DIe Erſte iſt Termini certitas, das GOttLocus I. Termi - ni certi - tas. der HErr dem Menſchen gewiß ein Ziel geſtecket habe / daß er nicht uͤbergehen koͤnne. Allerliebſten Chriſten / man findet viel Leute in der Welt / die bilden jhnen ein / der Menſch ſey jrgend Fortunæpila, ein ſpielball des blinden Gluͤckes / daß das blinde Gluͤck vnd Vngluͤck mit jhm vmbgehen moͤge / wie es wolle; wie ſich denn die Creaturliebenden Weltkinder Sap: 2. c. verlauten: Ohn gefehr ſindt wir geboren worden / vnd ohn gefehr fahren wir wider dahin; als wenn wir nie geweſen weren. Denn das ſchnauben in vnſer Naſe iſt ein Rauch / vnd vnſer re - de iſt ein fuͤncklin reget / wenn daſſelbige verloſchen iſt / ſo iſt der Leib dahin wie eine Loderaſche / vnd der Geiſt zerfladert wie eine duͤnne Lufft. Aber nein / keines weges nicht. Der Menſch iſt nicht Fortunæ pila, ein ſpielball des blinden Gluͤckes; ſondern er iſt divinæ providentiæ Sphæra ein Werck von Gottes Allmacht vnd Verſoͤhnung regie - ret; Vnſere Jahre ſindt nicht anni fortuiti, plumps Jah - re / ſondern ſie ſindt anni numeri, Zahljahre / vnſere Tage ſindt dies numeri, Zahltage.

Sehet an die Spruͤche heiliger Goͤttlicher Schrifft; Vnſer Job ſaget: Er / der Menſch / hat ſeine beſtimbte Zeit / die Zahl ſeiner Monden ſtehet bey dir: Du haſt jhm ein Ziel geſtecket / daß wird er nicht uͤbergehen. Hie hoͤ - ren wir außdruͤcklich / daß vnſer Zeit ſey tempus menſura - tum, eine abgemeſſene Zeit / daß die Zahl vnſer Monden bey GOtt ſtehen / vnd Er ſie alle gezehlet hat. Salomon in ſeinem Prediger ſagt c. 3. Alles hat ſeine zeit / geboren werden hat ſeine zeit / ſterben hat ſeine zeit / als wolt er ſagen: Mit nichte gehet es alſo zu / wie jhnen die Men - ſchen einbilden / das es ohn gefehr geſchehe. Nein / Leben vnd ſterben ſtehet in der Hand des HErrn. Der HErr toͤdtet vnd macht lebendig / ſagetHanna SamuelisMut - ter 1. Sam: 2. Du HErre GOtt ſpricht Moſes im 90 Pſal:B ijderder du biſt vnſer Zuflucht fuͤr vnd fuͤr / der du biſt GOtt von Ewigkeit zu Ewigkeit / Du leſſeſt die Menſchen Kinder ſterben / vnd ſprichſt: Kom̃t wider jhr Menſchen Kinder. David ſagt Pſ: 31. Sortes noſtræ in manu Domini, HERR vnſer Zeit ſtehet in deinen Haͤnden / vnd Pſal: 139. Deine Augen ſahen mich / da ich noch vnbereitet war / vnd waren alle meine Tage auff dein Buch geſchrieben / die da werden ſolten; da derſelben keiner da war. Das iſt: Wie lange ich leben ſolte / wuſt du / ehe ich zu leben anfing / ſaget der Herr Lutherus. Darumb betet er auch Pſal: 39. HERR lehre doch michs (wenns ja die ander boͤſe Welt nicht lernen wil) das es ein ende mit mir haben muß / daß mein Leben ein Ziel hat / vnd ich da von muß.

Sehet an die Exempel heiliger Goͤttlicher Schrifft von Chriſto dem HErrn zeuget der Engel Dan: 7. daß er ſterben oder außgerottet werden ſolte / noch 62 Wochen; Zuvor hatte jhn weder Herodes in ſeinerKindheit Matt: 2. noch der Teuffel in der Wuͤſten Matt: 4. noch ſeine Lands Leute auff dem Berge / noch die Juden im Tempel Joh: 8. noch jrgendt eine andere macht toͤdten vnd vmbbringen koͤnnen; Da er aber wuſte / das die Stunde da war / vnd die macht der finſternuͤs verhanden / da iſt Er ſelber dem Tode entgegen gegangen.

