck ſoll richten / nach welcher das gantze Werck / ſoll es anderſt einen Beſtand haben / muß angeſtellt werden. Da es auch in einem oder anderm / an den circumſtantien vnd qualiteten ſich wolte ſtoſſen / daß man wiſſe / mit gutem Grund / den Fehler zu verbeſſern / vnd auß den rechten principiis, der Sachen alſo zu helffen / daß alles vff ſeinen gewiſen Vrſachen vnfehlbarlich beſtehe. Als zum ein - faͤltigen Exempel / wann vier Perſonen zehen Gulden vertheilen wolten / ſo findet ſich / daß zwar jedem zween Gulden gebuͤren / aber es ſtoſſt ſich da / daß noch zween Gulden uͤberbleiben. Nun kan man .2. in .4. die Zahl betreffend / nit theilen / deßwegen ſo muß ich die .2. gantze in ſich ſelbſt auch in gewiſe Theil brechen / vnd in ſolche gebrochene Theil abtheilen / biß daß ſich die herauß kommende Theil den andern vergleichen. Wann nun die .2. gantze / halbirt werden / ſo wird ſich juſt .4. finden / viere aber / in .4. divi - dirt, ſo wird jedem eins zu theil werden / daß alſo jedem. 2½. Gulden gebuͤret / Alſo auch in der Archite - ctonica, wan̄ es der Ort nit leidet / alles in die Vierung zu ſetzen / ſo muß mans mit dem Winckelhacken / vnd nach den Geometriſchen principiis rectificiren / vnd was ab oder zugehet / fein zu erſetzen wiſſen. Anlangend die Praxin, verſtehen wir durch dieſelbige die operation vnd Wuͤrckung ſelbſten / da man nach der rechten waaren Theoria anfangt Hand anzulegen / vnd wie es die theoria gruͤndtlich fuͤr Augen ge - ſtellet / das Werck außfuͤhret vnd vollendet. Diſe zwey Stuck ſeynd mit einander / ſo genaw verknipffet vnd verbunden / daß / etwas rechtſchaffens ins Werck zu richten / keines ohne das ander ſeyn kan. Wann nun diſe beede getrennet werden / ſo kan nichts beſtaͤndiges erfolgen. Wo die Theoria iſt ohn die Praxi, da gibt es allein vil ſubtiliſierens / ſpintiſierens / phantaſierens / ſcrupulierens / difficultirens / glorierens / großſprechens / bey welchem aber eintweder gar kein / oder je gar wenig Nutzen verſpuͤret wird / heiſt nit vnbillich bey ſolchen Theoriſten, was die Lateiner ſagen: Parturiunt montes, prodibit ridiculusmus, die Berge ſtellen ſich / als ob ſie geberen wolten / vnd kompt endtlich nur ein laͤcherliche Mauß herfuͤr. Wir Teutſchen pflegen diß Sprichwort zu gebrauchen / daß wir ſagen: Es iſt vil Geſchrey vnd wenig Woll. Was ſolche Theoriſten außrichten / will ich mit einem auch gar leichten Exempel vor Augen ſtellen. Wan̄ man einen wolte das. a. b. c. lehren / aber ehe man jhme das. a. b. c. vnder Augen legte / zuvor vil von jedem Buchſtaben diſcurrirte / was derſelbige fuͤr ein Form bette / wie er geſtaltet vnd genennet wuͤrde:(a) ijhernachVorrede.hernach wann er nun hiervon vil geſagt hette / legte jhm alsdann allererſt daſſelbige fuͤr / vnd wolte als - bald haben / er ſolte jhme jetzunder die Buchſtaben nach einander her nennen: Wurde nit der Diſcip[u]l ſich beſchweren / vnd ſagen: Weiſet mir vor eigentlich / welches das. a. oder. b. diſer oder jener Buchſtab ſeye / alsdann ſo will ichs auch lernen nennen vnd kennen. Wann ers nun vor Augen hat / ſo ſihet er den Vnterſchied der Buchſtaben wol: daß das. n. nur zween / das .m. aber drey Strich hat / ſo an einander gehenget. Meine Meynung gehet hie aber gar nit dahin / als ob die Theoria zu verwerffen; als ob ich nit dem Diſcipul ſagen ſolte vnd moͤchte: Der Buchſtab / ſo drey Strich hat / heiſt .m. der aber / ſo nur zween hat / heiſt. n. ohne die Praxin nit vil außrichte. Der Diſcipul, wird auß meiner Beſchreibung das. a. b. c. wie ſcharpff vnd genaw dieſelbe auch jmmer ſeyn mag / zu Erlernung deſſelbigen / nit leichtlich kommen / wo nit die Buchſtaben vnder das Geſicht