Vorrede an den Guͤnſtigen vnd Kunſtliebenden Leſer.

ES hat / Guͤnſtiger vnd Kunſtliebender Leſer / ein Gelehrter vnd Scharffſinniger Mathematicus zu Pariß (deſſen Namen mir zwar vnbekannt) ein Buͤchlein / welchs er Recreationes mathematicas, das iſt / Mathe - matiſche Ergoͤtzungen nennet vnd intituliret / vor we - nig Jahren in offenen Druck an den Tag gegeben: Dar - innen er was in Mathematicis vnd Phyſicis wunderlich / zu ergoͤtzung deß Gemuͤths annemlich / vnd dann dem Menſchen zu practiciern nůtzlich / in ſeiner Mutterſprach tractiert / vnd abhandelt. Solchs iſt mir von einer Hochgelehrten Per[ſ]on / als meinem ſehr wer - then lieben Herrn vnd Freund / nicht vnlangſt von Pariß geſchicket vñ neben einem andern Hebr[aͤ]iſchen Tracta, zu einem Newen Jahrs Præ - ſent verehret worden Vnd ob ich zwar der Frantzoͤſiſchen Sprach nit ſo maͤchtig / daß ich ſelben Tractat vollkommenlich vor mich ſelbſten / verſtehen koͤnnen / hat mich doch nicht allein der Titel vnd Figuren deß Buchs / ſondern auch der groſſe Eyffer vnd Begiert zu ſo annemlichen Kůnſten dahin getrieben / daß ich mit huͤlff eines Frantzoͤſiſchen Lexici, das meinſte verſtehen lernen / vnd diß deſto leichter / weil ein zimlicher ja der meinſte theil ſelbiger Kuͤnſte mir zuvor nicht vnbekannt: Wie aber dieſem allem / weiln ich an vielen Orten den rechten voͤlligen Ver - ſtand vor mich ſelbſt nicht finden vnd erreichen koͤnnen / hab ich end - lich einen Gelehrten vnd der Frantzoͤſiſchen Sprach ſehr wol erfahr - nen Mann von freyen ſtucken dazu angenommen / (deſſen Namẽ / wañ ich wuͤſte jhme dadurch ein Belieben geſchehe / ich hie gern exprimiern vnd meldten wolte. die Vnkoſten vnd Muͤhe daran gewendet vnd mit ſeiner huͤlff gedachtes Werck in die Teutſche Sprach verſetzet. Darauß ich dann bey meinen vielfaͤltigen laboribus, nicht geringe Ergoͤtzligkeit erſchoͤpffet vnd bekommen / alſo daß ich mir eingebildet / in Mathemati - cis vnd Phyſicis mir kein Opus jemahls lieblicher vorkommen. Jn mei -Bner2An den Guͤnſtigen Leſer. ner Jugend hatte ich ſolche vnd dergleichen Kůnſte / nur luſts halben zuſam̃ zu tragen / eine ſonderbahre Frewde / die demonſtration aber vnd Gruͤnde ſolcher Kuͤnſte / als dz vornembſte ließ ich auß vnverſtand er - ſitzen. Mein intent war gute diſcurſus dadurch zu continuirn / vnd da man ſonſten die zeit mit uͤberflůſſigen eſſen vnd trincken / oder vnnuͤtzen Geſchwaͤtzen ſolte zubringen dergleichen ſchoͤne natůrliche Kůnſtlein vor die Hand zunemẽ / damit die Zuſeher zu delectiren, viel boͤſes zuver - hindern / vnd je laͤnger je mehr zu lernen: wie dann auch vielfaͤltig ge - ſchehen. Salomon in ſeinen Sprichwoͤrtern am 27 Capitel ſpricht: Ein Meſſer wetzet das anď / vñ ein Mañ den andern / welchs ſich auch bey mir befandt / dann in dem bißweilen einer dieſe / ein anderer eine an - dere vnd ich meine Kunſt voꝛbrachte / wurden die mir vnbekante ſtuͤck / von mir allzeit auffgezeichnet / vnd ſo lang zuſam̃ getragen / biß derer Anzahl in viel hundert erwachſen vnd zugenommen. Als ich aber et - was aͤlter worden / zu beſſerm Verſtand gelanget / vnd was Nutz die de - monſtrationes ſolcher Kůnſte / einem Studioſo Mathematicæ vnd Phyſicæ braͤchten / geſpuͤret / habe ich mich auff den Grund vnd Beweiß der Kuͤnſte mehr als auff die Kuͤnſte ſelbſtẽ geleget / vnd darauß nicht ge - ringen Nutzen erlanget vnd zuweg gebracht. Jch hab aber offt ſolche meine obſervationes den Kunſtbegierigen zu gut / in offenen Druck zu bringen / mir vorgenommen / allein dem Kluͤgling vnd Laͤſterer nit ins Gericht zu kommen / iſt es bißhero vnterlaſſen worden: Dann ich wol gewuſt / daß davon vngleiche judicia fallen wuͤrden. Weiln aber ein ſo vornemer gelehrter Profeſſor zu Pariß der Sach einen anfang gemacht / mir gleichſam das Eiß gebrochen vnd den Weg gebahnet / habe ich ſolchs ſein Werck mit meinen Zuſatzungen zu publiciren / mich endlich reſolviret. Damit aber ein jeder deme diß Buch vnter die Hand kom̃et / wiſſe / welcher geſtalt es von mir angefangen / angeoꝛdnet vnd geendet / ſo will ich mich deſſen in folgenden Puncten erklaͤren / vnd den Leſer deßwegen Bericht ertheilen.

Der Frantzoͤſiſche Author nennet ſein Buͤchlein Recreations mathe - matiques, das iſt wie geſagt: Mathematiſche Ergoͤtzungen. Weiln a - ber viel Phyſicaliſche Stuͤck darinnen / vnd dieſer mein Tractat deß Na - mens halben von jenem vnterſchieden werde / hab ich jhn Delicias Phyſi - co-mathematicas, zu Teutſch aber / Mathematiſche vnd Phyſicaliſchs Erquickſtunden benahmſamet.

Zum andern theilet er ſein Buͤchlein / weil es ſehr klein / nur in zweyTheil /3An den Guͤnſtigen Leſer. Theil / ich aber das meine / weil es vmb ein mercklichs groͤſſer / beſſerer Ordnung halben / wie folgen wird in ſechzehen Theil.

Zum dritten / tractiret er ſeine Kůnſte per problemata: weiln ich mich aber / in den ich den Teutſchen zu gut ſchreibe / wo muͤglich / Teutſch zu reden bemuͤhe / vnd diß auff Erinnerung Aventini in ſeiner Vorrede / welchem es ſehr mißfaͤllt / daß man die Teutſche Sprach mit frembder Sprachen woͤrtern / ohne noth / vielfaͤltig beflaͤcket / alſo habe ich die problemata, wie vor mir auch der vorneme Mann Rivius vnd andere gethan / Auffgaben: vnd weil viel Fragens weiß vorgegeben / ſelbiges Fragen genennet.

Zum vierdten / werden in deß Frantzoͤſiſchen Profeſſoris Tractat nur bey anderthalbhundert Auffgaben vnd Fragen gefunden / ich aber habs biß auff 663. getrieben vnd gebracht.

Zum fůnfften / weiln deß Authoris Tractat klein vnd kurtz / hat er ſei - ne Probiemata ohne Ordnung vorgebracht / in dem er bißweiln ein ſtuck auß der Arithmetic oder Rechen Kunſt / bald ein anders darauff auß dem Feldmeſſen Perſpectiv vnd dergleichen / genommen / dannenhero er eines Regiſters beduͤrfftig geweſt welchs er auch dazu geſetzet / mich aber hat vor gut angeſehen / eine richtige Ordnung hierinn zu halten / vnd die Kuͤnſte nach den theiln der Mathematic / wie ſie ordentlich auff einander folgen / zu tractiren: Deßwegen dann der erſte Theil Stuͤck begreiffet der Rechen Kunſt anhaͤngig / der ander haͤlt in ſich Kuͤnſte ſo auß dem Feld - vnd Landmeſſen genom̃en / vnd ſo fortan / wie ſolche Ordnung nach dem Titel dieſes Buchs zu finden / vnd alſo ein Regiſter erſparet worden.

Zum ſechſten / wo der Frantzoß bißweilen ſo obſcur vnd dunckel ge - redet / daß er ſchwer zu verſtehen / habe ich jhn mit meinem Zuſatz wo es ſeyn koͤnnen / erlaͤutert vnd alles / ſo viel mir muͤglich / deutlich vnd klar beſchrieben.

Zum ſiebenden / weil mich deß Authoris diſcurs bißweiln zu lang ge - deucht / bin ich nicht eben bey ſeinen Worten verblieben / ſondern hab was nit eben zur Sach dienet / außgelaſſen / vnd vom diſcurs abgebꝛochẽ.

Zum achten / ſeynd bey jhme in die 70 Figuren zu finden in welchen bißweiln Buchſtaben / ſo im Text angezogen werden manglen: welche ich an vielen Orten dazu geſetzt. Die Figurn aber habe ich / wo ſie vn - noͤtig / vnd die Kunſt ohne Figurn wol zu verſtehen / außgelaſſen: Hin - gegen ſeynd in dieſem Wercklein in die 180 Figurn zu finden. Wo michB ijferner4An den Guͤnſtigen Leſer. ferner die Figuren deß Authoris recht perſpectiviſch gedeucht / bin ich denſelben nachkommen im widrigen habe ich die Figuren von newem geſtellet vnd perſpectiviſch entworffen.

Zum neundten gleich wie der Frantzos in ſeiner Mutterſprach zu beſchreibung ſolcher Kuͤnſte nit hohe wort gebraucht / vnd ſolche auch nit von noͤtẽ: dann je ſchlechter der ſtylus bey erklaͤrung ſolcher Kuͤnſtẽ / je beſſer ſie zuverſtehẽ vnd zufaſſen / Alſo habe ich auff begehrn deß H. Verlegers alle ſolche Kuͤnſte aufs einfaͤltigſt / jedoch mit recht teutſchẽ / vnd wo es die notdurfft erfoꝛdert / Lateiniſchen wortẽ vñ terminis, an tag geben / vnd dem Leſeꝛ gantz deutlich vñ klar vor die Augen geſtellet.

Zum zehenden / weiln der Frantzos ſelten der Authorum gedencket / welche die Kuͤnſte deren er erwehnet / auch beſchrieben / einem jeden In - ventori vnd Erfinder aber ſeine Ehr gebuͤrt: Als hab ich an den mein - ſten Orten die Authores geſetzet / were auch noch an vielen mehr geſche - hen / wañ ich mein Bibliothec zur Hand gehabt / vnd nicht den meinſten theil / Kriegsgefahr halben an ſichere Ort transferiren muͤſſen: Man wird aber voꝛ diſer Vorꝛede ein zimliche anzahl ſolcher Authorũ antref - fen. Was ich ferner nit in andern Scribentẽ gefundẽ / vnd einig vnd al - lein in dẽ Frantzoſen angetroffen / hab ich auch vnvermeldt nit gelaſſẽ.

Zum eylfften weiln offtgedachter Autor, die demonſtration. Grund vnd den Beweiß ſelten zu ſeinen Auffgaben geſetzet / inſonderheit in der Rechẽkunſt / ja offt manches gemeines vñ bekantes ding bloß ohne demonſtration vorbringet: ſo habe ich mich bemuͤhet / wo es mich von noͤten gedeucht / die demonſtrationes hinzu zufuͤgen: Dañ viel Auffgaben ſich ſelbſten demonſtriren, alſo / daß keines fernern beweiſes dabey von noͤthen iſt. Jch habe aber die demonſtration bißweilen gern mit ſtill - ſchweigen vmbgangen / damit dem gůnſtigen Leſer auch etwas zu ſpe - culiren vnd zu ergruͤnden gelaſſen wuͤrde.

Zum zwoͤlfften / lehret er etliche feine Stuͤck mit Karten vnd Wuͤrf - feln verrichten / welche auß der Rechenkunſt meinſtes theils jhren Vr - ſprung nemen / vnd deßwegen nicht zu verwerffen / jedoch weil meine meynung nit iſt / die Jugend mit karten vnd wuͤrffeln vmbgehen zuler - nen / vñ doch die demonſtration artlich vnd nuͤtzlich / habe ich die meiſtẽ vnd voꝛnembſtẽ Stuͤck / auff andere Sachẽ gerichtet vnd demonſtriret.

Zum dreyzehenden / habe ich auch / meine meynung dem G. Leſer recht zu verſtehen zugeben / vnd die Mathematiſchen Kuͤnſte gebuͤren - der maſſen zu loben / vor jeden theil eine Vorrede geordnet.

Noch hinterſtellig iſt / vngleichen Vrtheln / derer allbereit etliche von ſolcher meiner Arbeit gefaͤllet / zu begegnen vnnd mich vor dem Kluͤg - ling vnd andern mißguͤnſtigen vnd vnverſtaͤndigẽ Leutẽ zu verwarẽ.

Es moͤchten ſich erſtlich etliche vernemen laſſen / ich haͤtte wol eine nuͤtzlichere Arbeit vor die Hand nemen koͤñen / als eben dieſe / haͤtte auch meines Beruffs Arbeit darneben hindan geſetzet / vnd viel dabey ver - ſeumet: Dieſen antworte ich kuͤrtzlich: Daß ſolche Arbeit meiner Pro - feſſion vñ Beruff nicht zuwider / wird mir auch niemand mit grund der Waarheit nachſagẽ / daß ich deßwegen in meinem Beruff das gering - ſte verſeumbt: Dann ich nur die muͤſſige Zeit welche andere mit ſpatzi - ren vnd andern Ergoͤtzlichkeiten zugebracht / nach meinen verrichten Profeſſionibus, an ſolche Arbeit gewandet / ſie auch fuͤr eine Eꝛgoͤtzligkeit vnd Erquickung deß Gemuͤths gehalten / vnangeſehen / es mir groſſe Muͤhe vnd Arbeit gemacht / daß es aber eine vnnůtze Arbeit ſeyn ſolte / wird folgend das Widerſpiel gezeiget.

Andere moͤchten ſich verlauten laſſen / ſie manches Stůck beſſer zu practiciren wuͤſten / als ichs vorgeben vnd beſchrieben. Diß glaube ich gar wol / vnd vielleicht weiß ichs auch beſſer / welchs ein ieder durch den diſcurs von mir erfahren kan. Es muß aber ein ſchlechter Fechter ſeyn / der jhm nicht einen vnd den andern Streich bevor behaͤlt. Dazu will ich dieſem vnzeitigen Vrtheil entgegen ſetzen / das jenige / deſſen an - dere ſich verlauten laſſen / daß man nemlich ſolche Kůnſt geheim hal - ten vnd nicht einem jeden an die Naſen binden ſolte. Jch hab aber / was zu publiciren geweſt trewlich an Tag gegeben / das andere aber / ſo dem gemeinen man zu wiſſen vn vonnoͤthen / verſchwiegen vnd mir vor - behalten / deßwegen mich niemand verdencken wird.

Letzlich wird es auch an dieſem Vrtheil nit mangeln / daß nemlich viel ſchlechtes / bekantes vnd kindiſches dings in dieſem Tractat, neme auch die Leut nit wenig wunder / daß ich mit dergleichen Kinderwerck vmbgangen. Waar iſts / es ſeynd viel Saalbader vnd Kindiſche Spiel in dieſem Werck / welche einig vnd allein wegen jhrer artlichen demon - ſtration geſetzt. Viel dings practicirn die Kinder vnd gemeine Leut / de - rer demonſtration ſo ſubtil vnd kuͤnſtlich / daß auch die gelehrteſten Phi - loſophi ſelbige zu finden / ſich auffs euſſerſte bemuͤhen muͤſſen. Nihil parvum nihil contemnendum, Es ſey ein ding dem anſehẽ nach ſo gering als es jmmer woͤlle / ſoll mans doch nicht verachten / wie vns die alten Weiſen gelehret. Zum Exempel / Einem Knaben iſt nicht ſchwer /B iijKugel -6An den Guͤnſtigen Leſer. Kugelrunde Waſſerbullen / mit einem Strohalm auß Saiffenwaſſer auffzublaſen / allein die Vrſach / warumb ſie rund vnd nit einer andern Figur / auch was ſolche ein geraume Zeit erhalte vnd widerumb zer - breche kan kein gemeiner Man anzeigen. Ein Phyſicus oder Naturkůn - diger wird dazu erfodert. Ein Bawrnknecht ſo an einem Haſpel von zweyen vnterſchiedlichen Farben Schwingen gemacht / Garn abwin - det / ſihet / wann der Haſpel geſchwind vmblauffet / nur die ſchwinge welche eine hoͤhere Farb hat vor der andern. Die Vrſach verſtehet er nicht / ein Opticus aber / oder der Seh Kunſt Erfahrner / kan ſolche an tag geben. Ein Kind wirfft einen Stein in ein Waſſer / erfrewet ſich / daß er darinn viel Circkel machet / diß iſt zwar ein kindiſche frewd: die Vrſach aber deſſen anzuzeigen iſt kein Kinderwerck / ein Philoſophus wird ſol - che zu finden / dazu erfordert. Wie jhme aber Vitruvius in ſeinem V Buch cap. III vnd Seneca lib. I. cap. II. quæſtion natural. wie auch Gulielmus Phi - lander ſolches Kindeꝛwerck zu nutz machen / kan jeder an gedachten Or - ten ſelbſten leſen. Ariſtoteles der Scharffſinnige vnd weiſe Mann / ſetzet in ſeinen Schrifften viel kindiſches dings der demonſtration halben / vnd dadurch zu hoͤherer Sachen Verſtand zu gelangen. Was Bernardinus Baldus in Mathematicis außgerichtet / iſt den Gelehrten nicht vnbekañt / ſolcher ſchaͤmet ſich auch nicht kindiſche Werck zu demonſtriren. Vnter andern da er in Mechan. Ariſtotelis von bewegung der Schiff redet / nim - met er auch ein Exempel von den verticillis, das iſt ein Cꝛeutz / daꝛan vier Kartenblaͤtter ſtecken / welchs / ſo es die Kinder in die Hand nemen vnd ſchnell lauffen / an einem Stab vmblauffet / vnd dadurch macht er ſeine demonſtration von bewegung der Schiff vielleichter. Vnd ſolcher Ge - ſtalt haben ſich mit dergleichen Wiſſenſchafften Hohe Potentaten / Keyſer / Koͤnig / Fuͤrſten vnd Herren delectiret vnd ergoͤtzet / wie an ſei - nem Ort folgen wird.

So wird nun der guͤnſtige vnd auffrichtige Leſer mich nit ſchelten noch verden - cken / daß ich bißweilen Kinderpoſſen hieriñ / einig vnd allein der Ergoͤtzligkeit vnd de - monſtration oder beweiß halben vorgebracht / vnd jhm mein wolmeynẽ gefallen laſ - ſen / auch mit dieſem wenigen vor dißmal vor lieb nemen. Der vngezweiffelten Zuver - ſicht / daß / ſo ich verſpuͤren werde / jhme ſolche meine Arbeit añemlich / ich ins kuͤnfftig / allen Kunſtbegierigen / mehr zu communiciren reſolviret. Die Welt anlangend / zweiffelt mir nit / ſie werde jhrem alten gebrauch vnd angewehnter Tugend nach / mir auchwiſſen dafuͤr zu dancken. Hiemit vns ſaͤmptlichen dem Allmaͤchtigen zu be - harrlichen Obhalt getrewlich entfohlen.