DEr ſchrecklich-rauhe Tod bezwingt
Was irgends Furcht vnd ſchreckenbringt /
Wenn wir des Geiſtes Krafft nichtachten /
Vnd nach dem Fleiſch jhn nur betrachten.
Wir ſehen wie ein Wurm sich kruͤmmt
Jm fall man jhm das Leben nimmt /
Die Spinne ſuchet zu entgehen
Wilſt du jhr nach dem Leben ſtehen.
Geſchweig ein Mensch / ergibt ſich nicht /
Vnd traͤgt viel lieber Stein vnd Gicht /
Kan er nur diese Hoffnung heben
Er werde noch ein wenig leben.
Dieß ſcheint vns grausam allermeiſt
Daß wir da liegen gantz ohn Geiſt /
Vnd muͤſſen bald darnach verrotten
Ein Fraß vnd Speiſemarckt der Motten.
Denn das wil der Vernunfft nicht ein /
Daß vnſer Geiſt muͤss 'uͤbrig ſeyn /
VndVnd daß am Ende dieſer Erden
Der Leib auch ſol erwecket werden.
Sie meinet durch den Tod ſey hin
Wie vnſer Leib so vnſer Sinn /
Vnd koͤnne nichts mehr wiederkehren.
So lang des Himmels Tage wehren.
Viel anders aber iſt geſinnt
Ein auß-erwehltes Himmel-Kind /
Das laͤsst ſich Gottes Wort berichten
Vnd achtet so den Tod mit nichten.
Es eilt aus dieſem Jammer-Thal
Der Hoffnung voll wie Herr Weſtphal /
Der ſich gegruͤndet auff den Glauben
Den jhm kein Tod hat koͤnnen rauben.
Er gab der Welt vnd jhrem Pracht
Vnd aller Arbeit gute Nacht /
Der er hie vnd in frembden Landen
Gnug mancher Art hat außgeſtanden.
Er hat vertraͤglich hie gelebt /
Nicht einem Kinde widerſtrebt /
Des HErren Wort jhm hoͤchſtermaſſen
Den beſten Seelen-Schatz seyn laſſen.
Der auch mit ſeines Geiſtes Raht
Jn jhm so wol gewircket hat /
Daß er in ſeiner letzten Stunden
Deſſelben reichen Troſt empfunden.
Jetzt lebt er alles Kummers los
Jm Wolluſt-vollen Abrams-Schos /
Vnd hofft ſein Leib werd 'auch zum Leben
Einmal ſich aus dem Grab' erheben.
O laſſet vns auch ſeyn geſchickt /
Wenn vnſer Stuͤndlein zu vns ruͤckt /
Daß wir des Gottes-Geiſtes Gaben
Stets in Bereitſchafft moͤgen haben.
Er hilfft vns enden vnſern Lauff /
Er ſchleuͤsset vns den Himmel auff /
Vnd zeuͤget Chriſtus ſey vns eben
Der Weg / die Warheit vnd das Leben.
Jm Tod ohn ſeinen Beyſtand ſeyn
Jſt fahren in die Hellen-Pein /
Vnd ewig Marter / Angſt vnd Grawen
Sampt den verdampten Geiſtern ſchawen.