Eliæ dem groſſen Wunder Propheten war ſeine Zeit beſtim̃et / wenn er gen Him̃el geholet werden ſolte 2. Reg: 2. zuvor konten jhm weder Achab noch Jeſabel / noch die Baalspfaffen nicht ein Haͤrlin kruͤmmen / Da aber die Zeit vnd Stunde kam / da gieng er uͤber den Jordan / vnd wardt mit fewrigem Roß vnd Wagen gen Himmel ge - holet.

Von dem lieben Job leſen wir außdruͤcklich / das GOtt der HERR dem boͤſen Feinde durchaus nicht ge - ſtatten wollen / daß er jhn an ſeinem leben angreiffen ſol - te Job: 2. denn Er wolte jhn noch lenger auff Erden ha -ben /ben / daß er ſich ſeines Vngluͤcks ein wenig wider er - getzen moͤchte.

Ein denckwuͤrdiges Exempel haben wir an den Kindern Iſrael in der Wuͤſten / weil ſie Gott den HErrn in die zehen mahl verſuchten / vnd ein mahl uͤber das an - der ergrimmeten; Da ſchwur GOtt der HErr bey ſeiner Seel / daß der Maͤnner keiner / die ſeine Herrligkeit in Egypten vnd in der Wuͤſten geſehen hatten / ins gelobte Landt kommen vnd gelangen ſolten / auch Moſes vnd Aaron ſelber nicht / ſondern ſie ſolten alle ſterben in der Wuͤſten Das heiſt ja / meine ich / ein Ziel geſtecket Im ge - gen theil aber weil Joſua vnd Caleb jhme trewlich nach - gefolget / vnd ein ander Geiſt in jhnen geweſen Deut: 1. ſo verhieß Er jhnen / daß Er ſie in das Land bringen wol - te / welches auch geſchehen / wie ſich hernach Caleb deſſen ruͤhmet joſ: 14. wenn er ſaget: Vnd nu ſihe / der HErr hat mich erleben laſſen / was Er vns geredet hat. Vnd iſt ſon - derlich ſehr nach dencklich; das alle die Faͤlle / die da ſchei - nen / als wenn ſie jrgendts plumpsweiſe vnd ohn gefehr geſchehen / alle Gott dem HErꝛn zugeſchrieben / vnd zuge - meſſen werden: Das ein Lew oder Beer einen Menſchen zerreiſt / wie jenen Mann / vnd die 42 Knaben zu Bethel / das einer im Kriege vmbkoͤmpt wie Hophni vnd Pinehas, Das einer im gedraͤnge des Volckes erdruͤcket wird / wie der Ritter zu Samaria 2. Reg: 7. das koͤmpt der Vernunfft als ein ploͤtzlicher vnd vnverſehener Fall fuͤr / der ohn alle verſehung Gottes geſchehe. Aber Gottes Wort beſa - get / es ſey vom HErrn geſchehen Deut: 19. wie denn auch ein außdruͤcklich Exempel geſetzet wirdt: Wenn eines Holtzhaͤwers Eiſen von dem ſtiele abfuͤhre / vnd einen Menſchen ertoͤdtete / ſo hette er / der HErr / jhn laſſen in ſeine Haͤnde (ohne gefehr) fallen. So ſterbe nun der Menſch zu Waſſer oder Lande / zu Krieges oder Friedes zeit / in der Jugend oder im Alter / auffmBette oder auffmB iijWege /Wege / geſchwinde oder langſam / zu geſunden oder vnge - ſunden zeiten / ſo beweiſen die Exempel / daß es ohne des HErrn Rath vnd Willen nicht geſchehe.