gelegt / vnd jhme wuͤrcklich gezeigt vnd genennet wer - den. Daß alſo die Theoria allein vil zu ſchwach vnd gering iſt. Hingegen / wo man gar zu ſehr auff die Praxin dringet / vnd die Theoriam gantz beyſeit ſetzet / ſo iſt der Sachen auch nit geholffen: man fallt von einem Jrꝛthumb in den andern / es ereiget ſich ein Vngelegenheit uͤber die andere / daß man matt vnd verdroſſen wird / ehe man das Werck recht anfanget / vnd zu keinem Ende gluͤcklich kan gelangen: Man nemme deſſen noch ein Exempel: Man wolte ein Perſon lehren leſen / dergeſtalt daß jhr ein Sententz〈…〉〈…〉 leſen fuͤrgeben wurde / als: GOtt der HErꝛ iſt Allmaͤchtig / der da alles auß nichts erſchaffen / alle din erhaͤlt / vnd kraͤfftiglich regieret / ꝛc. ſagte das erſte Wort heiſt GOtt / das ander: der / das dritte: HErꝛ vnd ſo fortan / weiſet jhm aber kein Buchſtaben / zeigte jhme auch nit / wie die Buchſtaben zuſamen zu[ſe -]tzen / daß auß denſelben Sylben / vnd auß denſelben Woͤrter erwachſen / da wurde in Warheit ein ſolche Perſon in dem Leſen uͤbel fortkommen. Vnd ob er ſchon ſo vil zu wegen braͤchte / daß er ein ſolch Se[nten -]tiolam leſe / ſo were es das / vnd nichts weiters: da hingegen / wann jhme nach der Theoria das. a. b. c. ge - wiſen / vnd er gelehrt wird / wie die Buchſtaben muͤſſen zuſamen geſetzt / vnd auß denſelben Woͤrter ge - macht werden / er leichtlich in aller Materi zu leſen fertig ſeyn wird. Hierauß erſcheinet nun Sonnen - klar / wie diſe zwey Stuck ſtetigs bey einander / vnd keines ohne das ander ſeyn wolle: auch weder dem einen / noch dem andern etwas zu benemmen / oder vor dem andern zu vil zu zumeſſen / ſondern jedes in ge - buͤrender obacht vnd reſpect zu halten ſeye.

Solches / wie ich nun auß eigener Erfahrenheit vil vnd lange Jahr / durch Huͤlff vnd Beyſtand GOttes / als deß Allerweiſeſten Arc〈…〉〈…〉 cti, waar zu ſeyn / augenſcheinlich vnd handgreifflich befunden[/]als habe auß diſem Fundament / auff vilfaͤltiges zuſprechen / vnd Erinnerung anſehnlicher / dapfferer[und]der Sachen wol verſtaͤndigen / hohen vnd niderſtands Perſonen / meiner jederzeit hochgeehrten Herren Fautorn, vnd ſonders wolvertrawten geliebten Freunden / Jch Anno .1627. meine Halonitio-Pyrob[o -]- lian, oder die newe Buͤchſenmeiſterey vffgeſetzt / dieſelbige aber nicht nur auff ein bloſſes gerathwol / ſon - dern auff die rechte / juſte / wahre vnd vnfehlbare real demonſtration vnd Praxin, wie ſolche in dem Werck ſelbſten zu befinden / geſtellet / ſo gar / daß der Kunſtbegirige / einig vnd allein hand anzulegen / vnd vorge - hoͤrter maſſen zu operieren, auch deß erfrewlichen effects zu gewarten / ſolche zuvorderſt / zu GOttes Mayeſtaͤtiſchen Ehren / vnd dann auch weniglichen zu dem beſten / an das offentliche Tagliecht gegeben Welche meine wenige Arbeit / mit ſolchem geneigten Willen / iſt vff: vnd angenommen woꝛden / daß nun mehr faſt alle Exemplaria diſtrahirt, vffgegangen / vnd der Vorrath zum Ende gelauffen / dahero ba[ld]Mangel erſcheinen wird. Wann ſich dann nun abermahlen Hoch: vnd Wolanſehenliche Freund[lie -]bende Herꝛen vnd Fautores, welche diſen vorſtehenden Mangel in Zeiten vermercket / erzaigen / die〈…〉〈…〉 gar freundlich / ſo wol ſchrifft - als muͤndlich zugeſprochen / beruͤrte Halonitro-Pyrobolian noch einmahl vnder die Preſſen zu geben / mich beneben fleiſſig erſucht / die zuvor bey der erſten edition occu〈…〉〈…〉 rierende Italieniſche terminos, wie auch das Gewicht (. welches mir / die Wahrheit zu bekennen / damahlen / vnd zu meiner auß Italia Ankunfft / zu ſchwer gefallen were / die daſelbſten erlernete / vnd gewohnte Woͤrter ne - ben dem Gewicht / gleich alſo in facto, nach Teutſcher Manier