33
[Printer's ornament
ODE.
[Decorated three-line initial
SENAT la lumiere du monde,
Grand Conclaue des Demidieux,
Anges qui viuez sous les Cieux,
Seuls en qui nostre espoir se fonde;
Prestez l'oreille aux iustes Vœux,
Que nos cœurs d'ennuy langoureux,
Du debris de nostre Prouince,
Portent iusques au Firmament,
Priuez de tout contentement,
Tant que nous reuoyons les yeux de nostre Prince.
[Printer's Ornament
L'impatience nous emporte
De rendre hommage à nostre Roy,
Bien loin de violer la Foy
Où nostre sujettion nous porte;
Quoy que les faux Mazarinis,
Nos implacables Ennemis,
Disent nostre Ville rebelle;
Nous ferons voir à tous momens,
Qu'aucuns de nos deportemens
N'acquerreront iamais cette tache mortelle.
44
[Printer's Ornament
Par le malheureux artifice
De ce perfide Mazarin,
Ce diabolique Lutin,
Par son infernale malice
Nous l'a méchamment enleué;
Mais nostre Peuple sousleué
Fera paroistre sa constance,
Punißant la temerité
De ce Cardinal effronté,
Qui nous a dérobé sa Royale presence.
[Printer's Ornament
Si l'on oyt retentir nos armes,
C'est pour son seul recouurement;
Car quel autre contentement
Trouuerions-nous dans les alarmes:
Ce n'est pas nostre intention
De nourrir la sedition,
Mais bien de punir l'insolence
De ce perfide Rauisseur,
De ce detestable Voleur,
Qui nous le rauissant a causé son absence.
Nostre55
[Printer's Ornament
Nostre Ville toute esplorée,
N'a plus que des pleurs & des cris,
Elle se perd dans les ennuis,
Comme vne mere desolée
Qui voit son fils dans le Cercueil:
Toutefois ce funeste dueil
Ne luy fait point perdre l'enuie
De recouurer ce cher Dépost,
Qui la maintenoit en repos,
Ou d'espancher fidele & son sang & sa vie.
[Printer's Ornament
Quel ennuy plus insupportable
Peut toucher nostre sentiment,
Que ce funeste enleuement
De nostre Prince desirable:
Nostre Soleil est éclipsé,
Nostre Climat est delaißé
De sa fauorable influence;
Mais allons le reconquerir,
Le recouurer ou bien mourir,
Nous sousmettans fidels à son obeïssance.
B66
[Printer's Ornament
La grandeur de nostre Courage
N'apprehende point les dangers,
Des Allemans & Estrangers
Faut faire vn horrible carnage;
A l'aspect de nos Bataillons,
De nos valeureux Champions,
On verra dißiper l'orage
Qui nous menace de la mort,
Et en repoussant leur effort
Ils gagneront du champ l'honneur & l'auantage.
[Printer's Ornament
BEAVFORT, le renom & l'estime
Que nous faisons de tes haut faits,
Ce sont les fleches & les traits
Où nostre courage s'anime;
Nous reconnoissons la vertu
Dont Nature t'a reuestu,
Partant venge nous de l'outrage
Que nous a fait ce Cardinal,
Faisant éclipser le Phanal
Qui éclairoit nos iours & chassoit les nuages.
77
[Printer's Ornament
Ce perfide poußé d'enuie
T'a fait passer pour assaßin,
Et d'vn iniurieux dessein
Pretendoit de t'oster la vie;
Mais nostre Auguste Parlement,
Du monde l'vnique ornement,
En detestant son artifice,
Et blasmant son impieté,
A reconnu ton equité,
Et prononcé l'Arrest contre son iniustice.
[Printer's Ornament
Fais donc paroistre ta vaillance,
Poursuiuant ce Tygre inhumain,
Fais luy ressentir de ta main
La punition & la vengeance;
Si iamais par tes faits guerriers
Nous sommes quittes des dangers,
Et qu'il vienne en nostre puißance,
Nous luy preparons des Tombeaux,
Dedans le ventre des Corbeaux,
Sepulchre glorieux pour vne telle engeance.
88
[Printer's Ornament
Seigneurs n'espargnez point la vie,
Les richesses, ny les moyens
De vos genereux Citoyens,
Tous portez d'vne mesme enuie
De combattre ces rauisseurs,
Ces impitoyables voleurs,
Qui ont enleué nostre Prince,
Pour exercer de tous costez
Leurs funestes desloyautez,
Et nous causer la mort pillant nostre Prouince.
[Printer's Ornament
Allons donc, sous vostre conduite,
De vous nous attendons la Loy,
Qui perdra la race maudite
Qui nous cause tant de malheurs;
Cette attente anime nos cœurs,
Et les met dans l'impatience,
De mourir courageusement,
Pour cet heureux recouurement,
Qui finissant nos maux punira l'insolence.