Sehet an andere documenta vnd nachrichtungen in der ſchrifft / Salomon der Hochweiſe Koͤnig ſaget Sap: 11. Du haſt alles geordnet mit Maß / Ziel vnd Gewichte. Hat nun Gott ſonſten alles geordnet mit Maß / Ziel vnd Gewichte; hat Er alles gezehlet / abgewogen vnd gemeſ - ſen? Je ſo wird er ja auch vnſer Leben gemeſſen / gewogen vnd gezehlethaben: Wie denn vom jungen Koͤnige Bel - ſazer außdruͤcklich ſtehet Dan: 5. Gott habe jhn in einer Wage gewogen / vnd zuleichte gefunden. Der HERR Chriſtus ſpricht Matth: 10. da Er von den Sperlingen re - det / wie keiner ohn den Willen Gottes auff die Erde falle. Nun aber ſind auch vnſere Haare auff dem Haͤupte gezehlet? Sindt nun vnſere Haare auff vnſerm Haͤupte gezehlet? Wie viel mehr werden vnſere Lebens tage ge - zehlet ſeyn. David ſpricht Pſal: 56. GOtt zehle ſeine thraͤ - nen / vnd faſſeſie in einen Sack; Zehlet nun GOtt vnſere thraͤnen / wie viel mehr wird Er vnſere Tage zehlen? Chriſtus ſpricht Matth: 6. Welcher vnter euch kan ſeiner laͤnge eine Ele zuſetzen / ꝛc. Miſſet nun GOtt der HErr alſo vnſere Leibes laͤnge abe / wie viel mehr wird Er vn - ſers Lebens laͤnge abmeſſen? David ſagt Pſal: 91. Er (ver - ſtehet GOtt der HErr) hat ſeinen Engeln befohlen uͤber dir / daß ſie dich auff den Haͤnden tragen; das du deinen Fuß nicht an einen Stein ſtoͤſſeſt. Sorget nun GOtt der HErr ſo fleiſſig fuͤr vnſere Fuͤſſe / daß wir ſie nicht jrgend an einen Vngluͤcksſtein anſtoſſen moͤchten; Je wie viel fleiſſiger wird Er fuͤr vnſer Leben ſorgen / das es ohne ſei - nen Willen nicht zerbrochen werde. Sehet auch das ei - nige Bild in der Natur an / David ſaget Pſal: 102. Meine Tage ſind wie ein Schatten. Was iſt nichtiger vnd hin - fluͤchtiger als ein Schatten / noch dennoch hat er ſeineLinienLinien vnd abgemeſſene groͤſſe. Alſo iſts auch mit vnſern Leben beſchaffen; So nichtig vnd hinfluͤchtig es iſt; ſo koͤſtlich iſt es doch in den Augen Gottes; daß Ers mit ſeiner Hand vmbſpannet vnd gantz genaw vmbſchrieben vnd vmbmeſſen hat. Ach allerliebſten Chriſten / behaltet euch dieſes zu einemHertzerquickendem Seelen troſt / Ach wie troͤſtlich iſts in allerley Creutz vnd Truͤbſal.

Troͤſtlich iſts in periculorum magnitudine, in groſſer Leib vnd Lebens gefahr. Keyſer / Koͤnige / Fuͤrſten vnd Herrn henget offt jhr Leib vnd Leben an einem Seide - nem Faden wegen vntrewer Diener / feindſeligen Nach - barn / rachgierigen Vnterthanen / ꝛc. Prediger muͤſſen offte mit Aaron in die gifftige Lufft gehen / andere haben ander gefahr / darein ſie ſich begeben muͤſſen. Aber ach wie troͤſtlich iſts / daß wir wiſſen / das vns weder Fewer noch Waſſer / weder Gifft / noch Zaubergeſchoß fuͤr der zeit / die vns GOtt beſtimmet / ſchaden kan. Et cum Fata volunt bina venena juvant, Wenn GOtt wil / ſo muß eine Gifft die ander freſſen / wie aus einer Hiſtorien beym Au - ſonio zuſehen / da ein Weib dem Manne vergeben wollen / vnd zweyerley Gifft zuſammen genom̃en / vnd doch nicht geſchadet hat.

Troͤſtlich iſts in præmaturâ noſtri noſtrorumq́; morte, wenn wir oder die vnſrigen ſo zeitlich davon muͤſſen. O laſt ſpotten wer da wil / es iſt Gottes Wille alſo: Was denn nu mein GOtt wil / das geſchehe allzeit / ſein Wille der iſt der beſte. Mein Zeit vnd Stunde iſt wenn GOtt wil / Ich ſchreib jhn nicht fuͤr Maß noch Ziel / Es ſind ge - zehlt all Haͤrlein mein / beyde groß vnd klein / faͤllt keines ohn den Willen ſein.