vorzubringen. ) der Vncien / in die L〈…〉〈…〉 zu transferiren: Neben dem in diſer anderen edition auch nit zu vnterlaſſen / was ich etwan in wehrend[er]Zeit auch im Teutſchland practiciret habe / gleichfalls damit einzuverleiben vnd zu verbeſſern. Als hab[e]Ehr-wolbeſagten Liebhabern / ich mich nit ſollen noch wollen widerſetzen / ſondern vilmehr zuvorder[n]GOtt zu Ehren / dem gemeinen Weſen zum beſten / vnd dann der Kunſt ſelbſten ruͤhmbliches Auffne〈…〉〈…〉 men / hierein willigen. Dahero habe ich die Muͤhewaltung auf mich genommen / keinen Fleiß noch Vn - koſten geſparet / diſe ernewerte Halonitro-Pyrobolian zum andern mahl / jedoch / wie gemeldt / mit vi[len]mehrern Vmbſtaͤnden / ſo gut mir jmmer muͤglich geweſen / nach rechter Teutſcher Manier / vnd deſſel - ben gewohnlichen Gewicht zu beſchreiben vnd juſt zu calculiren, beneben noch etliche newe Kupfferſtu〈…〉〈…〉 bey zu legen. Ob ich nun wol anfaͤnglich nit gemeynt geweſen / den Titul diſes Wercks zu endern / je - doch aber nach dem ich die Sachen in utramq; partem reifflich erwogen / habe ich mir endtlich diſes Wercklin / daß es ſolte die Buͤchſenmeiſterey-Schul genennet werden / zu geben / belieben laſſen / da〈…〉〈…〉 gleich wie in einer Schulen / man von den Buchſtaben / deroſelben Benennung / vnd Zuſamenſetzung den Anfang muß machen: vnd wie die jenige / ſo die Edle Kunſt der Arithmetic, mit deroſelben ſchoͤnen hohen vnd wichtigen Fragen / ſo manchmahl allerdings vnauffloͤßlich zu ſeyn ſcheinen / begehren zu erler - nen / zuvor in den Zahlen an jhnen ſelbſten / dero Benennung / Zuſamenſetzung mit wenigem / in den vierSpeciebusVorrede.Speciebus wol muͤſſen vnterrichtet werden / ehe daß ſie zur Auffloͤſung ſchwerer Fragen angehalten: Eben alſo wird auch in diſem gegenwertigen Opuiculo, mit den Jungen angehenden Buͤchſenmeiſtern vnd Feurwerckern / ein gleichfoͤrmiger methodus, welcher iſt à fac[il]ioribus ad difficiliora, von dem leich - tern zu dem ſchwerern: à. ſimplicibus ad compoſna, von dem ſchlechten vnd geringen / zu dem jenigen / was auß demſelbigen entſpringet; à notioribus ad igno〈…〉〈…〉 ora, von dem jenigen / was an dem bekandteſten zu dem / was noch vnbekant iſt / daß es auch bekant werde / maſſen der allein weiſe GOtt der Natur ſelb - ſten / wie alle gelehrte vnd der ſachen recht verſtaͤndige einhelliglich bezeugen / ſolchen Weg der Natur ein - gepflantzet vnd gewiſen / gebrauchet: dardurch er nit lang vnd weit vff allerhand Jrr: vnd Nebenweg / ſondern die rechte Landſtraß / die gewiſe prima principia vnd erſten Vrſprung / vnd die vnbewegliche fun - damenten, warauff er ſich in allen Faͤllen gruͤndtlich zu verlaſſen / wie dieſelbe hierinnen gantz vertrew - lich / apert, auffrichtig vnd redlich / ohn einigen Hinderhalt / oder voꝛſetzlichen Anſtoß / zu erlernen / wird ge - fuͤhret. Trage gantz keinen Zweiffel / daß wer diſes Wercklin vom Anfang biß zu End mit Luſt wird leſen / ſtudieren / vnd fleiſſige achtung geben / wie eines auß dem andern gehe / vnd eines dem andern die Hand biete / auch gegebenem Bericht nach mit Eifer wird Hand anlegen vnd practicieren / ſelbiger ein ſolches Probſtuck werde machen / welches er ſich nit zu ſchaͤmen / ſondern fuͤr ſeinen Mann paſſieren mag / als - dann im Werck ſelbſten erfahren / wohin deß Authoris Hertz, wolgemeynte intention zihle. Jch bin zwar gar wol bekandtlich / vnd geſtehe es gar gern / daß vil Anſehnliche / Sinnreiche / wolgeuͤbte vnd erfahrne Meiſter / in diſer dapfferen mannlichen vnd heroiſchen Kunſt zu finden / welche die jhnen von GOtt / als dem obriſten Buͤchſenmeiſter / der / was er hierinn koͤnde / wann er in dem Himmel donnert / vnd ſeinen Donner außlaͤſſet mit Hagel vnd Blitzen / Pſalm. 