ALso weichen
Vnd verbleichen
Meine gutten Freuͤnde mir /
Dieſe wandern
Nach den andern
Vnd verlaſſen mich alhier /
Auch Herr Blum eilt jhnen nach
Jn ſein liebes Grab-Gemach.
Such 'ich newe
Die in Trewe
Mir verpflichtet koͤntten ſeyn /
Eh ich finde
Sie ergruͤnde /
Zehnmahl geh 'ich druͤber ein.
Freund' und alte Muͤntze ſind
Sachen die man ſelten findt.
NeinNein ich werde
Jn die Erde
Auch nach wenig Zeit gethan /
Die Geſchaͤffte
Meiner Kraͤffte
Sagen mir es ſtuͤndlich an.
Liebſte Schatten / frewet euch
Jch komm 'auch in ewer Reich.
Die im Leben
Mich umbgeben
Sind im Tod 'auch vngetrant.
Alle Seelen
Jn den Hoͤlen
Sollen ruͤhmen unſer Bandt.
Vntterdeſſen macht mir dort
Raum an einem gutten Ort.
Was von Sachen
Koͤntte machen
Daß man gern lang leben woltt '?
JedeJede Kammer
Heget Jammer.
Guͤldner Trug und trieglich Goldt
Vnmuth / Angſt / betruͤbter Fall
Herſchen hie nur uͤberall.
Welcher ſiehet
Was geſchiehet
Alles Schrecken / alle Noht /
Vnd nicht Schmertzen
Fuͤhlt im Hertzen
Jſt vor ſeinem Tode todt.
Oder That die ich geſehn
Geſtern unverhofft geſchehn.
Kommt von Sinnen /
Kunſt-Goͤttinnen /
Schlagt die Bruͤſt 'ohn untterlaß /
Ewer Orden
Hegt nun morden /
JſtJſt von Blut fuͤr Tinten naß.
Sathan hat gewonnen Spiel
Vbt jetzt mang Euch was er wil.
Gleich wie ein Reiß vom Baum gebrochen /
Ein Lamm / das friſch iſt abgeſtochen
Vnd noch in ſeinem Blute liegt /
So war der junge Menſch zu ſchawen /
Sein Haupt und Bruſt war Blut und Grawen /
Sein 'Augen durch die Nacht beſiegt.
Es hat der reiche Strom die Muͤmmel
Jhn wol zu balgen und Getuͤmmel
Nicht her nach Koͤnigsberg geſchickt /
Er ſoltt 'hie Zucht vnd Weißheit faſſen /
Vnd mus ſein junges Leben laſſen /
Ein Stein iſt wer hieruͤber nicht erſchrickt.
Dieß alles vnd dergleichen
Davor man moͤcht erbleichen /
Kraͤnckt euch / jhr Schatten / nicht /
JhrJhr ſchwebt in Fried und Wonne /
Scheint Euch nicht unſre Sonne
So kennt jhr ander liecht.
Jhr liebt die alten Flammen
Die Euch alhie zuſammen
Jn Freundſchafft kuntten ziehn /
Vnd ſinget GOtt zu ehren /
Fuͤr allen ſind zu hoͤren
Stobeus / Roberthin.
Auch Blum iſt nicht der letzte
Der hie uns offt ergetzte
Durch ſeiner Stimmen Klangk.
Der Schlosplatz muſt 'erſchellen
Wenn er in der Capellen
So hell vnd lieblich ſangk.
Er hat nun alles wieder
Kein Schlag laͤhmt jhm die Glieder /
Jhn rewet nicht der Noht
DieDie durch der Kranckheit Kette
Zwey Jahr jhn auff dem Bette
Gehalten wie fuͤr todt.
Wol Jhm / wol allen denen
Die ſich nach Chriſto ſehnen
Aus dieſer Qual und Pein.
Wol mir auch / wenn ich werde
Bald Aſche Staub vnd Erde
Dorthin verſamlet ſeyn.