Zum Erſten von den Centnern.

BElangend die Centner / die der HERR ſeinen Knechten außtheilet / die werden von den Alten Lehrern auff vngleiche weiſe gedeutet. Lutherus ſagt / Die Centner ſind daß befohlene Gottes Wort. Wir koͤnnen es ohne jemands nachtheil / Erſtlich von den Emptern vnd Staͤnden vnter den Menſchen / Darnach auch von den Ga - ben / die zu verrichtung eines jeden Standes nutz vnd noͤtig ſein / gar wol verſtehen. Denn ſo jemand zum Lehrampt in der Chriſtlichen gemeine beruffen wird / deme wird von dem Herrn ein Centner gegeben / vnd vertrawet / nemlich das Wort Gottes / durch welches jhme Gott der Herr allhier auff Erden ein Volck ſamlet / welches jhn erkennet / anruffet / lobet vnd preiſet / hie zeitlich vnd dort ewiglich / wie Eſaiæ 51. Cap. Gott der Herr ſagt: Jch lege mein Wort in deinen Mund / vnd bedecke dich vnder dem Schat - ten meiner Hende / Auff das ich den Him̃el pflan - tze / Vnd die Erde gruͤnde / vnd zu Zion ſpreche / Du biſt mein Volck: Vnd im Propheten Malachia 2〈…〉〈…〉 Cap. Des Prieſters lippen ſollen die Lehre bewa - ren / das man auß ſeinem Munde das Geſetze ſu - che / Deñ Er iſt ein Engel des HERrn Zebaoth. Das iſt nu ein Centner / welchen Gott ſeinen Dienern denLehrern[11]Lehrern in der Chriſtlichen Kirchen gibt / nemlich ein Buch / die Bibel oder das Wort Gottes / darauß ſie jhre Zuhoͤrer vnterrichten ſollen / wie ſie recht gleuben / Gottſelig leben / Gotte dienen vnd ewig ſelig werden koͤnnen.

Alſo gibt dieſer HERR der weltlichen O - brigkeit jhren Centner / das iſt ein Schwerd / eine euſſerliche Macht / Gewalt / Anſehen vnd Zwang / dadurch die frommen geſchuͤtzt / gehandhabt vnd belohnet / Die boͤſen aber zu ruͤck gehalten vnd ernſtlich geſtrafft werden. Von dieſem Centner ſtehet geſchrieben zun Roͤmern 13. Cap. Die Gewalti - gen ſind nicht den gutten Wercken / ſondern den boͤſen zu fuͤrchten. Wiltu dich aber nicht fuͤrchten fuͤr der Obrigkeit / ſo thue guttes / ſo wirſtu lob von derſelben haben / Denn ſie iſt Gottes Die - nerin / dir zu gut. Thuſtu aber boͤſes / ſo fuͤrchte dich / Dann ſie tregt das Schwerd nicht vmb ſonſt. Sie iſt Gottes Dienerin / eine Racherin zur ſtraffe vber den / der boͤſes thut. Wie auch in der Er - ſten Epiſtel Sanct Petri 2. Cap. von ſolchem Centner ge - ſchrieben ſtehet.

Es bedencket auch dieſer HERR den Hauß - Standt mit einem Centner / nemlich mit einem Pflug / das iſt / allerley Arbeit / Nahrung vnd Handthierung / damit ſie ſich ſampt den jhren ehrlich Ernehren / auch den Lehr vnnd WehrStand darvon vnterhalten koͤnnen / wie Gott im Er - ſten Buch Moſis 3. Cap. ſagt: Jm ſchweiß deines Angeſichts ſoltu dein Brot eſſen / biß das du wi - der zur Erden werdeſt / davon du genommen biſt. vnd im 128. Pſalm. Du wirſt dich nehren deinerB ijhende[12]hende Arbeit / etc. Von vnterhaltung aber des Lehr vnd WehrStandes findet man 1. Corinth. vnd Rom. 13. wei - tern bericht.

