1.Das erſte geſchencke vnd gelencke an die - ſem Gedenck Ringe iſt vnd heiſt: Pura Verbi divini prædi - catio; Daß ſie Gottes Wort jhren von GOtt vertraw - ten Zuhoͤrern / nach dem befehl Chriſti / lehret ſie halten alles das / was ich euch befohlen habe / rein / lauter vnd vnverfaͤlſcht ſagen vnd vortragen; Denn alſo meldet vn - ſer Text; Gedencket an ewre Lehrer / die euch das Wort Gottes geſaget haben.

Allerliebſte Chriſten / Es hat GOtt der HErr je vnd allewege ſeine Kirche mit Lehrern vnd Predigern reichlich verſehen: Alſo / das auch von Adæ zeiten / biß auff die Zukunfft des HErrn Chriſti ins Fleiſch ein lan - ger Catalogus, vortrefflicher vnd hochbegabter Lehrer vnd Prediger koͤnte referiret vnd erzehlet werden.

So hat auch vnſer Himliſcher Ertz Hirte vnd Bi - ſchoff vnſer Seelen Chriſtus JEſus 1 Petr: 2. ſelber im Newen Teſtament das Kirchen Regiment auffs newe gar wolbeſtellet; Denn da hat Er nach dem außſpruch Pauli 1 Corinth: 12. Epheſ: 4. etliche zu Apoſteln / etliche zu Propheten / etliche zu Evangeliſten / etliche zu Hir - ten vnd Lehrer geſetzt / das die Heyligen zu gerichtet wuͤrden / zum Wercke des Ampts / dardurch der Leib er - bawet werde.

Gleich wie es aber im gemeinen Sprichwort heiſſet: Ad templum Domini Satanas locat arte Sacellum; WoGOtt[11]GOtt will eine Kirche han / Da bawet der Teuffel ſeine Capelle dran.

Alſo iſt es auch der Chriſtlichen Kirchen je vnd alle - wege gegangen; da hat der Teuffel immer ſein Vnkraut vnter den edlen Weitzen geſeet / vnd einen jrrthumb nach dem andern erwecket / wie Er ſich denn gegen dem Koͤ - nig Achab verlauten liß / Er wolle außgehen / vnd ein luͤ - gen Geiſt ſein / in aller ſeiner Propheten Munde; Vnd der Apoſtel Petrus meldet 2 c 2. daß Er zu ſeiner zeit Leute erwecket / die Luͤgen geredet / vnd verterbliche Secten eingefuͤhret / die den HErrn verleugnet / der Sie er - kaufft hat.

Nun allerliebſte Chriſten / Dieſe Leute gehoͤren nicht in den Gedenck Ring des Apoſtels Pauli vnd vnſers ſee - ligen Herrn Blaſii Werders. Nein / keines weges nicht / fuͤr denen ſoll man ſich huͤtten vnd vorſehen / wie vns der HERR Chriſtus ſelber darzu vermahnet Matth: 7. Wenn Er ſaget: Cavete vobis, Huͤttet euch / Sehet euch fuͤr / fuͤr den falſchen Propheten / ꝛc. Sondern die gehoͤ - ren in den Gedenck Ring vnſers ſeeligen Herr Blaſii die das Wort Gottes rein / lauter / vnd vnverfaͤlſcht geleh - ret vnd geprediget haben. Denn alſo ſaget vnſer Text: Gedencket an ewre Lehrer / die euch das Wort Gottes geſaget haben; Denn es heiſt: Qui loquitur, loquatur eloquia Dei, 1 Petr: 4. Wer dare - det / der rede auß Gottes Wort.

Jm Bapſthumb lehret man / die Schrifft ſey vnvol - kommen / es muͤſſe zu dem verbo ſcripto ein non ſcriptum kom̃en / man muͤſſe die traditiones, Auffſaͤtze vnd Ordnun - gen der Kirchen auch in acht nehmen / vnd dem Worte Gottes gleich halten.

Man muͤſſe Fide formata charitate, durch den Glau - ben der durch die Wercke geformet iſt / Gerecht vnd See -B ijlig[12]lig werden. Man muͤſſe die Jungfraw Mariam vnd an - dere verſtorbene Heylige / als Mitler / als Patronen, als In - terceſſores vnd Vorbieter ehren vnd anbeten.

Man muͤſſe die Verſtorbenen in ein Fegfewer wei - ſen / in welchen ſie von den uͤbrigen Suͤnden / die ſie hie in dieſem leben nicht genungſam gebuͤſſet / panzerfeget vnd gereiniget werden muſten.

Nu dieſe Lehrer gehoͤren nicht in dieſen Gedenck - Ring. Warumb? Denn ſie lehren nicht Gottes Wort.

Gottes Wort ſpricht 1 Joh: 5. Scrutamini Scripturas, Forſchet in der Schrifft / denn jhr meinet jhr habet das Ewige Leben darinnen / vnd die iſts auch die von mir zeuget. Darauß ſchlieſſen wir alſo; Was von Chriſto zeu - get / vnd darinnen das Ewige Leben beſtehet / das iſt vns genung zur Seeligkeit / die Schrifften der Evangeliſten vnd Apoſtel zeugen von Chriſto / Es iſt das Ewige Le - ben darinnen. Ergo, ſo ſind ſie vns genung zur Seeligkeit.

Gottes Wort ſpricht Rom: 3. Wir werden ohne Verdienſt gerecht auß ſeiner genade / durch die Erloͤſung ſo durch Chriſtum JEſum geſchehen iſt.

Wir gleuben durch die genade JEſu Chriſti ſeelig zu werden; Gleicherweiſe wie auch ſie haben die lieben Apoſtel auff dem erſten Concilio zu Jeruſalem geſchloſ - ſen Actor: 15.

Gottes Wort ſpricht Matth: 4. Du ſolt anbeten GOtt deinen HErrn / vnd jhm alleine dienen. Honorem meum alteri non dabo, Eſai: 42. Jch will meine Ehre kei - nem andern geben / noch meinen Ruhm den Goͤtzen; An wen wir gleuben den ſollen wir anbeten. Nu gleuben wir nicht an die Heyligen; Ergo, ſo ſollen wir ſie auch nicht anbeten.

Wer Ewig / Allmaͤchtig / allwiſſend / uͤber allgegen - wertig iſt / den ſollen wir anbeten; Die Heyligen ſindt nicht Ewig / nicht Allmaͤchtig / nicht Allwiſſend / nichtuͤber -[13]uͤberallgegenwertig / Abraham weiß nichts von vns / Jſ - rael kennet vns nicht Eſai: 64. Derowegen ſo ſollen wir ſie auch nicht anbeten.

Wer ein Heyland der Welt iſt / den ſollen wir anbe - ten; Maria iſt nicht ein Heyland der Welt / Sie hat ſel - ber eines Heylandes bedorfft / der jhr Elend vnd Nie - drigkeit angeſehen Luc: 2. Ergo, ſo ſollen wir ſie nicht an - beten.

Gottes Wort ſpricht Marci 16. Wer da gleubet vnd getaufft wird / der wird ſelig werden / Wer aber nicht gleubet / der wird Verdampt werden Apoc: 14. Selig ſind die Todten die im HErrn ſterben à modo von nun an, ꝛc. Wer geſtorben iſt / der iſt gerecht fertiget von der Suͤnde / Der Gerechten Seelen ſindt in Gottes Hand / vnd keine Qual ruͤhret Sie an / Sap: 3. Ruͤhret ſie nun keine Qual an / So ſindt ſie nicht im Fegefewer da ſie gemartert vnd gequaͤlet werden.

Derowegen O du Chriſtliches Hertz / wiltu dermahl eins an deine Lehrer gedencken / So ſihe wol zu / ob ſie dir auch Gottes Wort rein / lauter vnd vnverfaͤlſcht ſagen vnd vortragen.

Denn Gottes Wort iſt alles in allem.

Gottes Wort iſt die rechte Cynoſura vnd Richt - ſchnur / darnach wir gleuben vnſer leben reguliren vnd richten muͤſſen.

Gottes Wort iſt der vnvergengliche Same / da - durch wir New vnd Widergeboren werden.

Gottes Wort iſt vnſer Fuͤſſe Leuchte, vnd ein Liecht auff vnſerm Wege / Pſal: 119.

Gottes Wort iſt ein Artzney vnſer Seelen; Non her - ba nec malagma, Sap: 16. Es heilet Sie weder Kraut noch Pflaſter / Sondern dein Wort HERR das alles heilet. Miſit verbum ſuum & ſanavit eos, Pſal: 107. Er ſandte ſein Wort vnd heilete Sie.

Gottes Wort iſt die Ruͤſtkammer / darauß wir die Wehr vnd Waffen nehmen / damit wir die fewrige Pfeil des Boͤſewichts außleſchen koͤnnen / Epheſ: 6.

Gottes Wort iſt der Steck vnd Stab daran wir vns halten koͤnnen / wenn wir durch den finſtern Thal des Todes wandern ſollen / Pſal: 23.

Ja Gottes Wort iſt eine Krafft Gottes ſeelig zu machen / alle die daran gleuben / Rom: 1. Derowegen wer Ohren hat zu hoͤren der hoͤre.

Vnd das iſt das Erſte gelencke an dem Gedencks - Ringe trewer Evangeliſcher Lehrer vnd Prediger / das vns der Apoſtel Paulus / vnd nach jhme vnſer ſeeliger Herr Blaſius hinter laſſen hat.

2.Das ander gelencke an dieſem Gedenck - Ringe iſt: Legitima Sacramentorum diſtributio, daß ſie die Hochwuͤrdigen Sacramenta nach Chriſti einſetzung vnverfaͤlſchlich diſtribuiren vnd außtheilen.

Allerliebſte Chriſten / Jm Bapſthumb gehet man Muͤndlich mit den Hochwuͤrdigen Sacramenten vmb / Der vielen additamenten bey der heiligen Tauffe wollen wir geſchweigen.

Jm Hochwuͤrdigen Abendmahl entzeucht man den Leyen den Kelch / vnd gibets jhnen nur ſub una nur vnter einerley geſtalt; Man helt Meſſe damit; Man opfferts auff fuͤr Todte vnd Lebendige; Man traͤgets heruͤmb; Man ſperrets ein; Man felt dafuͤr nieder vnd betets an. Aber das alles iſt wider die helle vnd klare Einſetzung des HERRN Chriſti / denn Er ſaget mit außgedruck - ten worten: Nehmet hin vnd eſſet / nehmet hin vnd trincket / ꝛc. Darauß wir alſo argumentiren vnd ſchlieſ - ſen: Was GOtt zuſammen gefuͤget hat / das ſoll der Menſch nicht ſcheiden vnd trennen / Matth: 19. Nu hat der HERR Chriſtus den Kelch vnd das Brodt zu - ſammen gefuͤget vnd geordnet; Ergo, ſo ſols auch bey -ſammen[15]ſammen verbleiben. Wie Ers einmahl geſtifftet vnd ein - geſetzet hat / dabey ſols verbleiben. Nu hat Ers nicht vn - ter Einerley geſtalt / ſondern vnter Zweyerley geſtalt ge - ſtifftet vnd eingeſetzet. Ergo, ſo ſols darbey verbleiben.

Zu was ende Ers einmahl eingeſetzet / dabey ſols ver - bleiben. Nu hat Ers nicht zum auffopffern / nicht zum einſchlieſſen / nicht zum ruͤmbtragen / nicht zum anbeten / ſondern zum eſſen vnd trincken eingeſetzet. Ergo, ſo ſols auch dabey verbleiben.

Wie es Paulus vom HErrn empfangen / 1 Corint: 11. alſo hat ers den Corinthiern gegeben / Nu hat ers nicht vnter einerley / ſondern vnter beyderlty Geſtalt vom HErrn empfangen. Ergo, &c. Die Herren Calviniſten ge - hen auch nicht recht vmb mit dem Sacrament des Lei - bes vnd Bluts des HErrn Chriſti / der heiligen Tauffe zugeſchweigen; Denn da geben ſie fuͤr / das im Hochwuͤr - digen Abendmahl nicht der ware Leib vnd Blutt Chriſti ſey ſondern nur eine bloſſe Figur / nur ein bloß Zeichen des abweſenden vnd im Himmel ſitzenden HErrn Chriſti.

Wenn ein Menſch zum Tiſche des HERRN gehen will / So muͤſſe Er ſich mit den gedancken hienauff in Him̃el ſchwingen / vnd alle die Wolthaten Chriſti durch den Glauben ergreiffen vnd empfahen. Aber nein aller - liebſte Chriſten / nicht alſo / das iſt auch wider die helle vnd klare Einſetzung des HErrn Chriſti / denn Er ſetzet mit außgedruckten worten: Nehmet hin vnd eſſet / das iſt mein Leib / der fuͤr euch gegeben wird; Nehmet hin vnd trincket / das iſt mein Blut / das fuͤr euch vergoſſen wird.

Darauff ſchlieſſen wir alſo: Was am Stam̃ des Creutzes vor vns gegeben vnd vergoſſen / das genieſſen wir im Hochwuͤrdigen Abendmahl. Nu hat Chriſtus nicht Brodt vnd Wein / oder einen Figurlichen Leib vor vns gegeben / oder ein Figurlich Blutt fuͤr vns vergoſſen;Sondern[16]Sondern ſeinen waren Leib / vnd ſein wares Blut. Ergo ſo genieſſen wir im Hochwuͤrdigen Abendmahl den wa - ren Leib vnd das ware Blut / vnſers HErrn Jeſu Chriſti.

Beym Evangeliſten Matthæo ſpricht vnd bericht der HErr Chriſtus: Das iſt mein Blut des Newen Teſtaments.

Das Blut des Alten Teſtaments / das war das Blut des Oſterlaͤmblin / vnd der andern Opffer / die da ge - ſchlachtet vnd geopffert worden.

Das Blut des Newen Teſtaments aber / das iſt Chriſti Blut / Nun empfahen wir im Hochwuͤrdigen Abendmahl das Blut des Newen Teſtaments. Ergo, ſo empfahen wir nicht ein Figurlich Blut / nicht ein Zeichen des Bluttes / ſondern ſein eigenes Warhafftiges vnd Weſendtliches Blut / daß Er zu trincken eingeſetzet vnd verordnet hat.

Der Apoſtel Paulus ſpricht 1 Cor: 10. Wer vnwuͤr - dig von dieſem Brod iſſet / vnd von dem Kelch des Herrn trincket / der wird ſchuldig an dem Leib vnd Blut des Herrn / ꝛc. Vnd jſſet jhm ſelber das Gerichte / ꝛc. An ſchlechten Brodt vnd Wein kan jhme niemand das Gerichte eſſen vnd trincken. Nun eſſen vnd trincken wir vns aber das Ge - richte im Hochwuͤrdigen Abendmahl / wenn wir vnwuͤr - dig davon eſſen vnd trincken. Ergo, ſo genieſſen wir im Hochwuͤrdigen Abendmahl nicht ſchlecht Brodt vnd Wein / ſondern den waren Leib vnd Blut vnſers HErrn JEſu Chriſti.

Was meinet jhr wol allerliebſte Chriſten / Soll man auch an dieſe Lehre gedencken? Nein. Warumb? Dar - vmb / denn ſie adminiſtriren das Hochwuͤrdige Abend - mahl nicht wie es der HErr Chriſtus geſtifftet vnd ein -geſetzet[17]geſetzet hat; Derowegen ſoll man ſich fuͤr jhnen huͤtten vnd vorſehen / damit man nicht von jhnen in zeitliches vnd ewiges Verterben geſtuͤrtzet werde / Denn jene die ei - nem andern nacheilen / werden groß Hertzleid haben Pſ: 16.

Dieſe Meiſter von hohen ſinnen werden einmahl er - fahren was hinter den Worten Chriſti Luc: 17. geſtecket hat. Jene meine Feinde die nicht wollen das ich uͤber ſie Herrſchen ſolte / die bringet mir her / vnd erwuͤrget Sie fuͤr meinen Augen.

Das dritte gelencke in dieſem Gedenckrin -3. ge iſt vnd heiſt: Honeſta vitæ inſtitutio, daß ſie jhren von Gott vertrawten Pfarrkindern mit einem gutem exem - pel Chriſtlichen Lebens vnd Wandels vorgehen.

Ein Knecht des HERRN ſoll nicht zaͤnckiſch ſein / Sondern Vaͤterlich gegen jederman 2 Tim: 2. ſaget der Apoſtel Paulus. Vnd 1 Tim: 3. ſpricht er: Ein Biſchoff ſoll vnſtraͤfflich ſein eines Weibes Mann / Nuͤchtern / Maͤſſig / Sittig / Gaſtfrey / ꝛc.

Jm Bapſthumb will man nicht / das die Prieſter ſol - len eines Weibes Mann ſein / ſondern man weiſet Sie ab mit dem Spruch qui in carne vivunt Deo placere non poſ - ſunt, Die im Fleiſch leben / koͤnnen GOtt nicht gefallen. Aber nein ſpricht Paulus / Ein Biſchoff ſol ſein eines Wei - bes Man. Was GOtt ordnet das iſt loͤblich vnd herrlich Pſal: 111. Den Eheſtand hat GOtt geordnet. Ergo, ſo iſts ein loͤblicher vnd herrlicher Standt.

Die Ehe ſoll ehrlich gehalten werden bey allen Men - ſchen; Nu ſindt die Prediger ja auch Menſchen. Derowe -Hebr: 13. gen ſol auch bey jhnen die Ehe ehrlich gehalten werden.

Jn ſolchem jhrem Eheſtande aber nun / da ſollen Chriſtliche Lehrer vnd Prediger Vorbilde der Herde ſein; Sollen jhren vertrawten KirchKindern mit einem gut - ten exempel eines Chriſtlichen Lebens vnd Wandels vor - gehen.

Vnd dahin ſihet auch das Grichiſche woͤrtlein / wenn ſie der Apoſtel Paulus nennet ἡγομμένομσ Fuͤhrer / Leiter / Zeiger / Wegweiſer.

Denn gleich wie ein Hertzog ein Heerfuͤhrer im ſtreit vor den Soldaten hergehet / vnd jhnen gleichſam den Weg zeiget vnd weiſet; Alſo ſollen Chriſtliche Lehrer vnd Prediger mit einem gutten exempel vor jhren Zuhoͤrern hergehen / vnd jhnen gleichſam den Weg zeigen vnd weiſen.

Vnd das iſt der Gedenck Ring mit den dreyen ge - hencklin oder gelencklin / welchen der Apoſtel Paulus ſei - nen Ebreern / vnd nach jhm vnſer ſeeliger Herr Blaſius ſei - nen Lembergern hinter laſſen hat.

Secunda Pars. 1. Nun wie ſollen Sie jhn aber anſtecken: Wie ſollen ſie jhn gebrauchen? vnd jhme zu eh - ren tragen? Allerliebſte Chriſten / Erſtlich ſol - len ſie jhn anſtecken brauchen vnd tragen: Verbi prædi - cati ruminatione, daß Sie fleiſſig die predigten die Er jhnen auß Gottes Wort gethan ruminiren, vnd wie das reine Vieh jhr Futter widerkehlen / repetiren vnd wider - holen.

Vnd alſo nach der vermahnung Jacobi nicht ver - geßliche Zuhoͤrer ſein.

Ein ſolch Zuhoͤrer war der Koͤnig David / Ach wie offt gedacht er in ſeinem exilio vnd elend an die ſchoͤnen Gottesdienſt des HErrn / Pſal: 122. Wie wuͤndſchete er? daß er dieſelbigen wider ſchawen moͤge.

Wie ſeufftzete er Pſal: 27. Unum petii à Domino, Eins bitt ich vom HErrn / das het ich gern ꝛc Pſal: 84. HERR Zebaoth wie lieblich ſindt deine Wohnungen ꝛc Pſal: 26. HERR ich habe lieb dein Hauß vnd den Ort da deine Ehre wohnet Pſal: 42. Wie der Hirſch ſchreyet nach fri - ſchen Waſſer ꝛc.

Ein ſolch Zuhoͤrer war der Prophet Samuel der ſa - gete: Loquere Domine, quia audit Servus tuus, HERR rede / denn dein Knecht hoͤret.

Athanaſius: Loquere Domine Jesu, verbum tuum Medicina eſt, verbum tuum fons vitæ.

Eine ſolche Zuhoͤrerin war Maria / Marthæ vnd La - zari Schweſter Johan: 10. Solche Zuhoͤrer waren die Ber - rohienſer Actor: 17. denen giebet der Apoſtel Paulus ſelber zeugnuͤß / daß / wenn ſie anheim kommen in der Schrifft geforſchet ob ſichs auch alſo verhilte / wie Er vnd Sillas jhnen geprediget hatten.

Vnd ſolche Zuhoͤrer ſolt jhr auch ſein / allerliebſte Chriſten / da ſole jhr jtzund vnd ins kuͤnfftig die predig - ten die euch der ſeelige Herr Blaſius gethan / fleiſſig wider - holen / vnd ſagen / daß vnd das hab ich von dem ſeeligen Herrn gehoͤret; Darauff wil ich leben vnd ſterben / das wil ich mir zu meinen Haͤupten legen / wenn ich dieſe Welt auch einmahl werde geſegnen muͤſſen / deſſen wil ich nimmermehr vergeſſen / O wol dem der ſolches thut in Ewigkeit.

Darnach ſo ſollen vnſere Lemberger dieſen Gedenck - Ring auch anſtecken brauchen vnd tragen / Finis intuitio - ne, daß Sie nicht nur auff ſein lehr vnd predigten / ſon - dern auch auff ſein ende: Welcher Ende ſchawet an ſpricht der Text. Allerliebſte Chriſten / Es hat zwar GOtt der HErr nach ſeinem allweiſen Rath das gantze Menſchliche geſchlecht / in dreyen Hierarchias vnd Haͤupt - ſtaͤnde diſtribuiret vnd eingetheilet / als ins Geiſtliche / Weltliche / vnd Haͤußliche Regiment / in den Lehr / Wehr / vnd Nehrſtand. Alle dieſe drey Staͤnde ſollen bleiben / ſo lange dieſe ſichtbarliche Welt bleibet / Aber die Leute die Er zu ſeinem dienſt darinn gebraucht / die ſollen nicht im - mer bleiben / ſondern ein ende nehmen / vnd immer einer nach dem andern dahin gehen.

Der Regentenſtandt ſoll bleiben weil die Welt blei - bet. Aber von Regenten ſpricht gleich wol die Goͤttliche Majeſtat: Dixi vos Dii eſtis, Pſal: 82. Jhr habt wol geſagt / jhr ſeidt Goͤtter / vnd allzumahl Kinder des Hoͤchſten / aber jhr werdet ſterben wie Menſchen.

Der Haußſtandt wird auch bleiben weil die Welt bleibet. Aber von Haußvaͤtern vnd Haußmuͤttern / Kin - dern vnd Geſinde heiſt es gleichwol Eccleſ: 1. Ein Ge - ſchlecht vergehet / das ander kommet.

Der Prediger ſtandt wird auch wol bleiben weil die Welt bleibet. Aber die Prediger muͤſſen gleichwol immer einer nach dem andern dahin gehen; Moſes mein Knecht iſt geſtorben ſpricht GOtt der HErr ſelber Joſ: 1. vnd der Apoſtel Paulus ſaget Philip: 2. Die zeit meines abſcheids iſt verhanden.

Wenn nu GOtt der HErr alſo koͤmpt / vnd trewe Lehrer vnd Prediger durch den zeitlichen Todt von die - ſer Welt abfodert / da ſoll man jhr ende anſchawen / vnd daſſelbige wolbetrachten.

Man ſoll jhren Todt nicht geringſchaͤtzig halten / Man ſoll nicht gedencken oder ſagen: Ey koͤmpt einer weg / ſo koͤmpt ein ander wider. Nein. Es kommen jhr wol viel gelauffen / aber GOtt ſendet ſie nicht alle.

Man ſchittelt ſolche Leute / ſonderlich heute zu Tage nicht von Baͤumen / wie mancher wol vermeinet / Son - dern man ſoll viel mehr gedencken / daß / wenn GOtt der HErr ſolche feine vnd reine recht Evangeliſche Luthe - riſche Prediger weg nimpt / daß Er gemeiniglich groſſe ſtraffe ergehen laſſe. Denn trewe Lehrer vnd Prediger ſindt mit Elia / der Wagen Jſrael vnd ſeine Reuter 2 Reg: 2.

Was begegnet dem Hauſe Jſrael fuͤr Vngluͤck da Samuel ſtarb?

Was begegnete der erſten Welt da Noah in denKaſten[21]Kaſten ging? Sie muſte im Waſſer der Suͤndfluth er - ſauffen / Geneſ: 7.

Was begegnete Sodoma vnd Gomorrha da Loth herauß ging? Sie waren mit Schwefel vnd Pech vom Himmel herab vertilget Geneſ: 19.

Was begegnete Pharaoni / da die Kinder Jſrael durchs rote Meer gingen? Er muſte mit der Macht ſei - nes gantzen Koͤnigreichs darinn erſauffen / Exod: 14.

Was begegnete Jeruſalem / da die Apoſtel gen Pel - lam gingen? Es wurde der Erden gleich geſchleiffet.

Was begegnete vnſern Vaterlande Lewenbergk / da Herr Martin Seideman ſchlaffen ging? Jns exilium vnd elend muſten wir wandern.

Wer weiß was auff dieſes jungen Mannes todt er - folgen wird.

Derowegen O du Chriſtliches Hertz / dencke an ſein ende / dencke nicht das irgendt dem Vaterlande ein Vo - gel entflogen; Nein. Sondern ſein Seelſorger / ſein trewer Seelſorger iſt jhme entzogen worden. Derowe - gen ſo laß dirs eine anreitzung zu warer Buſſe / vnd Hertz - licher bekehrung zu GOtt ſein.

Wenn die Soldaten anfangen / an einem Hauſe die Thuͤren einzuſchlagen / die Balcken abzuſegen / die Daͤcher abzutragen. Je traun / da ſchlaͤget mans nicht in Wind / ſondern man koͤmpt gelauffen mit Gold vnd Silber / mit Geſchenck vnd Gaben / ja man fellet ſolchen Geſellen wol gar zu Fuſſe / die man ſonſt auſſer des Krieges ver - acht hette / zu ſtellen vnter vnſer Schafhunde Job 30. v. 1.

Nun / es ſchlagen die Soldaten nicht allein vn - ſere Haͤuſer ein / tragen Dach vnd Gemach ab; Sondern GOtt der HErr faͤhet auch wider an / die Saͤulen vnſer Stadt darnider zu reiſſen / fuͤrnehme gelehrte Leute weg zunehmen; Ja traun / ſollen wir nicht beſtuͤrtzt daruͤber werden; ſollen wir nicht auff die knie niederfallen vndC iijvns[22]vns mit dem erzoͤrneten Gott verſoͤhnen / daß Er vns wi - der gnedig vnd Barmhertzig werde. Ja freylich / aller - liebſte Chriſten / Es iſt die hoͤchſte nothdurfft.

Derowegen mein lieber frommer Chriſt / ermuntere dein Hertz / trag GOtt dem HErrn dieſe noth fuͤr: Bete fleiſſig / Pſal: 6. Ach HErr ſtraff vns doch nicht ſo in dei - nem Zorn / ꝛc. Pſal: 79. HErr wie lang wiltu ſo gar zuͤr - nen? Schuͤtte deinen grim̃ auff die Heyden / vnd auff die Koͤnigreiche die deinen Namen nicht anruffen. Ach halt im baw deinen Weinbergk den dir deine Rechte alhier bey vns gepflantzet hat; Erfrewe vns nun wider / nach dem du vns ſo lange plageſt / nach dem wir ſo lange Vn - recht leiden / vnd ſey vns freundlich / vnd foͤrdere das Werck deiner Haͤnde bey vns / ja das Werck deiner Haͤn - de wolſtu foͤrdern / Pſal: 90.

3.Zum dritten vnd letzten / So ſollen vnſere Lemberger dieſen Gedenck Ring auch anſtecken brauchen vnd tra - gen: Fidei imitatione, daß ſie ſeinem Glauben / vnd den Fruͤchten die auß ſeinem Glauben her gefloſſen / trewlich vnd fleiſſig nachfolgen; Denn alſo ſaget vnſer Text: Vnd folget jhren Glauben nach.