Troͤſtlich iſts in vitâ longiore, Wenn vns der Todt lange auſſen bleiben wil / wenn die Muͤller muͤſſig ſtehen / wenn ſich die Starcken kruͤmmen Eccleſ: 12. Wenn wir der Kinder ſpott / auch wol vnſer eigener Kinder verdrußwerden.werden. Nun hat GOtt vns das Ziel ſo weit hinaus ge - ſtecket / ſeine Stunde iſt noch nicht kommen joh: 2. Er weiß wol wenns am beſten iſt / Er braucht an vns kein arge liſt / daß ſolln wir Ihme vertrawen.

Troͤſtlich iſts in diuturno noſtrorum agone, Wenn wir mit vnſern Augen ſehen / wie die lieben vnſrigen dor - te in Gottes gewalt liegen / vnd weder ſterben noch ge - neſen koͤnnen. Denn wie GOtt bißweilen gar Hertzfrom - me Leute ploͤtzlich vnd vnverſehens hinweg nimpt / wie Jonathan im Kriege: Alſo leſt Er auch bißweilen manch frommes Hertze lange kreiſſen / wie Rahel in Kindes noͤ - then. Nun wir wiſſen es iſt Gottes ſchickung alſo: Gott hat jhnen Fingers ja Haares breit jhr leben abgemeſſen: dem gefelt es alſo.

Hie bildet Euch nun ein / als wenn dieſe ſeelige Fraw Buͤrgermeiſterin zu vns ſagte: O jhr meine liebe geleits Leute: in me convertite vultus. Sehet auff mich: Pſal: 90. Eine kleine Zeit iſt tauſend Jahr fuͤr GOtt / Das iſt ge - wißlich war / wie der geſtrige vergangene Tag; den nie - mand widerbringen mag / Vnd wie eine Nachtwache wird beſtelt / in Beſatzung oder zu Feld / Einen fuͤhrt man ab den andern an / der muß ſeine Zeit vnd Stunde ſtehn / darnach die Noth offtmals vorfelt: Alſo gehts auch auff dieſer Welt; Ein jeder hat ſein gewiß Ziel / wer Gottes Worten gleuben wil.

DIe andere Andacht / die dieſe vnſere ſeeli - ge Fraw Buͤrgermeiſterin in vnſern Hertzen er - wecken ſol; iſt Termini qualitas, was es denn fuͤr ein gelegenheit vnd beſchaffenheit habe mit dem Ziel / das GOtt der HErr dem Menſchen geſtecket hat. Allerliebſten Chriſten / wenn die Creaturliebenden Men - ſchen Kinder hoͤren vnd vernehmen; das jhnen GOtt der HErr ein Ziel geſtecket hat / daß ſie nicht uͤbergehen koͤnnen; ſo kommen vnd gerathen ſie in wunderſeltzamegedancken.gedancken. Einer ſpricht: Hat mir GOtt ein ſolch Ziel geſteckt / daß ich nicht uͤberſchreiten kan / Je was ſol ich denn viel Beten? Was ſol ich viel Artzney gebrauchen? Was ſol ich meiner Geſundheit viel ſchonen? Es kan mich doch wider GOtt nichts ſchuͤtzen noch helffen. Ein ander ſpricht: Hat mir GOtt ein ſolch gewiß Ziel ge - ſtecket / daß ich nicht uͤberſchreiten kan; ſo wil ichs kuͤhn gnug hienein wagen; Ich wil keine Ordnung halten in Peſtilentz zeiten / Ich wil mich mit jedermantapffer her - uͤmb ſchrauben / bin ich doch Eiſenfeſte biß auff das vn - widerruffliche Ziel daß mir GOtt geſtecket hat. Ja es bekuͤmmert ſich wol ein frommes Chriſtliches Hertz vnd gedencket / from̃er Gott: Gottes Wort ſpricht. Er der Menſch hat ſeine beſtimpte Zeit / die Zahl ſeiner Monden ſtehet bey dir. Du haſt jhm ein Ziel geſetzet / daß wird er nicht uͤbergehen; Wie hat es denn dem Koͤnige Hiſeia auff 15 Jahr weiter hinauff geſtecket vnd geruͤcket wer - den koͤnnen Eſai: 38. Wie bringen denn die bluttgierigen vnd falſchen jhr leben nicht zur helffte? Pſal: 55. Nun al - lerliebſten Chriſten / dieſen kummerhafftigen gedancken abzuhelffen / hat vns GOtt der HErr in ſeinem Wort auch wiſſen laſſen / was es fuͤr eine gelegenheit vnd be - ſchaffenheit mit dieſem Ziel habe.