Darnach koͤnnen auch ſolche Centner ver - ſtanden werden von den Gaben / die da zu verrichtung eines jedern Standes nutz vnd noͤtig ſein / denſelben Chriſtlich vnd Gottſelig / ehrlich / nutzlich / vnd wol zufuͤhren. Soll ein Leh - rer in der Kirchen mit nutz vnd frucht Predigen / ſo bedarff Er einen Centner darzu / das er (1. Timoth. 3) Lehrhafftig ſey / Das ein Weltlicher Regent im Lande oder in der Stadt wol regiere / Das die Haußhaltung wol gefuͤhret werde / das ſind alles Centner / die der Herr ſeinen Knechten außtheilet / Joan. 15. Jch habe euch erwehlet vnd geſetzt / das jhr hingehet vnd frucht bringet / vnd ewre frucht bleibe. Pſal. 127. Wo der HERR nicht das Hauß bawet / etc.

Es koͤnnen auch die Centner wol verſtanden werden von den dreyerley Bonis oder Guͤttern / Als da erſt - lich ſind Bona Animi, die Guͤtter des Gemuͤths / als Weiß - heit / Verſtand / Geſchickligkeit. Darnach Bona Corporis, die Guͤter des Leibs / das einer ſchoͤn / ſtarck / geſund von leibe iſt. Vnd endlich Bona Fortunæ, die Guͤter des Gluͤcks / das einer reich / anſehenlich / maͤchtig iſt / vnd dergleichen. Aber wir haben ſo viel zeit nicht / das wir jetzt davon weiter reden koͤndten.

Durch die vngleiche Zahl der Centner / da einem fuͤnff / dem andern zween / dem dritten nur einer gege - ben wird / wird bedeutet die vngleicheit der Staͤnde vnd Em - pter / wie auch der Gaben / ſo zu ſolchen aͤmptern gehoͤren / derer denn einem mehr als dem andern nach des Herrn gefallen zugetheilet vnd gegeben werden 1. Cor. 12.

Wil nun jemand wiſſen / woher es doch komme / das eine[r]iſt im HaußStande / vnd mit dem Pfluge vmbgehet / allerley arbeit / handthierung vnd nahrung treibet / Der ander im Re - gierſtande iſt / das Schwerd in ſeiner macht vnd gewalt fuͤh - ret / vber der Menſchen leib / gut vnd blut zugebieten hat / Der dritte in der Kirchen / das Buch / die Bibel zur hand nimet / darauß ſeine Zuhoͤrer vnterrichtet / lehret / wie ſie glauben vnd leben ſollen / troͤſtet / warnet / drewet / vermanet / ſtraffet / etc. Jtem / das einer in ſeinem Stande vnd Beruff mehr Gaben hat / auch damit mehr nutz ſchaffet als ein ander / der lehrne es hie von dem Herrn Chriſto auß ſeinem Munde / der gibt dir dieſen beſcheid: Die Centner gehoͤren alle einem Herrn / welcher iſt Gott der Allmechtige / der theilet ſolche Centner vnter ſeine Knechte / vnd ſetzet einen in dieſen / jenen in einen andern Stand / giebet auch einem jeden zu ſeinem Ampt vnd Stande ſeine herꝛliche Gaben / die jhme noͤtig ſein daſſelbe Ampt deſto beſſer vnd mit groͤſſerm nutz zufuͤhren / ob wol ei - ner mehr Centner als der ander bekoͤmmet. Die Knechte ha - ben von ſich ſelbs nichts / Was ſie aber haben vnd vermoͤgen / es ſey viel oder wenig / das haben ſie alles von dieſem Herrn[.]Daher S. Jacob 1. Cap. ſagt: Alle gutte gabe vnd alle volkommene gabe / koͤmmet von oben herab von dem Vater des Liechts. Sanct Paulus aber 1. Corinth. 4. lehret nicht allein eben dieſes / ſondern zeiget auch an / worzu vns ſolche lehre dienen ſolle / Nemlich / Das ſich nicht einer wider den andern vmb jemands (oder auch vmb etwas) willen auffblaſe. Denn ſpricht Er / Wer hat dich fuͤrgezogen? Was haſtu aber / das du nicht em - pfangen haſt? So du es aber empfangen haſt / was ruͤhmeſtu dich denn / als der es nicht empfan - gen hette? Derhalben es ſey nu einer in welchem Stan -B iijde er[14]de er woll[e]/ er habe viel oder wenig Centner empfangen / ſo ſoll er es alles dem Herrn zuſchreiben / vnd mit S. Paulo ſagen 1. Corinth. 15. Cap. Von Gottes Gnaden bin ich das ich bin / vnd ſeine gnade an mir iſt nicht vergeblich geweſen. Alſo thun groſſe Herꝛen in jhren Edieten / die ſie mit dieſen worten anfangen: Wir N. N. Von Gottes Gnaden / etc. Vnd were zu wuͤndſchen / wie ſie es in jhren Briefen ſchreiben / das ſie es auch allezeit in jhren hertzen betrachteten. Aber es leſt ſich zu zeiten anſehen / das es von etlichen gar wenig in acht genommen werde.