18. 14. vns gnugſam zu erkennen gibet / verlihene Ga - ben / ich hertzlich goͤnne / ſolche auch in jhnen venerire vnd hoch halte. Was hilfft oder nutzt es aber den Luſtbegirigen / oder vilmehr vnſer liebe Poſteritet, wann einer vil kan / vil erlernet / vnd vil weiß / aber nit geſinnet / ſolche ſeine Kunſt andern mitzutheilen / zu weiſen vnd zu lehren / ſondern ſolche mit ſich zu ver - graben? Jſt das nit eintweder ein groſſe Mißgunſt / daß einer das jenige / was jhme Gott zum beſten ge - geben / ſeinem Nechſten nit gonnet? oder ein Hochmuth / damit / wann niemand ſeine Kunſt erfahre / er allein fuͤr den jenigen gehalten werde / der eine Sach vor andern verſtehe? oder je ein ſchandtlicher Vn - danck / daß man Gottes Ehr / vnd deß Neben Menſchen Hail vnd Wolfarth nit geſinnet zu befoͤrdern / Andere werden durch die erfordende Muͤhe vnd Vnkoſten / ein Sachen in den Truck zu geben / abgehal - ten: Jenes iſt je nit zu loben / zu ſolchem aber / kan man bey diſen Zeiten jmmer gelegenheit haben. Et - liche ſeynd gar Weibiſcher Art / verſtehn zwar ein Sach wol / haben aber das Hertz nu / offentlich in die Welt zu ſchreiben / dahero ſie offt vor der Zeit / auch von den jenigen / ſo etwan in diſer Kunſt gar rudeſ, beneben aber jhre Sachen ſehr pompoſè wiſſen zu ſchmucken / ſich vnder die Banck ſtoſſen laſſen: welche ich hiemit wolmeynend will erinnert haben / daß ſie diſer ſo dapffern Kunſt ſolchen deſpect nit erweiſen / ſondern jhr weiches Gemuͤth von ſich legen vnd vnerſchrocken an das Tagliecht herfuͤr tre〈…〉〈…〉 ten. Wer verſtehet nit / daß bey ſo geſtalten ſachen / vil guts dings vermitten bleibet / vnd weder Gott noch den Men - ſchen darmit wird gedienet?

Jn Erwegung diſes / vnd anders mehrs / ſo will ich das von dem allein guͤtig: vnd Allmaͤchtigen Gott / mir mitgetheilte Pfuͤndlin / vnd ſo gut als ich es empfangen / keines wegs vergraben / noch in die Erde verſcharren? ſondern daſſelbige vorangedeuter maſſen / noch einmahl / neben einer ſehr nutzlichen Verbeſſerung / getrewlich / wolmeynend vnd apert, meinem neben Menſchen zum beſten / auch ohne hier - bey ſuchung einiges Ruhms (. ſintemahlen ich meine Menſchliche Schwachheit vnd Vnvollkommen - heit gar wol erkenne / vnd dahero mich ſelbſten in diſer ſonſten ſo dapffern vnd mannhafften Kunſt / fuͤr den allergeringſten vnd einfaͤltigſten einen / bevorab weil es auch meiner profeſſion nit iſt / will gehalten haben. ) vil weniger eignen Nutzens / hiemit an das offentliche Tagliecht kommen laſſen: nicht zweiflend / alle getrewe Liebhaber / werden es / maſſen dann vor diſem / mit andern mehr meinen operibus allbereit geſchehen / im beſten vermercken / vnd in aller guten benevolenz auffnem̅en / erkennen / vnd mit mir Got - tes Guͤte / Allmacht vnd Weißheit preiſen. Denen jenigen aber / welchen nichts nit / als was auß jhrem ſubtilen vnd ſinnreichen Verſtand geſpunnen / beliebig / will ich gleichwol hiemit freundlich zugeſprochen haben / mit jhrer groſſen Kunſt nit alſo hinder dem Berg zu halten / ſondero jhre villeicht noch beſſere vnd mehr elabortirte Werck / die Sonnen auch beſcheinen zu laſſen. Jch bezeuge hiemit an meinem Ort / daß von jhnen vnd auch von jedem / der etwas guts / auß Chriſtlicher Liebe herfuͤr bringt / ich auch hertz - lich gern etwas / wofern ſie es anderſt mir vnd andern gonnen wollen / erlernen / vnd mit hoͤchſter Danck - ſagung annemmen vnd erkennen will. Beſchließlichen dem wolgeneigten Fautorn, meine wenige Per - ſon zu dero beharꝛlichen Hulden vnd Gunſten / vns ſamentlich aber der Allmacht GOttes treweyferig befehlend. Actum Vlm den Erſten Iunii Anno 1643.

Joſeph Furttenbach.