Martin Opitzen Schaͤfferey von der Nimfen Hercinie.

ES lieget dißeits dem Sudetiſchen gefilde / wel - ches Boͤhaimb von Schleſien trennet / vnter dem anmuti - gen Rieſenberge ein thal / deßen weitſchweiffiger vmbkreiß einem halben zirckel gleichet / vndt mitt vielen hohen warten / ſchoͤnen baͤchen / doͤrffern / maierhoͤfen vndt ſchaͤffereyen erfuͤllet iſt. Du koͤndteſt es einen wohnplatz aller frewden / eine froͤliche einſamkeit / ein luſthauß der Nimfen vndt Feldtgoͤtter / ein meiſterſtuͤcke der Natur nennen. Daſelbſt befandt ich mich / nach dem ich die zeit zue vertreiben / vndt meinen gedancken deſto freyer nach zue hen - gen / vor zweyen tagen von einem andern orte / welcher eben mitt dieſem gebirge graͤntzet / vndt des außgeſtandenen vbels wegen bey jtzo ſchwebenden jaͤmmerlichen kriegen / nicht vnbekandt iſt / entwiechen war.

Mitt einem worte: Es war zue ende des Weinmonats / als die hir - ten im felde ein fewer zue machen / vndt der ackersmann / welcher nun vber winter außgeſeet / ſeinen rock herfuͤr zue ſuchen begundte. Ich war vorige nacht auß muͤdigkeit beydes von ſorgen vndt dem wege ſo harte entſchlaffen / daß ich nicht erwachte / biß die muter der geſtirne die Nacht verruckt war / vndt die ſchoͤne Morgenroͤthe anfieng ſich vndt zuegleich alles mitt jhr zue zeigen.

Vndt kanſt du dennoch / fieng ich wieder mich ſelbſt an / der -maßen8maßen auff guetes vertrawen ruhen / nach dem du zu gehorſamben dem jenigen / dem du freylich das beſte theil deiner wolfarth zue - dancken haſt / der dich ſingen leßt was du wilt / von derſelbten ge - wiechen biſt / ohn welche dich keine froͤligkeit ergetzte / vndt mitt welcher dich kein vnfall betruͤbete? Oder / ſchlaͤffeſt du darumb / da - mit ſie dir / weil du jhrer gegenwart nicht genießen kanſt / zum min - ſten durch die wolthaten eines trawmes koͤnne gezeiget werden? Vnter dieſer rede ſprang ich auff / vnd gruͤßete die lieblichen ſtra - len der Sonnen / welche von den ſpitzen der berge herab blincketen / vndt mich gleichſam zue troͤſten ſchienen; woruͤber ich dann in mei - nung mir ſelber ein hertze zue machen / auff dieſe worte gerhiete:

Aber / ſagte ich weiter / was beſchuldige ich mein Verhengniß? fliehe ich nicht auß eigener wahl fuͤr jhr / vndt fuͤr mir ſelbſt? Wo - ferren du mir meine augen / ſo durch die deinigen geraubet ſindt / wiedergiebeſt / verhoffe ich / mein Liecht / dich zue ſehen / ehe noch das auge der welt die Sonne in das herzueruͤckende jhar ſe -hen wirdt.9hen wirdt. Was fuͤr ein Verhengniß aber wil ich kurtz hernach an - klagen? was fuͤr eine huͤlle werde ich finden / zue bedeckung deßen verbrechens / daß ich mein Vaterlandt mitt ſo weit entlegenen Provinzen vertauſchen / die meinigen ſampt dem groͤßeren theile meines hertzens hinter laßen / vndt mich in ein freywilliges elendt verjagen wil? Es iſt eine boͤſe gewohnheit / das wir menſchen ge - meiniglich auff das gluͤck ſchelten / welches wir vns doch auff dem eigenen amboß vnſerer boßheit geſchmiedet haben: oder wollen die zeitfuͤr gerichte laden / die / wann ſie ie was boͤſes begehen kan / nichts aͤrgers thut / alß daß ſie ſich vns ſo reichlich vndt milte ver - leihet. Armer ſchaͤffer! Wilt du lieben / warumb bleibſt du nicht wo du wirſt geliebet? Oder gedenckeſt du der liebe zue entfliehen / ſo entfleuch erſtlich deiner eigenen perſon / vndt laß das gemuͤte zue lieben daheimbe; wo du anders nicht einen krancken mitt dir fuͤh - ren / vndt ſeine ſiecheit durch die bewegung mehr erwecken wilt. Soll dir ie die freyheit / welche dir von kindtheit an gefallen / zue theile werden / ſo ſey nicht allein anderswo / ſondern auch anders / vndt ſegele mitt gebundenen augen vndt verſtopfften ohren zue der gedult dem hafen des kummers / welche dich ſampt jhrer muter der zeit in gewuͤndtſchte ſicherheit ſetzen kan.