Zum andern / Wie die Knechte mit den empfan - genen Centnern ſein vmbgangen.

NAchdem wir vernommen / Was durch die Centner gemeinet / Auch wie der Herr ſolche Cent - ner ſeinen Knechten reichlich einem jeden nach ſeinem vermoͤgen außgetheilet / damit zu handlen vnd zugewinnen / hoͤren wir weiter / das zwar die Knechte alle die jhnen zuge - ordnete Centner angenommen / der ſo wol der wenig / als der viel oder der mehr empfangen hatte. Welches zwar wolge - than iſt / ſonderlich von deme / der da wenig empfangen / aber gleichwol damit zufrieden geweſt / vnd wider den Herrn nicht gemurꝛet noch vngeduͤldig geweſen iſt / laut der verma - nung Syrach 3. Cap. Mein Kind / bleib gerne im nidrigen Stande: Jtem / Stehe nicht nach ho - hem Stande. Aber im handel mit ſolchen Centnern fin - det ſich eine groſſe vngleicheit vnter den Knechten / Denn der / welcher 5. Centner empfangen hatte / iſt vnverdroſſen / trew vnd fleiſſig geweſen / vnd alſo damit gehandelt / das er mit dieſen fuͤnff Centnern andere fuͤnff Centner ſeinem Herꝛnzu gute[15]zu gute erworben hat. Dergleichen hat gethan der ander / der mit den zween Centnern auch andere zwee Centner gewon - nen hat. Der dritte / dem nur Ein Centner vertrawet war / iſt ein fauler ſchalck / wil jhme mit dem vertraweten Centner kei - ne vnruhe machen / gehet hin / macht eine Grube in die Erde / verſcharret vnd verwaret den Centner aldar / vnd leſt ſich be - duͤncken / der Herr muͤſſe wol mit jhme zufrieden ſein / vnd noch darzu dancken / wenn er nur das ſeine widerbekommet / was er jhme vertrawet hatte.

Hie ſiehet man als in einem Spiegel / wie es in der Welt auch vnter den Chriſten zugehe / Nemlich / das zu allen zeiten leute gefunden werden / die jhres Standes vnd Gaben boͤßlich mißbrauchen / einer durch faulheit / wie dieſer ſchalcksknecht / Der ander durch ſchwelgen / wie der vntrewe Haußhalter Luc. 16. Cap. Der dritte durch haddern vnd zancken / wie die hadderkatze Luc. 12. Cap. vnd ſo fort / einer ſo / der ander anders / Vber welche Gott ſelbs klaget im Pro - pheten Eſaia 56: Alle jhre Waͤchter ſind blind / ſie wiſſen alle nichts / ſtumme Hunde ſind ſie / die nicht ſtraffen koͤnnen / ſind faul / ligen vnd ſchlaf - fen gerne / Es ſind aber ſtarcke hunde von leibe / die nimmer ſatt werden koͤnnen. Vnd im Prophe - ten Amos 5. Cap. Hoͤret jhr vom hauſe Jſrael / die jhr das Recht in Wermut verkeret / vnd die Ge - rechtigkeit zu boden ſtoſſet. Von welchen man klagen vnd ſagen mag: Si cares nummis / ſo hilffts nicht / das du from̃ biſt / Si dederis ſummis, ſo machen ſie gerad / was krum̃ iſt. Jtem / die faulen Haußwirthe vnd Haußwirtinnen / da - von Salomo Proverb. 6. Cap. Wie lange ligſtu fau - ler / etc.