Es iſt ſolch Ziel fuͤrnemlich dreyerley.

Erſtlich iſt terminus Gratiæ, das gnaden Ziel: Da hat GOtt der HErr den frommen vnd Gottfuͤrchti - gen lenger Leben verheiſſen Exod: 20. Du ſolt deinen Va - ter vnd deine Mutter ehren / auff das dirs wolgehe vnd lange lebeſt auff Erden 1. Cor: 2. Die Gottſeligkeit iſt zu allen dingen nuͤtze / vnd hat die Verheiſſung dieſes vnd des zukuͤnfftigen Lebens: Grawe Haar ſind eine Kron der ehren / vnd werden auff dem Wege der Gerechtig - keit gefunden.

Darnach iſt terminus Iræ, ein Zorn Ziel: DaCwilwil GOtt der HERR die Gottloſen nicht lenger leben laſſen auff Erden Pſal: 55. Die bluttgierigen vnd falſchen ſollen jhr leben nicht zur helffte bringen; Die Jahre der Gottloſen vergehen Proverb: 28. Wer Vater vnd Mutter flucht / des Leuchte ſol verleſchen mitten in der finſternis.

Zum dritten iſt terminus Gloriæ, das Ehren - Ziel / da richtet GOtt der HErr nicht nach der Regel / ſondern nach ſeinen Ehren / vnd leſſet die frommen kurtz / die Gottloſen aber lange leben / wie an den hundertjaͤh - rigen Knaben zu Eſaiæ zeiten 65 c. vnd an den alten Narren zu der keuſchen Suſannæ zeiten zu ſehen. Hier - auß erſcheinet nun Sonnen klar / das Freylich am Mittel gebrauch / am Gebet / an Artzney / an gutter Ordnung vnd andern viel gelegen: das man nicht am Zorn Ziel: ſon - dern am Gnaden vnd EhrenZiel verſterben moͤge: Zum Exempel: Hette David das Mittel der flucht nicht ge - braucht / vnd were zu Kegila geblieben / ſo hette jhn Saul alda erwiſcht vnd vmbs leben gebracht / wie der Text außdruͤcklich ſaget 1. Sam: 23. Ja ſie werden dich uͤber - geben. Im gegentheil weren die Kinder Iſrael nicht im Haͤuſern blieben / ſondern weren herauß gegangen / ſo het - te ſie der WuͤrgEngel vmbbracht; wie davon Exod: 12. zu leſen. Alſo noch heute zu Tage / da hat vns GOtt der HErr auch vnſer Ziel geſtecket / daß wir nicht uͤberſchrei - ten koͤnnen: Er hats aber nicht gethan ohn anſehen der Mittel / des lieben Gebets / der Artzney / der Beſcheiden - heit / der Gottes furcht / Trew: Wer ſo wagehaͤlſicht ſein wil / vnd alle Mittel inWind ſchlagen vnd verachten / der iſt zum ZornZiel geordnet: da er des Gnaden vnd Ehren Ziel wol erreichen koͤnte. Bedencket bey euch ſelber: Wir wiſſen alle mit einander gar wol / daß vns Gott bißzu vn - ſerm Ziel beym leben erhalten wil / vnd kan: Vnd nichts deſto weniger brauchen wir das Mittel des eſſens vnd trinckens / warumb wollen wir denn andere Mittel alsGebet /Gebet / Artzney / gutte Ordnung / maͤſſigkeit vnd der - gleichen auch nicht gebrauchen? Hat vns nicht GOtt der HErr auch ein Ziel im Reichthumb geſetzet / wie reich wir auff dieſer Welt werden ſollen: noch ſparen wir kei - ne muͤhe vnd fleiß: ſondern verſuchen alle Mittel vnd Wege / wie wir ein bißlein Brodt zu dem andern bringen moͤgen: Vrſach: das Ziel iſt vns verborgen: wir wiſſen nicht / wie reich vns GOtt der HERR auff dieſer Welt hat haben wollen: Waruͤmb wollen wir nicht auch auff andere Mittel bedacht ſein: weil vns vnſer lebens Ziel verborgen / vnd nicht wiſſen / wie weit es vns hinauß ge - ſtecket iſt.