Mitt ſolchen vndt dergleichen gedancken ſchlug ich mich eine lange weile / biß ich in dem hin vndt wieder gehen nahe bey einem klaren quelle / das mitt anmutigem rauſchen vndt murmeln von einer klippen herab fiel / zue einer glatten vndt hohen tannen kam / die mir dann bequem zue ſein ſchiene / ein gedaͤchtnuͤß meiner ſor - gen zue verwahren. Schnitte ich alſo auff jhre rinde nachfol - gendts

Ich ſchnitzte noch uͤber dem letzten worte / als mir ein lieblich - es gethoͤne vnterſchiedener querpfeiffen vndt wolklingender muſic zue ohren kam. Wiewol ich mich nun beſorgete / daß durch ſolche ankunfft anderer mir meine einſamkeit / bey der ich mir jetziger be - ſchaffenheit nach nicht ließ uͤbel ſein / moͤchte abgeſtrickt werden: ſo zwang mich doch die begiehr die jenigen zue erkennen / welche der ſchoͤnen einſtimmung wegen entweder der Muſen ſoͤhne / oder auch die Muſen ſelbſt zue ſein ſchienen / daß ich jhrer / weil ſie ſon - derlich gerichts auff mich zue giengen / erwartete. Wie ein ploͤtz - liehes vndt großes liecht die augen fuͤr ſeinem ſchimmern nicht ſe - hen leßt / alſo blendete vndt verwirrete mir die vnverhoffte doch ge - wuͤndtſchte gegenwart der berhuͤmbten hirten / vndt meiner vor dieſem liebſten mitgeſellen / Nuͤßlers / Buchners vndt Venators / hertze vndt ſinnen. Seidt jhr es / ſagte ich; oder muß auch ewer ſchaten mein faſterliegendes gemuͤte auff zue richten an dieſen ort kommen / dahin ich nicht allein von allen menſchen / ſondernauch11auch von allen geſchaͤfften entwiechen bin? Ja / wir ſindt es / hub Venator an / vndt ich fůr meine perſon / habe endtlich zue wercke gerichtet / was ich dir laͤngſt gedrewet; auch vnſerem Buchner / wie - wol er kuͤmmerlich einen gefunden / dem er ſeine herde indeßen ver - trawen koͤnnen / dennoch anlaß gegeben / dich vndt deinen Nuͤßler / der ſich dir zue gefallen auch mitt vns hieherwerts erhaben hatt heim zue ſuchen.

Hieruͤber empfingen wir einander ſaͤmptlich. Vndt du Bru - der / fieng ich wieder Buchnern an / biſt mir ein angenemer gaſt in dieſen orten. Ich zweiffele nicht / ſagte er; aber du mir ein fluͤchti - ger wirth. Jetzt habe ich erfahren / daß der jenige niergendt ſey / der allenthalben iſt. Es hatt ſeinen ort / ſagte Nuͤßler / daß du dem / der es ſo gnaͤdig mitt dir meinet / folge zue leiſten / von den gruͤnen wie - ſen vndt fruchtbaren feldern vnſerer Hauptſtadt dahin gewiechen biſt / wo wir dich ehegeſtern geſucht / vndt von dannen wir der trifft nach hieherwerts gegangen ſindt. Welche notwendigkeit aber le - get dir auff / die zeit dermaßen abſonderlich zue verſchließen / vndt in ſolcher einſamkeit herumb zue wandern? Du weißeſt wol / gab ich zur antwort / daß ein menſch der gedancken hatt / niemals we - niger allein iſt / als wann er allein iſt. Vnd was ſindt es fuͤr gedan - cken? ſprach Venator: ſolten ſie wol an jener tannen ſtehen? (dann ſie hatten mir von ferren zuegeſehen.) Wie gern ich ſie auff was anders leiten wollen / traten ſie dennoch hinan / vndt laſen. Zwey wiederwertige dinge / ſagte eben er Venator; lieben / vndt reiſen. Ich habe freylich gehoͤret / daß du deinem Vaterlande auff etzliche monat guete nacht geben / vndt in dem koͤnigreiche darauß ich new - lich abgereiſet bin / die ziehr der ſtaͤdte / die ſchule der leutſeligkeit / die muter der gueten ſitten auff der inſel der Seyne begruͤßen wilt. Es wirdt dich aber der ſtrenge dienſt / in dem du dich befindeſt /B ijnicht12nicht weit kommen laßen. Der jenige gab ich zur antwort / dem ich getre wlich auff zue warten verbunden bin / iſt ſo gar mitt mir zue frieden / daß er mir nicht allein dieſen ſpatzierweg zue erlauben / ſon - dern auch allen gnaͤdigen vorſchub zu thun auß gewoͤhnlicher leut - ſeligkeit vndt liebe gegen mir verheißen hatt. Hieran iſt kein zweif - fel / ſagte er; wann ich aber dem bawme gegenuͤber glauben ſoll / ſo ſteckeſt du in einer ſolchen dienſtbarkeit / welche dir dem beduͤncken nach ſo angenem iſt / daß du jhr deine freyheit / wie hoch du ſie / vndt billich von jugendt an gehalten haſt / willig auffopfferſt. Ich lachte / vndt Die warheit zue bekennen / gab ich zur antwort / du koͤmpſt faſt auff die meinung meines nechſten liedes. Ey laß es vns doch auch hoͤren / ſprach er; gefelt vns der innhalt nicht / ſo ergetzen vns doch die worte. Vieleicht auch dieſe ſchwerlich / ſagte ich; dann ſie nicht wenig von der einfalt an ſich haben / welche ſie loben. So iſt es auch jetzundt nicht zeit zue ſingen / weil vns Gott vndt das ge - neigte Glůck erſt zueſammen fůgen. Doch dein weiteres guetach - ten herauß zue locken / ſoll mich die muͤhe nicht rewen. Sang ich derowegen / ſo guet ich es gelernet / folgender maßen:

Der liebe dienſtbar ſein / hub Venator an / heißet die liebe zum herren haben: dann welcher dienet / muß einen herren haben dem er dienet. Iſt jhm nicht alſo? Ja ſagte ich. Ein herr redte er weiter / iſt der jenige / der das was er wil / oder nicht wil / zue thun oder zue laßen macht hatt. Wirdt dich nun die liebe zue halten begehren / die mehr einem tyrannen als einem herren aͤhnlich ſiehet / weil ſie nicht allein den leib / ſondern auch das freye theil des menſchen das gemuͤte zum ſclaven macht / ſo ſchawe du / wie es vmb deinen vor - ſatz ſtehen wirdt. Gehe aber in dich / vndt bedencke / ob du mehr vr - ſache haſt / dieſem vnbarmhertzigen herren zue dienen; oder mehr vermoͤgen / jhn ſelbſt dienſtbar zue machen. Wann die liebe der - gleichen beſchaffenheit an ſich hette / wie wir vns einbilden / vndt nicht vnter jhrem ſcheinbaren glantze ein greifflicher betrug ſteckte /B iijſo koͤn -14ſo koͤndten wir ſie fuͤr einen regenten paßiren laßen; angeſehen / daß ſie uͤber alle furcht vndt notwendigkeit ſitzen / vndt jhre frey - heit vnbeleidigt wißen wil. Sie verwundert ſich uͤber kein reich - thumb / ſie fuͤrchtet keinen koͤnig / ſchewet kein gerichte / vndt pfle - get keinen todt zue fliehen. Sie leßt ſich durch kein fewer / kein waß - ſer / keinen degen / kein thier noch menſchen / keine hoffnung des gluͤckes / noch verluſt der wolfarth von jhrem vorſatze bringen. Was andere meiden das verachtet ſie; vndt was andern ſchwer fuͤrkompt / das macht ſie jhr leichte. Sie ſchwimmet durch die teuf - fe der fluͤße / ſe gelt im vngewitter / vndt klettert uͤber alle berge. Sie hatt alles in jhrer gewalt / vndt macht jhr alle gewalt vnterwuͤrf - fig. Ein herrliches weſen / wann diß alles auß einem muthe der tu - gendt / vndt nicht auß verwegenheit / offtmals auch auß verzweiffe - lung / herrhuͤrete; wann jhre endturſache mitt den vmbſtaͤnden uͤ - berein ſtimmete / ja wann ſie nicht eben die jenige were / daruͤber ſo viel hirtengetichte ſchreyen / welche auff allen ſchawplaͤtzen gezei - get / vndt in allen fabeln verklaget wirdt; voll wuͤtens / voll vnge - dult / voll weinens vndt jammers iſt. Worzue wirdt ſie dann dar - zue verurſacht? Durch die ſchoͤnheit; wirft du ſagen. Wo[l]es iſt natuͤrlich / daß ein menſch ſich an natuͤrlichen ſachen erluſtige Ich zweiffele aber ſehr / ob es mitt einer ſolchen ſchoͤnheit / die von denen welche mitt der rechten Schoͤnheit vnbekandt ſindt dermaßen geprieſen wirdt / nicht eben bewandt ſey wie mitt den Egyptiſchen tempeln vorzeiten; die zwar an ſich ſelber koſt - bar vndt praͤchtig erbawt geweſen: hetteſt du aber einen gott da - rinnen geſucht / ſo wuͤrdeſt du an ſiat ſeiner etwan einen bock / einen affen / oder eine katze gefunden haben. Wilt du ſehen was ſchoͤn - heit iſt / ſo mußt du die augen der vernunfft zue rhate nemen / vndt jhr die vnbaͤndige begiehr der liebe / wie das pferdt dem zaume / den bogen dem ſchuͤtzen / das ſchiff dem ſtewerruder / das werckzeug end -15 lich dem meiſter vnterwuͤrffig machen. Dann wie die vernunfft ohn die liebe vnvollkommen iſt alſo iſt die liebe faſt vnbeſonnen / wann ſie der vernunfft nicht gehorchet. Dieſer gehorſa[me]man iſt nichts anders als der vernunfft vndt liebe vermaͤhlung / die kue - gleich vndt mitteinander hitzig vnd in einem rennen auff die ſchoͤn - heit zue eilen. Welcher nun dieſelbte in dem leibe / in den vmb - ſchweiffenden augen / gebleichten haaren / gemahlten wangen / vndt was dem anhengig iſt / ſuchen wil / der findet eußerlich eine ſchnoͤde vergengligkeit / ein zerbrechliches guet / einen ſtuͤndtlichen raub / einen piltz der zuegleich leuchtet vndt vergehet; inwendig a - ber offtmals wanckelmuth / betrug / vndt wie etwan vnſere Poͤeten am beſten hiervon zue reden wißen. Von denen ich gleichwol ei - nen / doßen name aber nicht verhanden iſt / kaum loben kan / der ein wenig zue ſehr vber die ſchnur haͤwet / vnd gar ſagen darff:

Andere ſprechen:

welche worte ich ſie dann verfechten laße. Wiewol auch eine ſtol - tze abgefuͤhrte Dame / (dann alſo nennen ſievnſere auffwarter) die niergendt ſchoͤner iſt als in jhrem eigenen ſpiegel / offtmals mit gleicher muͤntze bezahlt wirdt / als in welcher kundtſchafft ſich ein - heimbiſche vndt frembde zue ſpielen pflegen / nicht liebe zue ſuchen / welche bey einem vnbeſtendigen weibe nur uͤbel angeleget iſt / ſon - dern ſich mitt jhrem anmutigen geſpreche vndt buhleriſchen ſitten zue erlůſtigen. Dieſe aber wie klug ſie auch iſt / mercket doch nicht /daß jhr16daß jhr ſolche hoͤffligkeit mehr der ergetzung / als liebe wegen er - zeigt werde. Darumb wie ſie durch jhr taͤgliches auffnemen vndt taͤgliches verſtoßen andere ſchertzet / alſo wirdt ſie von andern wie - der geſchertzt. Ein mal iſt es gewiß / daß eine ſolche liebe gemeinig - lich eine arbeit des muͤßigganges / eine hoffnung der vnbedachtſam - keit / vndt darumb eine beherrſcherinn eines knechtiſchen hertzens iſt / weil dieſe fluͤchtige ſchoͤnheit mehrmals mitt ſo vielem auffwar - ten / flehen / weinen vndt fußfallen / dergleichen zue thun ein edeles gemuͤte in reiffes bedencken nimpt / wil bedienet werden. Soll a - ber je die liebe recht antreffen / ſo muß ſie die vernunfft zum gefehr - ten haben / muß den eußerlichen ſinnen / ſonderlich aber den augen / welche als zwey vnachtſame thuͤrhuͤter zum offtern allerhandt fal - ſche meinungen zue dem gemuͤte einlaßen / den muth brechen / vndt durch vrtheil vndt verſtandt von der außwendigen ſchoͤnheit zue der inwendigen / welche durch dieſe angenemer gemacht wirdt / dringen koͤnnen. Wie die blumen ſo an ſich ſelber ſchoͤne ſindt / dennoch anmutiger zue ſein ſcheinen / wann ſie vnter einem klaren waßer herfuͤr leuchten: alſo iſt die bluͤte des gemuͤtes / wann ſie mitt einem ſchoͤnen leibe vmbhuͤllet iſt. So ſoll nun die ſchoͤnheit des leibes nichts anders ſein als ein fůrfechter der bluͤte der tugendt / vndt als ein heroldt einer groͤßeren ſchoͤnheit weder ſie nicht iſt: als wie der glantz / welcher ſich dieſen morgen von hieſigem gefilde blicken ließ / ein vorbote der guͤldenen Sonnen war. Wie ferner Pythagoras die Sonne fuͤr einen gott / Anaxagoras fuͤr einen ſtein anſahe; alſo wirdt die ſchoͤnheit anders von den begierden / anders von der vernunfft angeſehen / welche auch von dieſer jnner - lichen ſchoͤnheit allgemach zue der jenigen ſteigen lernet / die dem was allenthalben iſt ſeine ſchoͤnheit verliehen hatt. Alß dann wie - derfehret vns wie etwan menſchen / welche jhre gantze lebenszeit ineiner17einer finſteren hoͤlen zuegebracht / vndt an ſtat des liechtes nur ei - nen ſchatten der coͤrper vndt dinge die bey vns auff erden ſindt er - kieſet / dieſelbten auch fuͤr die rechten vndt warhafftigen gehalten haben. Dann wie es vermuthlich iſt / wann ſie auß dem tunckelen an das klare lietht kommen ſolten / daß ſie nicht allein alles was ſie zuevor geſehen / ſondern auch ſich ſelbſt als betrogene leute verach - ten wuͤrden: alſo auch vnſere gemůter / wann ſie der vergenglichen ſchoͤnheit entronnen / vndt durch die ſchoͤnheit der tugendt einen weg zue der goͤttlichen gefunden haben / ſo fangen ſie jhren eitelen wahn vndt vorige thorheit von hertzen an zue verdammen. Wie nun ein menſch in einem bilde die kunſt / vndt nicht das bildt / in ei - ner pflantze die frucht / vndt nicht die pflantze / liebet: alſo mußen wir in einem ſchoͤnen