Dieß wird Vns nu an dem Faulen Knecht fůrgehalten zu einer warnung / das wir vnſeren vertraweten Centner nicht in die Erde vergraben / wie er gethan hat / ſon - dern nach dem Exempel der beyden trewen Knechte vnſere Centner alſo anlegen / das wir vnſerm Herrn viel damit gewinnen / vnd als trewe Haußhalter erfunden werden / wie Sanct Paulus 1. Corinth. 4. ſagt: Man ſuchet nicht mehr an den Haußhaltern / denn das ſie trew er - funden werden. Dazu denn gehoͤret / das einer wiſſe / wie er mit einem dinge ſolle vmbgehen / vnd das er darinnen auch keinen fleiß ſpare. Hieher gehoͤret / was der Apoſtel 2. Ti - moth. 2. ſchreibt: Befleiſſe dich Gott zuerzeigen ei - nen rechtſchaffenen vnd vnſtraͤfflichen Arbeiter / der da recht theile das Wort Gottes / Da denn Sanct Paulus zu ruͤck ſiehet in das Alle Teſtament / Wenn man von Rind / Schaf oder Ziegen ein Brand / Danck oder Suͤndopffer thun wolte / ſo muſte ſolches nicht wie es nur iſt zerhackt oder zermetzget werden / ſondern es muſte ordentlich nach dem befehl Gottes geſchlachtet / in ſtuͤck zerhawen vnd ein jegliches an ſeinen orth zertheilet werden. Alſo ſoll ein Lehrer in der Kirchen wiſſen Geſetz vnd Evangelium zu vn - terſcheiden / nicht eins ins ander / das hundert ins tauſend mengen / ſondern ein jedes an ſeinem orth vnd zu rechter zeit gebrauchen vnd dem Volck recht fuͤrtragen / wie auch der Herr Chriſtus ſagt Matth. 13. Ein jeglicher Schrifft - gelerter zum Himmelreich gelehrt / iſt gleich ei - nem Haußvater / der auß ſeinem Schatz newes vnd altes herfuͤr tregt. Alſo auch von der Weltlichen Obrigkeit vnd dem HaußStande zureden / denen ſind auch dieſe beyde ſtuͤcke von noͤten.

Das dritte Stuͤck iſt von der Rechnung / die der HERR mit dieſen ſeinen Knechten gehalten hat.

ES war zwar der HERR dieſer Knechte ferne vber land gezogen / aber Er hat ſich gleich wol wider zur ſtelle funden. So iſt Er auch eine lange zeit außgeweſt / Er iſt aber gleichwol nicht gar auſſen blieben / ſon - dern koͤmmet wider / vnd helt rechenſchafft mit ſeinen Knech - ten. Da denn die zween getrewe Knechte reichlich vnd herꝛ - lich belohnet / der vngetrewe Knecht aber ernſtlich vnd ſchreck - lich geſtraffet wird.

Erſtlich muß der / welcher am meiſten em - pfangen hat / rechnung thun / vnd als er mit ſeiner Rechnung wol beſtehet / ſintemal er noch ſo viel einbringet / als er em - pfangen / vnd ſeinem Herrn Zehen Centner fuͤr Fuͤnff zu - ſtellet / ſo wird er auch reichlich vnd ehrlich belohnet. Denn ſo ſpricht ſein Herr zu jhm: Ey du frommer vnd ge - trewer Knecht / du biſt vber wenig trew geweſt / Jch wil dich vber viel ſetzen / Gehe ein zu deines HERRN frewde. Wenn wir dieſe wort ſolten nach notdurfft erkleren / wo wolten wir Wort vnd zeit gnug darzu nemen? Denn das ſind verba admirationis, lætitiæ, amo - ris, honoris & præmij, Solche wort / mit welchen der Herr ſich verwundert vnd frewet vber der froͤmmigkeit vnd trewe dieſes Knechts / jhn deßwegen hertzlich liebet / vnd oͤffentlich ein ehrlich zeugnuß gibt / vnd jhn zugleich herꝛlich belohnet / Erſtlich mit groſſer Ehr / das er jhn oͤffentlich ruͤhmet vnd lo - bet / das er ein frommer vnd getrewer Knecht ſey / Ey du frommer vnd getrewer Knecht / Zum andern mit groſ - ſem reichthumb / Du biſt vber wenig getrew geweſt /CJch[18]Jch wil dich vber viel ſetzen / Zum dritten mit herꝛli - cher frewde / Gehe ein zu deines HERRN frewde. Das ſolte fuͤrwar einen auffmuntern / frewdig vnd luſtig machen / ſein befohlen Ampt trewlich vnd fleiſſig zuverrichten.