Ja / ſpricht ein Chriſtliches Hertz alhier: So hoͤre ich aber gleichwol: das ich mir mein leben verkuͤrtzen kan / wenn ich die Mittel verſeume vnd verachte: Ein ander aber kans jhme durchs Gebet mit Koͤnige Hißkia ver - laͤngern? Wie iſt denn nun das Ziel ſo gewiß? Hoͤre mein Freund: Wer biſtu der du die geheimnuͤs der Ewigkeit ſo gnaw erforſchen wilt: Beſſer were es bey den hellen vnd klaren worten geblieben / daß das Ziel gewiß ſey / vnd das dennoch GOtt der HErr vnſer froͤmmigkeit / oder doch vns vnſer beſtes darunter angeſehen / wenn er vns ſolch Ziel geſtecket / oder viel mehr wenn er vns ſolch Ziel in ſeiner Ewigkeit (darinnen nichts vergangenes oder zukuͤnfftiges iſt) ſtecket. Weil vnſer Text vom Monden ſaget / ſo wollen wirs alſo erwegen: Wir ſehen den Mon - den an / vnd wiſſen doch nicht gantz genaw verum locum, vnter welchem Grad vnd Minut des Himmels er ſtehe. Vrſach: Wir ſtehen auff der Erdkugel / vnd nicht in den innerſten Schoß der Erden: was wollen wir denn die hohen Himliſchen ſachen erforſchen vnd ergruͤnden / Je - ne kan ein einfaͤltiger Leye nicht faſſen: wie viel ſchwe - rer werden jhm dieſe ſein. Wer es aber faſſen kan / der neh - me es alſo fuͤr: Gleich wie der Monde zweyerley oͤrterC ijhat /hat / locum apparentem, & locum verum, einen Ort / da er zu ſtehen ſcheinet / vnd einen / da er warhafftig ſtehet. Alſo hat auch der Menſch ſeines Lebens zweyerley termi - nos oder Ziele.

Der erſte iſt Terminus apparens, ein ſchein Ziel. Vnd dieſes koͤmpt her ex angulo naturæ, wenn Er die natuͤr - lichen vrſachen / als gutte ſtarcke Gliedmaſſen / Artzney / vnd anders anſehen / oder ex angulo gratiæ & iræ, wenn wir die allgemeinen verheiſſungen oder draͤwungen Gottes anſehen. Dieſes Ziel kan nun wol verruͤcket werden / wie - wol es offte nicht verruͤcket wird. Zum Exempel: GOtt wolte die Niniviter vertilgen Jon: 1. Er wolte Moſen / Aaronem Exod: 4. vnd Hißkiam Eſai: 38. toͤdten. Das war terminus apparens, das ſchein Ziel. Denn GOtt der HErr hatte jhme vorbehalten; wofern ſie wuͤrden ware ernſte Buſſe thun / vnd ſich von Hertzen zu GOtt bekeh - ren: ſo wolte Er ſie nicht toͤdten vnd vertilgen; vnd weil auch jhre Buſſe erfolgete / ward jhr Ziel verruͤcket. Her - gegen aber ſagte GOtt der HERR / Er wolte Davids Soͤhnlein toͤdten / daß er mit der Bethſeba gezeuget hat - te / vnd nicht beym leben laſſen: das war auch terminus apparens, ein ſchein Ziel / Es war aber nicht verruͤcket. Denn GOtt hatte es ohn alles bedinge alſo berathſchla - get vnd beſchloſſen 2. Sam: 12.

Der ander iſt Terminus verus, das rechte warhaffti - ge Ziel / das bleibet allezeit vnverruͤcket / vnd koͤmpt doch auch offte mit dem vorigen uͤber ein: Alleine dieſes hat vns GOtt verborgen / vnd wil nur daß wir vns nach dem erſten richten ſollen. Iſt jemand damit nicht zu frieden / vnd wil kluͤger ſein als GOtt / der wird in ſeinen eitelen gedancken zu ſchanden werden. Wenn nun ein Chriſtli - ches Hertze das bedencket; das es eine ſolche gelegenheit vnd beſchaſfenheit mit ſeinem lebens Ziel hat: ſo braucht er dieſe beſcheidenheit / vnd ſpricht: Nun mein lieberGott;Gott; Mein Ziel haſtu mir je gewiß geſtecket. Aber doch leſtu michs nicht wiſſen. Es iſt mir aber jtzund ein Bothe des todes zugeſchicket worden: Ich bin kranck: Ich muß in gifftige Lufft gehen: Ich bin in Leib vnd Lebens ge - fahr: da iſt terminus apparens, mein Ziel gleichſam fuͤr meinen Augen / vnd weil es wol kan ſein / daß es eben das rechte Ziel mitte iſt / ſo wil ich from̃ vnd Gottfuͤrchtig ſein / fleiſſig beten / vnd in deinen Wegen wandeln: Oder im gegentheil: Ich bin friſch vnd geſund: Lieber GOtt / Ich befinde mich gar wol / mir mangelt nichts: Es ſchei - net als wenn mein Lebens Ziel noch ferne von mir ſey. Aber weil es iſt terminus apparens, das ſchein Zeil / vnd kan fehlen / ſo wil Ich nicht darauff kuͤhne ſein: du moͤch - teſt mich mit dem rechten Ziel uͤbereilen / wenn Ich am ſicherſten were / Ich moͤchte das ZornZiel verurſachen / da Ich wol das Gnaden vnd EhrenZiel erreichen koͤnte.

Vnd ſolche beſcheidenheit hat auch gebraucht dieſeAppli - catio. vnſere ſeelige Fraw Buͤrgermeiſterin / Ob ſie gleich friſch vnd geſund / zu Wege vnd Stege gehen / vnd das jhre wol verrichten koͤnnen / vnd alſo das anſehen gehabt / als wenn jhr Gott jhr lebens Ziel noch weit hinauß geſtecket hette: So hat Sie doch bey ſich bedacht; O es iſt termi - nus apparens, ein ſchein Ziel / es kan fehlen / du darffſt dich nicht darauff verlaſſen. Iſt derowegen mit jhrem lieben Herrn / Kindern vnd Geſinde fleiſſig zur Kirchen gegan - gen / mit hoͤchſter reverentz vnd ehrerbietung Gottes Wort angehoͤret / die Hochwuͤrdigen Sacramenta ge - brauchet / jhre liebe Kinder zum Gebet / vnd zur Schulen gehalten / zu Hauſe fleiſſig mit jhnen fuͤr Tiſche vnd nach Tiſche gebetet vnd geſungen / ſonderlich: Laß mich dein ſein vnd bleiben / du trewer GOtt vnd HErr / Von dir laß mich nicht treiben / halt mich bey reiner Lehr: O HErr laß mich nicht wancken / gieb mir beſtaͤndigkeit / Dafuͤr wil ich dir dancken / in alle Ewigkeit. Daruͤmb / da jhrC iijGOttGOtt mit dem rechten Ziel kommen / hat Sie ſich deſto froͤlicher / vnd getroͤſter auffmachen / vnd dieſe Welt ge - ſegnen koͤnnen. Wie denn jhre Spruͤchlein lauten Pſal: 31. HErr JEſu Chriſte in deine Haͤnde ꝛc. Pſal: 73. HErr / wenn ich nur dich habe ꝛc. Das ewige Gutt / macht rech - ten Muth ꝛc. O wolte GOtt / vnd abermal wolte Gott: daß wir alle ſolche beſcheidenheit gebraucheten / wie wol wuͤrden wir vnſer Seele vorgeſtanden haben.