frawenzimmer nicht die geſtalt / ſondern / wo ſie verhanden iſt / die ſchoͤnheit des gemuͤtes / vndt in dem gemuͤte die ſchoͤnheit deßen von dem ſie hergerhuͤret / erheben vndt hoch - halten. Vndt hergegen / wie wir den vrſprung aller ſchoͤnheit uͤber alles zue ehren ſchuldig ſindt / alſo ſollen wir ſeinenthalben auch die ſchoͤnheit des gemuͤtes / vndt dieſer wegen die ſchoͤnheit des leibes lieben; weil ſie ſich nicht weniger zueweilen darinnen blicken leßt / als die edelſten fluͤße / die wann ſie ſich in das meer außgießen / den vorigen ſuͤßen geſchmack vndt lautere farbe in dem geſaltzenen waßer dennoch nicht baldt verlieren. Das uͤbrige / was von eite - len gedancken geſucht wirdt / iſt nicht eine liebe / ſondern eine begier: dann die liebe ſiehet auff die ſchoͤnheit / die begier auff die wolluſt / welche wann ſie herr / vndt die vernunfft knecht iſt / ſo mußt du jhr folgen / ſie befehle was ſie wolle. Kanſt du aber der wolluſt ie nicht entberen / ſo wiße daß keine groͤßere als ein befiendiges gemuͤte iſt / das mitt einem gueten gewißen begleitet wirdt. Daßelbige leßt ſich keine liebe / keine falſche luſt / keine betruͤbende froͤligkeit / keineCfurchte18furchte noch hoffnung vonſeinem ehrlichen vorſatze dringen. Was wilt du doch der jenigen dienen / welther du zue gebieten haſt? welche du mitt dem zaume der vernunfft anhalten / mitt der ſchaͤrffe einer freyen entſchließung als eine leibeigene magdt von dir verſtoßen kanſt? Die frucht der ſchoͤnheit / die im gemuͤte beſtehet / die nicht zuegleich mitt den zaͤhnen wurmſtichig / mitt den haaren greiß / mitt der ſtirnen geruntzelt / mitt den wangen bleich / mitt den augen trieffendt vndt tunckel wirdt / die mitt der zeit gewalt nichts zue thun hatt / dieſelbte wirdt dich uͤber landt vnd ſee / durch waßer vndt waffen / in gluͤck vndt wiederwertigkeit begleiten. Iſt dir aber vn - moͤglich der jenigen liebe zue hinterlaßen / die vieleicht in deinen augen ſchoͤner iſt / als in anderer leute / vndt die wir drey auch nur nicht zue kennen begehren; ſo kanſt du bey glauben ſicherer hier bleiben; dann eine ſolche luſt wird nur uͤbel ſein fort zue bringen.

Eine ſtattliche rede / mein Bruder / ſagte ich / vndt die leicht - lich zue erkennen giebt / in was fůr einer ſchulen / bey was du fuͤr ei - nem manne (der allein exempels genung iſt / daß ein weißer mann dem gluͤcke die wage halten / vndt dem vngeſtirne der zeiten gebieten kan) an den trechtigen feldern des Reines / wo die Elle vndt Breuſche von jhm verſchluckt werden / vorwiechener zeit ge - lebet haſt deiner eigenen geſchickligkeit / welcher Apollo vndt der himmel nichts verſaget / zue geſchweigen es leßt ſich aber derglei - chen viel behertzter reden / als in das werck richten. Doch verhoffe ich eine ſolche maͤßigkeit in der liebe zue treffen / daß ſie mich an meinem fuͤrhaben dennoch nicht verhindern ſoll. Wer ſeinem la - ſter / gab Venator zur antwort / eine maße ſucht / iſt eben als wolle er glauben / einer der ſich von jenem gaͤhen felſen ſtůrtzete / koͤnne ſich wann es jhm geliebte im herab fallen beſinnen vndt wieder - halten. Dann wie diß zue thun vnmoͤglich; alſo kan ein verwirrtesvndt19vndt erhitztes gemuͤte ſich weder hinterziehen / noch an dem orte wo es wil verbleiben. Es weiß auch derjenige / welcher allbereit lie - bet / ſo wenig mitt was maße er heben ſoll; als wenig einer / dem man die augen außgeßochen hatt / weiß wo er hin ſoll gehen.