Alſo iſts auch mit dem Andern / der nur zween Centner empfangen hatte / ergangen / Der Herr iſt wol mit jhme zu frieden / ob er ſchon nicht ſo viel gewonnen als der Erſte / Deñ jhme war auch nicht ſo viel vnter handen gegeben / als dem Erſten. Dem gibt der Herr auch ſein herꝛlichen Lohn / Ey du frommer vnd getrewer Knecht / du biſt vber wenigem getrew geweſt / Jch wil dich vber viel ſe - tzen / Gehe ein zu deines HERRN frewde.

Mit dem Dritten / der nur Einen Centner empfangen hatte / wird eine ſolche Rechnung gehalten / Weil er zuſtehet / das er Einen Centner empfangen / aber nichts da - mit geſchaffet / ſondern in die Erden verſcharret / vnd ſolches noch entſchuldigen will / als were es recht vnd wol gethan / bekoͤmmet er ſein Lohn / wie er werth iſt / Vnd wird Erſtlich oͤffentlich zu ſchanden gemacht / vnd fuͤr einen Schalck / fau - len vnd vnnuͤtzen Knecht geſcholten / Du Schalck / Fau - ler vnd Vnnuͤtzer Knecht / vnd hilfft da keine außrede. Ach / das ſein verba indignationis, ignominiæ & luctus, durch welche Wort der Herr ſein zorniges hertz wider die - ſen Knecht an den tag gibet / vnd die wolverdiente ſtraffe jhme zuerkennet. Denn er leſt jhme den vertraweten Centner nemen / als der nicht werth iſt / das er denſelben empfangen / viel weniger / das er den lenger behalten ſolte / vnd leſſet den einem andern geben / der denſelben weiß beſſer anzulegen vnd zugebrauchen. Zum dritten wird der Knecht auff ernſten befehl des Herrn in die finſternus hinauß geworffen / da wird ſein heulen vnd Zaͤhnklappern. Das iſt ſein Lohn ge - weſt. Wie vns nu die guͤte des Herrn an den zween trewen[19] Knechten / wie gehoͤret / bewieſen / billich ſolte reitzen vnd locken vnſer Ampt vnd Gaben wol zugebrauchen: Alſo ſolte vns viel mehr der ernſt wider den faulen vnd vnnuͤtzen Knecht noͤ - tigen vnd gleich mit gewalt treiben / das wir vns wol an jhme ſpiegelten / vnd es beſſer machten / als ers gemacht hat. Denn ſo die verdammet werden / die des Herrn guͤter nicht vmb - bracht / ſondern nur allein nichts damit geworben haben / was wird denn denen widerfahren / die ſolche ſchendlich durchbrin - gen? wie Auguſtinus ſagt Pſal. 38.

Vnd diß ſey von den drey fuͤrgenommenen Puncten genug geſagt / Da wir Erſtlich vernom̃en / das durch die Centner eines jedern Ampt vnd darzu gehoͤrige Gaben / wie auch allerley Gaben des Gemuͤts / Gebluͤts vnd Gutts verſtanden werden.

Zum andern / das ſolche Gaben in allen Staͤnden ge - meinlich gemißbrauchet werden.

Zum dritten / das der rechte brauch reichlich belohnet / dar - gegen der Mißbrauch ernſtlich geſtraffet werde.