Ich muß jhn gleichwol nicht gar huͤlffloß laßen / fieng Nuͤß - ler an / vndt bilde mir gaͤntzlich ein / daß er jhm auff der Poeten art / welche / der Natur nichts nach zue geben / offtmals ſachen erden - cken / die nie geweſen ſindt / noch ſein werden / eine liebe mache / die er nie in denn ſinn gebracht / vndt zum theile anderer leute buhl - ſchafften / eitelkeiten vndt můßige vnrhue durch ſeine ertichtete fuͤr - bilden / zum theile die einſamkeit / darinnener ſich dieſer zeit befin - det / lieber mitt dieſem / als mitt nichts thun erleichtern wolle. Steckt aber auch etwas von dem anmutigen uͤbel bey jhm / das vnſeren ſtandes leuten nicht vngemein iſt / ſo ſchaͤtze ich jhn freilich weniger gluͤckſelig als die jenige / welcher er mitt ſeiner Poeterey ein vnſterbliches lob vndt geruͤchte vervrſachen wirdt; wiewol das Frawenzimmer dergleichen offtmals entweder nicht verſiehet / o - der vnſere getichte lieber als vns hatt. Ich hoffe aber gaͤntzlich / das reiſen / darzue mir bißher niemals der wille / ſondern das gluͤck vndt die vmbſtaͤnde meiner gantzen wolfahrt gemangelt haben / werde jhm in kůrtzen was anders an die handt geben.

Vndt ob ich wol / liebſter mittgeſelle / ſagte er zue mir / deine abweſenheit kaum mitt gedultigem hertzen werde ertragen koͤn - nen / ſo finde ich doch nicht / wann ich meine ergetzligkeit deinem fromen nachſetzen wil / was ich dir aller beſchaffenheit nach beß - ſers rhaten / oder auch wuͤndtſchen ſolle. Wie ein waßer das nie - mals gereget wirdt / endtlich anfengt zue faulen vndt ſtincken: alſo werden auch vnſere gemuͤter durch vbermaͤßige rhue traͤge vndt verdroßen gemacht; welche weil ſie etwas himmliſches ſindt / ſoC ijſollen20ſollen ſie auch billich dem himmel / der ohn vnterlaß in bewegung iſt / nachfolgen. Vndt wann du dieſen großen menſchen die welt anſieheſt / was leßt darinnen vngereiſet? Die Sonne vmbwan - dert den erdenkreiß alle tage: der Monde / vndt der gantze poͤfel des geſtirnes / haben jhre wanderſchafft / troͤſten durch jhr liebliches an - blicken die vmbſchweiffenden / vndt zeigen den jrrenden haͤuſern den ſchiffen wo ſie hin ſollen. Haſt du nie geſehen / wie die ſee von jhrem vfer zue rechter zeit hinweg geflohen / vndt auff gewiße ſtun - de allzeit iſt zueruͤck gekehret? Die vierfuͤßigen thiere lauffen von einer wildtniß in die andere; die fiſche ſteigen auß der ſee in die flůße; die voͤgel / welche jetzundt hauffen weiſe in jhr winterquartir geflogen ſindt / werden mitt dem anbrechenden fruͤlinge wieder hie - her vndt zue felde kommen. Ja die gantze Natur giebt vns anlaß zum reiſen / vndt wil vns gleichſam zeigen / daß wir auff ein vater - landt gedencken ſollen / welches nicht krieget noch bekrieget wirdt / vndt die ſtete herbrige aller fromen wandersleute iſt. Zwar wir pfle gen von Natur das jenige landt zue lieben / deßen athem wir erſt - lich geſchoͤpfft / das wir zum erſten getreten / dem wir vnſere kindt - heit vndt aufferziehung zue dancken haben / vndt darinnen vns lufft / waßer / flůße / aͤcker vndt alle gelegenheit am beſten bekandt ſindt wir reiſen aber darumb / daß wir jhm nach vnſerer zueruͤck - kunfft / vndt erlernung frembder voͤlcker ſprachen vndt ſitten / deſto rhuͤmlicher ſein moͤgen / vndt mitt dem was wir auff gemerckt zue ſtaten kommen. Dann mitt dieſem bedinge / mein Bruder / wirſt du hinweg gelaßen / daß du / wann der außgang dem vorſatze uͤber - ein ſtimmet / vns deiner uͤber die zeit nicht entberen laßeſt. Ander - werts den fuß ein zue ſetzen / verurſacht ein ſtetes verlangen nach den ſeinigen / vndt gemeiniglich einen neidt bey denen / wohin wir vnſeren zueſtandt gepflantzt haben. Wiewol auch nicht ohn vrſach:dann21Dann durch befoͤderung frembder bleiben die einheimiſchen da - hinden ſtehen; vndt wann ſolches nicht maͤßig geſchiehet / muß endtlich mißvertrawen / vnrhue / auch wol gar verenderung des allgemeinen weſens darauß erwachſen: welches die alten Roͤmer wol wußten / vndt heutiges tages die klugen fiſcher in der Adria - tiſchen ſee zimlich in acht nemen. Zur Peſtzeit / wann die todten - graͤber in ein hauß gehen / ſo kan man leicht gedencken / daß je - mandt darinnen geſtorben ſey: alſo zeiget die einnemung der auß - laͤnder (welches aber allein von der uͤberhaͤufften menge zue ver - ſtehen iſt) daß nur der gemeine nutz in letzten zuͤgen liegt.

Von dir wil ich mir nicht einbilden / daß du dich eines vndt anderes truͤbes woͤlcklein vnſers Vaterlandes vertreiben laßeſt; dann du ja auß der aſchen in das fewer / vndt an die jenigen orte gedenckeſt / wohin das freßende wuͤten der waffen / vndt die rache der geſuchten beleidigung / ſich auß hieſigen winckeln erſt recht zue wenden / vndt alles auff eine merckliche verenderung angeſehen zue ſein ſcheinet. Ich mache mir viel mehr rechnung / daß die lie - be der deinigen / vndt die rhue welche dir bißher ſo gnaͤdig iſt ver - liehen worden / deinen fuß offtermals zueruͤcke ziehen / vndt dei - ner entſchließung dieſes vndt jenes in den weg wollen werffen. Wie nun freylich ein freundt ein lebendiger ſchatz iſt / der lange ge - ſucht / kaum gefunden / vndt ſchwerlich verwahret wirdt: ſo iſt doch die vngefaͤrbte liebe an keinen ort gebunden / vndt jhre ab - weſenheit wirdt zum theil durch das gedaͤchtniß voriger geſell - ſchafft / zum theil durch ſchreiben / welches die rechten fußſtapffen vndt kennezeichen trewer gemuͤter ſindt / nicht wenig ertraͤglicher gemacht. So weiß ich auch nicht / wie gar zue ſiete gemeinſchafft vns gemeiniglich zart / vndt auch deßen uͤberdruͤßig macht / wasC iijim22im leben das beſte iſt. Zue geſchweigen / was du auch an jenem orte entweder allbereit fuͤr groſſe berhuͤmbte leute zu freunden haſt / oder doch bekommen wirſt: welche nur zue ſehen ich fuͤr ein theil meiner gluͤckſeligkeit ſchaͤtzen wolte. Iſt ferner etwas dergleichen / weßen dich Venator beſchuldiget / vndt liebeſt der ſchoͤnheit we - gen / ſo wirdt auch ſolches verlangen eher verſchwinden als du jetzt vermeinen magſt. Eines fuchsſchwaͤntzers freundtſchafft beſteht nicht lange / weil die heucheley vndt anmaßung der falſchen war - heit durch die zeit verzehret wirdt: wer nun der ſchoͤnheit oder ziehr wegen liebet / der giebet nur einen ſchmarotzer bey dem welchen er liebet / vndt ſindt alſo ſeine guete worte auff kein ewiges angeſe - hen. So mußt du auch wißen / ob du wieder geliebet wirſt / oder nicht: dann ich wil nicht hoffen / daß du auß der jenigen zahl ſey - eſt / welche ſich ſelbſt einer gegenliebe bereden wo ſie nirgendt iſt / vndt wie jener ſindt / der jhm in ſeiner froͤlichen bloͤdigkeit einbil - dete / alle ſchiffe die auß Indien ſegelten weren ſeine; gieng an den port / frewete ſich uͤber jhrer gueten ankunfft / hieß außladen / vnd was der narrheit mehr war: auch uͤber diß mit ſeinem bruder zůrn - te / daß er jhm durch die aͤrtzte von ſolcher reichen thorheit abhelf - fen laſſen / vndt jhn ſeiner beſten luſt beraubet hette.

So biſt du in aller zeiten hiſtorien vndt exempeln dermaßen durchtrieben / daß du wol weißeſt / wie das frawenzimmer nicht allein offtmals die wangen / ſondern auch die worte zue faͤrben pfleget / vndt daß kein waßer geſchwinder eintrucknet als weiber - threnen. Wie ich dir ferner mitt trawrigen augen nachſchawe / ſo bin ich der hoffnung / der wahren welche du zue holen außzeuchſt / die kein Zoͤllner anhalten / kein ſeerauber verſencken / kein fewer verzehren kan / ehiſt durch dich zue genießen. Du biſt in dem alter / da die beſten reiſegeſellen wahl vndt vrtheil mitt dir ziehen / vndtwirſt23wirſt nicht nach art etlicher jungen leute / an ſiat der tugendt eine nichtige wißenſchafft / einen leichten ſchatten der hoͤffligkeit vndt gueter uͤbungen ertappen; weßen die außlaͤnder / welchen man jh - re leichtfertigkeit / laſter vndt gauckeley thewer genung bezahlen muß / in die fauſt hinein lachen. Von welcher jungen purß new - lich einer ſagte; ſie kaͤmen jhm fuͤr / wie wann man etwan eine wandt anſiehet / vndt auß tunckelen ſtriechen vndt zuͤgen vermei - net / als ob koͤpffe von thieren / waßer vndt waͤlder daran ſtuͤnden / da doch nichts dergleichen verhanden were: dann alle gebrechen mußten in jhren augen eine tugendt ſein / alſo daß ſie eine hofferti - gen Spanier anders nicht als ehrbahr / einen vnverſchaͤmten Welſchen freundtlich / einen leichtſinnigen Frantzoſen behertzt / einen ſpringeriſchen Engellaͤnder hurtig / vndt einen verſoffenen Deutſchen luſtig vnd vertraͤwlich zue nennen pflegeten. Du haſt die ſitten der hoͤfe / da ſo viel much vndt ſchmincke verkaufft wirdt / zimlich erfahren; vndt wirſt wißen / daß wie daſelbſt / alſo auch auff reiſen eine ſparſame Zunge / vndt ein verſchloßenes hertz hoch von noͤthen ſindt. Letzlich wann dich der fahrmann des leibes das gemuͤte / durch ſo viel feſtungen / ſtaͤdte vndt Laͤnder fuͤhren wirdt / wann du augen vndt ſinnen zum genuͤgen fuͤllen / vndt die muͤdig - keit des weges mitt ergetzung / dieſe mitt jener vermengen wirſt / ſo ſchawe zue / daß du die ſegel deines lebens nach dem leitſterne der vnvergaͤngligkeit allzeit wendeſt / vndt die weltlichen dinge al - ſo anſeheſt / daß du betrachteſt / es beherrſche ſie keiner nicht beßer / als der jenige welcher ſie verachten kan.

Aber / ſagte Nuͤßler / was halten wir vnſere gaͤſte mitt ande - ren reden auff / weil jhnen vieleicht lieber wore / in dieſen plaͤtzen vndt gefilden ſich vmb zue ſchawen? Sie ließen es jhnen belieben / ſatzten ſich zuvor etwas vnter den ſchatten der hohen baͤwme / vndterzehl -24erzehlten von dieſem vndt jenem / was es theils in eines jeglichen ſeinem vaterlande / theils mitt jhrem eigenen zueſtande fuͤr beſchaf - fenheit hette. Als ſie nachmals vermeinten weiter zue gehen / vndt die gelegenheit ſelbiger orte zue beſichtigen / kamen ſie ohn gefehr an eine ſchoͤne bach / die mitt jhrem ſilberglaͤntzenden waßer die au - gen / vndt mitt dem lieblichen geraͤuſche ohren vnd ſinnen ergetzete. Ein edeles fluͤßlein / fieng Venator an / vndt weil die berge dermaſ - ſen nahe ſindt / ſo muß es nicht weit hiervon entſpringen. Laßt vns / ſagte Buchner / ein wenig daran hinauff ſpatzieren. Wir wa - ren faſt an den wurtzeln des ſchneegebirges / als wir einer Nimfe / die an einer friſchen grotte oder hoͤle auff den lincken arm gelehnet lag / gewahr worden / welche mitt einem ſubtilen durch ſcheinen - den ſchleyer bekleidet war / die haare / ſo mitt einem gruͤnen krantze geziehret / auff eine frembde art auffgebunden hatte / vnd vnter der rechten handt ein geſchirr von dem weißeſten marmor hielte / dar - auß das quell des baͤchleins geronnen kam. Wiewol wir nun uͤber dem ploͤtzlichen anſchawen nicht allein erſchracken / ſondern auch im zweiffel ſtunden / ob wir ſtehen ſolten oder lauffen / fieng doch die ſchoͤneſte creatur / oder viel mehr goͤttinn / mitt anmutiger ſtim - me alſo an zue ſingen: