Folget die erklerung.

JM text ſtehet zum anfang des berichts im 1. verſi - ckel: Sara ward hundert ſiben vnnd zwentzig jahr alt vnd ſtarb: das iſt kein wunder / daß von Sara berichtet wird / ſie ſey geſtor - ben / wiſſende daß alle menſchen ſterblich ſeyndt. Aber das iſt ein wunder / daß biß ſo lang / wie die jahrzahl genennet / dieſe alte faſt betagte mutter gelebet / vnd alsdan erſtlich aus dieſem leben vnd welt gefordert worden. Sintemal viel tauſendt ſterben / die nicht die helffte dieſes ſo hohen alters erreichen / auch wol viel / die nit eine ſolche betagte perſchon mit jhren augen iewan geſehen ha - ben / ſolte auch wol muͤhſam kommen eine in dieſer / gleichwol volckreicher ſtadt / ſo alte perſchon zufinden / vnd auß zu ſuchen / es ſey entweder auß maͤn-oder auch weiblichen Bildern. Schon zu Moſis zeiten / iſt das uͤber das gemeine ziel des alters / vnnd lebens geweſen / das ſiebenzigſte vnd zum hoͤchſten das achzigſte jahr / wie zunemen auß dem 90. ψ. im 10. ꝟſ. deſſen tichter ſelbſt Moſe geweſen / wie die uͤberſchrifft deſſelbigen nachrichtung gie - bet. Zwar in den erſten jahren der welt / vor eingeriſſener Suͤnd - flut / ſind die Leut faſt wunderſam langlebig geweſen / als Adam der erſte menſch / vñ Methuſalem der elteſte vnter allen menſchẽ kindern / davon man weiß auß zeugnuß des 5. capit. im 1. Moſ. Aber nach ſelbiger / weiß man von keinen zuſagen / denen es ſo lang der todt geſpahret ſolt haben / als den altvaͤtern / diedannen[9]dannenhero jhres alters vnnd langen lebens wegen / dieſen na - men empfangen haben. Sara / wie wir hoͤren alhie / iſt hundert vnd fieben zwentzig jahr alt worden / derer einiger frawens per - ſchon / wie ichs gemercket vnd enthalten habe / in der ſchrifft jhre lebens jahr vnd zeit iſt auffgezeichnet worden. Abraham Saræ Herr iſt 48. jahr aͤlter worden / wie außzurechnen auß dem be - richt 1. Moſ .. 25. ꝟ. 8. vnnd wird deßwegen noch ehe er dieſe Jahr erlebet / alt vnd wolbetaget genennet 1. Moſ. 24. ꝟ. 5. Moſes ſelbſten iſt ja wol hundert vnd zwentzig jahr alt worden / aber das iſt wie ein wunder zu ende der buͤcher Moſis im 5. im 34. capit. im 7. ꝟſ. beygezeichnet / vnnd daß bey ſo hohem alter jhm die augen nicht ſind verdunckelt geweſen / vnd ſeine geſtalt nicht verfallen. Da vmb ſeine zeit / wie oben auß ſeinen worten ſchon eingefuͤhrt / die andern im achzigſten jahr gar haben davon muͤſſen. Vnd was heutte zu tage ſich begiebet / das iſt offenbahr vnd vnnoͤtig hie einzufuͤhren / wie bewuſt / daß vnter tauſenden kaum einer oder der ander / das 50. oder ſechzigſte jahr errei - chet / er muß noch wol ehe davon. Welche betrachtung vnd wiſ - ſenſchafft / den neidt vnd das gremen mag abſtillen / ſo einer da - mit moͤcht angefallen werden / in anſchawung der grawhaupti - gen graͤiſſen / oder erinnerung / wie den alten vorzeiten ſo wol ge - ſchehen / die ſo lang dieſer welt / vnd deroſelben zierde gebrauchen haben koͤnnen / welches leicht ein ſcheles auge erregen mag vnd vnnoͤtigen verdruß des hertzens / zugeſchweigẽ vermeſſene tade - lung Gottes vñ andere beygrentzende ſuͤnde / die dienern Gottes nicht geziemen. Matth. 20. ꝟ. 11. vnd 15. Wie es wol das anſehen mag haben / daß Jacob ſelbſten dieſer vnmut eingenom - men / vnnd zunemen iſt auß ſeinen worten / vor Pharao dem Koͤnige in Ægypten / der jhn nur bloß gefraget wie alt er were / da antwortet er: Die zeit meiner walfart iſt hundert vnd dreyſ - ſig jahr / wenig vnd boͤſe iſt die zeit meines lebens vnd langet nit an die zeit meiner vaͤter in jhrer walfart / 1. Moſ. 47. ꝟ. 9. Deñ ſonſten was iſt es noth geweſen jhm alſo vmbſtaͤndiglich klag -Bvnd[10]vnd vergleichungs weiſe zu antworten / auſſerhalb dieſem fall / daß weil das hertz iſt vol geweſen ſolches gremens ſich des erbro - chen hat durch die rede vnd kundt gegeben / wie ſonſten. Dawie - der iſt nun dieſes ſo oben iſt angezogen worden / von den laͤngern vnd verkuͤrtzeten jahren derer ſo vor vns gelebet haben / in vn - gleichheit gegen vns / vnd vnter ſich ſelbſten auff eine ſolche weiſe zugebrauchen / daß man gedencke bey jhm / dieweil die Ertzvaͤ - ter ſich haben muͤſſen zur ſtille begeben / die nach der ſuͤndenflut gelebet / wiewol ſie nicht vnwiſſend geweſen der jahren jhrer vo - rigen vaͤtter / geſtalt ſie auch ſolches gethan haben / wie auß die - ſen wortten folget / da von jhnen gemeldet iſt / daß ſie Lebens ſatt ſind geſtorben / vnnd deutlich von Abraham ſtehet 1. Moſ. 25. ꝟ. 8. ſo wil vns auch gebuͤren / die wir kinder ſeyn wollen / dieſer ſo heiligenErtzvaͤter / zu ſolchem ſinn ebener maſſen gelan - gen / vnd foͤrder gewaffnet mit ſolchem gemuͤth zu jeder zeit ru - hig das ende dieſes kurtzen lebens / vnnd den anfang des ewigen nachfolgenden zuerwarten. Wiewol ich muß bekennen es muͤſ - ſe ſehr ruhig ſeyn abzuſcheiden / wenn einer iſt lebens ſatt wor - den / vnd das ziel vnd zweck ſeiner begierden erreichet. Wie Si - meoni ſolches iſt wiederfahren / der alsdann nicht ohnſchwehr hat ſagen koͤnnen Luc. 2. ꝟ. 29. HErr nun leſſeſtu deinen die - ner im friede fahren / wie du geſaget haſt. Jſt eben als wenn er hat alſo außgeſaget: HErr nunmehro bin ich hie lebens ſatt worden / vnd willig zum tode. Die vrſach folget im 30. nehe - ſten verſickel vnd ſeiner rede. Denn meine augen haben deinen heiland geſehen / das iſt eben / als wenn er hette abermal außge - ſaget. Denn jtzo zur ſtunden habe ich dieſes erlanget / was ich ei - nig vnd eintzig mein lebetag gewuͤnſchet. Alsdan vnd zu ſelbiger zeit ſage ich / muß vnnd mag es ſich wol nicht vnſanfft ſterben / vnnd vrlaub nemen laſſen. Aber gleichwol iſt auch dieſes mit nichten zuvergeſſen; Wie etliche im natuͤrlichen leben / ent - weder auß gewonheit des fraſſes / oder auß vnart des ma - gens ſind vnerſaͤtlich: Alſo moͤgen etliche auch des lebes nim -mer ſat[11]mer ſat werdẽ / wiewol ſie alſo entweder hetten ſeyn koͤnnen oder moͤgen / auß goͤttlicher geſtattung des lebens / das er jhnen ſchon biß dahin ſo ferne gefriſtet / welches einem zu ſinn moͤcht kom - men / wenn einer lieſet vnd findet von Abraham / David vnd an - deren Moſ. 25. ꝟ. 8. 1. Chron. c. 30. ꝟ. 28. die noch nicht bey weitem zweyhundert jahr alt worden / vnd ſind dennoch le - bens ſatt worden / ehe ſie geſtorben. Aber von keinem / der lang lebigen Patriarchen / der anzahl iſt auff gezeichnet 1. Moſ. 5. findet man ein gleiches / vnd mag wol einer oder der ander auß jhnen / noch nicht lebens ſatt zum ende deſſelbigen vnd todt ge - kommen ſeyn. Hiebey mag es auch wol geſchehen daß einer ehe vnd auff andere weiſe des lebens ſatt kan werden / weder wenn er gar lang vnd gleichſam zum eckel vnd uͤberdruß jhm ſelbſten vnd andern lebet. Wie einer wol kan ſatt werden / ob er ſchon nicht ein ſtunde oder mehr beym tiſche weilet / vnd verharret / ſondern der kuͤrtze ſich bequemet / vnd deſto beſſer fort iſſet. Alſo / wer nur wie Alexander, in der jugendt die zeit wol anwendet / der kan wol ehe zur ſattſamkeit deſſelben kom̃en / weder einer der alles biß in das alter verſparet. Nicht der hat lange gelebet / der viel ſtun - den in ſeinem leben geſchlaffen hat / ſondern der des tages vñ des lebens gebrauchet. Wie auch der nicht lange gegeſſen / der beym eſſen geſchwetzet oder mit den augen hin vnnd her hat vmbge - ſchweiffet / ſo er nicht dieſes gethan / daß er der zeit wargenom - men / vnd den hunger hat abgeſtillet. Auch vor dem geſchwinden todt kan man noch volkommen werden im Buch der weißheit im 4. capit. im 13. verſickel. Derohalben / das ſol numehro der ſchluß vnd die folge der eingefuͤhrten lehre vnd betrachtung ſein / es iſt beſſer nicht auff viel jahr zuſehen / die andere gelebet haben / oder wir koͤnen leben vnnd auch wol nicht koͤnten leben / welches vns kuͤnte trawrig vnnd neidiſch machen / ſondern auff die zeit darinnen man lebet / vnd bald darnach zutrachten / daß man ſein thun vnd willen demnach entlich verrichte / vnd lebens ſatt / bey - zeitten faſt werden moͤge / damit man ja nichts verdroſſen ſichB ijempfinde[12]empfinde / wenn man ſol abgefordert werden. Das iſt die lehre genommen auß dem bericht / von Saræ alter / vnd ankunfft jh - res todtes im hundert vnd ſieben vnd zwentzigſten jahr. Folget wie ſie alſo geſtorben / ſo hat ſie Abraham jhr Herr beweinet / wie billich / vnd auch weiter zur erden beſtaͤtigen laſſen. Wer moͤchte jhm verdencken ſolches / vnd nicht mehr loben vnd zum exempel den andern fuͤrſtellen vnd fuͤrhalten? Sie war ſchoͤn Sara 1. Moſ. 12. Wer kan auch wol ohne zehren was liebes verlie - ren? Sie war jhm verwandt / vnd nach der ſchrifft art zu reden ſeine ſchweſter. 1. Moſ. 20. ꝟ. 12. Auch ſolche leſſet man vn - gern ohne ſchmertzen abſterben / da man ſich jrer erfrewet / wenn ſie zur welt geboren werden Luc. 1. ꝟ. 58. Sie war ſein ge - mahl / eines mit jhm / fleiſch in ſeinem fleiſch / vnd blut in ſeinem blut / wer kan daſſelbige haſſen? Ephſ. 5. ꝟ. 29. Welcher iſt ſo ſtarck der jhme ohne verkehrung der augen ein glied kan abloͤ - ſen / vnd noch mehr eine ribbe entnemen vnd das hertz zutheilen laſſen? Sie hat jhn erfrewet mit einem erben / von ſeinem vnd jhrem leibe auß wunderbarer mitlung Gottes / wie bekandt auß 1. Moſ. 21. ꝟ. 6. 7. Niemand ſolte ohne bekuͤm̃ernuß anſehen / daß jhm ein fruchtbahrer baum oder weinſtock ſolte außgehen / von dem er etwa hette was ſonderliche fruͤchte eingeſamlet. Sie war ſittig vnd ehrerbietig gegen jhm geweſen / den ſie jhren Her - ren nennet / 1. Moſ. 18. ꝟ. 12. 1. Petr: 3. ꝟ. 6. Eines ſolchen tugendthafften bildes leſſets ſich nicht bald vergeſſen. Vber diß alles / das faſt viel iſt / war Sara die gefertin / vñ ſtete beywohne - rin geweſen in ſeinen reyſen vñ elend / vñ daß freunde ſich vngern trennen laſſen / iſt bekandt auch auß der erfahrung vnd der klag - rede Davidt uͤber den todtesfal Jonathan ſeines trewen freun - des im 2. buch Samuel. 1. ꝟ. 26. die worte lautten alſo: Es iſt mir leyd vmb dich mein bruder Jonathan / ich habe groſſe freude vnd wonne an dir gehabt / deine liebe iſt mir ſonderlicher gewe - ſen / denn frawen liebe iſt. Demnach wiederhole vnd ſchlieſſe ich wegen vorigen fuͤrhabens vnd der handlung Abrahams / daß erſeine[13]ſeine todte beweinet / das habe er billich vnd nit ohne gebuͤhrliche vnd wichtige vrſach gethan. Auch iſt wol ein jeglicher todte / er ſey auch wer er wolle eines parß naſſer augen werth / nach Sy - rachs vrtheil in ſeinem buch am 38. ꝟ. 16. Mein kind (iſt das ſelbige) wenn einer ſtirbet / ſo beweine vnd klage jhn / als ſey dir groß leyde geſchehen. Jſt bloß vorgeſchrieben / wie einer auch werth ſeyn moͤge / oder nicht. Denn im nachfolgenden verſickel / belehret er wie man ſich inſonderheit bey der klage / in anſehung der wuͤrdigen verhalten ſolle: aber die erſte ermahung / wie ſchon geſagt / iſt bloß dahin geſtellet / darumb weil er geſtorben iſt / er ſey auch wer er wolle / ſo iſt er im gewiſſen verſtand / des beweinens wuͤrdig. Zu ſolchem endt hat man auch vor zeiten bey den lei - chen klagweiber gebrauchet / Jerem. 9. ꝟ. 17. 18. 19. daß die beyweſenden zuhoͤrer zum weinen auß anhoͤrung der weh - klag der weiber / die ſich alſo ſtelleten / gereitzet wuͤrden / vnd die leidpfeiffer zu gleichem ende Matt: 9. ꝟ. 23. Welchem ſo man beſſer nachſinnen wolte / ſolte ſichs finden / daß man noch wol mehr ſolte trawern vnd klagen / bey eines boͤſen menſchen todte / weder eines from̃en: derer ende vnd zuſtand dieweil er vngleich iſt / ſo muß er auch alſo vngleicher weiſe beweinet werden. Auff welchen ſchlag Davidt mehr beweinet / vnd beklaget den todt ſei - nes vngerathenen ſohnes Abſalons / daß er geſchrien / mein Sohn Abſalon / mein Sohn / mein Sohn Abſalon / wolte Gott / ich muſte fuͤr dich ſterben / ô Abſalon mein Sohn / mein Sohn 2. Sam. 18. ꝟ. 33. denn er beſorgte er wehre vbel in ſeinen ſuͤn - den geſtorben. Aber nicht alſo ſtellet ſich David / bey verluſt des andern kleinen Sohnes / der keinen vnterſcheid nicht hat machen koͤnnen zwiſchen gutt vnd boͤſe / ſeiner rechten vnd lincken den er auß Batſeba erzeuget / davon 2. Sam. 11. vnd 12. capitt. Son - dern es wird auch gemeldet / daß David / da er wol trawrig ge - weſen bey wehrender kranckheit des kindes / auch gefaſtet vnd im Sack gegangen / ſich hernach gewaſchen / gegeſſen vnd mu - thig geweſen / nach dem er verſchieden mit groſſer verwunde -rung der[14]rung der andern / ſo vmb jhn geweſen / deſſen er David vrſach ge - geben / nemlich dieſe ꝟ. 22. 23. vmb das kind faſtete ich vnnd weinete / da es noch lebete / denn ich gedachte: Wer weiß ob mir der HErr gnedig wird / daß das kind lebendig bleibt. Nun es a - ber todt iſt / was ſol ich faſten / ich werde wol zu jhm fahren / es kommet nicht aber zu mir wieder. Jſt gleicher meinung mit die - ſen worten / ſo er die gebrauchet hette / ich weiß daß jhm wol iſt / vnd er ſeelig / was ſol ich auſſerhalb ende vnnd maſſen weinen. Aber nicht alſo iſts mit den boͤſen bewandt / die durch das zeitli - che abſterben / welches vorbewuſt vnd alſo faſt ſchrecklich / auch fortan in die ewige vnſelige ewigkeit geſtuͤrtzet werden. Wel - ches ja wol iſt zubeweinen vnnd zu beklagen / ſo es auch nur ver - ſchlagen moͤchte. Es iſt alhie eine doppelte vrſach zu weinen. Einen zeitlichen todten ſol man zu foͤrderſt beweinen: Noch viel mehr einen der ewig ſol todt bleiben am andern todte / der ſee - len vnd dem leibe hernach. Welche ſchuld den todten dieſelbige zubeklagen / gleichwol nicht wird abgeleget von den feindſeeli - gen / die nur froh ſind / daß jhr wie derpart iſt vor jhnen danieder gefallen / wie ſie meinen. Vnd von den neydiſchen / die ſich fre - wen im ſchooß / daß ſie denſelben vor augen nicht ſehen doͤrffen / deſſen tugendt ein ſtachel vnd dorn in jhrem angeſicht geweſen / vnd jhnen zu ſehr eingeleuchtet daß ſie es endtlich nit haben lei - den koͤnnen. Die moͤgen ſich aber bedencken / wie ſie dieſes ver - antworten vnd belegen wollen. Offenbahr iſts / daß es ſchnur ſtracks zuwieder iſt dem / was in einer andern meinung anjtzo erwieſen vnnd dargethan worden. Dennoch muß auch dieſes hierbeyfuͤget werden / daß allen menſchen wil obligen / ſich ſol - cher geſtalt alſo zuverhalten in jhrem Leben / daß die uͤbrigen / wegen jhrer verluſt / als eines kleinoths ſich zubeklagen haben. Wie Sara jhrer zierden wegen / davon oben / von Abraham ge - ſtalten ſachen nach / billich iſt alſo beweinet worden. Nicht ohne gefehr / oder nur auß bloſſer gewonheit iſt es auch geſchehen / daß Moſes / nach ſeinem todte / von den kindern Jſrael iſt be -weinet[15]weinet worden gantzer dreyſig tage 5. Moſ. 24. ꝟ. 8. ſon - dern dieweil er ſie gehuͤtet hat / wie eine herde ſchaffe Pſalm. 77. ꝟ. 21. vnd keiner ſeines gleichen hernach kommen im 5. Moſ. 34. ꝟ. 10. das war beyneben eine vrſach ſolches beweinens. Alſo leſen wir / daß die glaͤubige witwen / vnd juͤnger gar ſehr be - weinet haben dz abſterben Tabeæ / einer auß jhrem mittel Act. 9. ꝟ. 39. die vrſach ſtehet da / ſie war voll gutter werck vnd al - moſen geweſen / vnd hat roͤcke vnd kleider gemacht zu dienſt der armen vnd kirchen / die ſie auch Petro zeigeten / wie daſelbſten zu leſen. Alſo wil allen / benamentlich weiblichen perſchonen gebuͤhren / daß ſie bey wehrendem jhrem leben / nicht allein mit zierde jres leibes in kleidern ſich werth machen bey der welt / ſon - dern mit tugenden / damit jhr verluſt als eines groſſen lichtes / o - der edelgeſteines / vnnd guttes moͤge rechtſchaffen / vnnd billich beklaget / vnd betrauret werden. So iſt Sara gezieret geweſen 1. Pet. 3. davon wir alhie zu reden angefangen / die Abraham demnach hat billich beweinet. Aber weiter / Sara ſolte vnnd koͤnte nicht in zehren erſaͤuffet werden / ſondern ſie ſolte der er - den ein - vnnd beygeleget werden / nach der gewonheit der alten / vnd der ordnung Gottes angedeuttet in dieſen worten / zu dem erſten ſterblichen menſchen geſchehen. Du biſt erde / menſch / vnd ſolt wiederumb zur erde werden / welches alſo nit beſſer geſchehen kan als eben in der erde ſelbſten. Solcher geſtalt wie der menſch aus dem kloß der erden gemacht / alſo muß er auch ſo fern er auß der erden herruͤhret / dahin wieder geleget / vnd der erden wieder gegeben werden / auch wol der deutung wegen vnd bildung auff die aufferſtehung / davon Chriſtus Johan. 12. im 24. verſickel. Warlich warlich ich ſage euch / ſpricht Chriſtus / es ſey denn daß das weitzen korn in die erde falle vnd ſterbe / ſo bleibet es alleine / wo es aber erſtirbet / ſo bringet es viel fruͤchte. Vnd Paulus noch deutlicher 1. Cor. 15. ꝟ. 36. vnd nachfolgenden. Du narr / das du ſeeſt / wird nicht lebendig / es erſterbe denn / vnd das du ſeeſt iſi ja nit der leib der werden ſol / ſondern ein bloß korn / nemlich wei -tzen / oder[16]tzen / oder der anderen eines / Gott aber giebet jhm einen leib wie er wil / vnd einem jeglichen von dem ſamen ſeinen leib. Alſo auch die aufferſtehung der todten. Es wird geſeet verweßlich / vñ wird aufferſtehen vnverweßlich / es wird geſeet in vnehr / vnnd wird aufferſtehen in herꝛligkeit / es wird geſeet in Schwachheit vnnd wird aufferſtehen in krafft / es wird geſeet ein natuͤrlicher leib / vnd wird aufferſtehen ein geiſtlicher leib ꝛc. Diß iſt die meinung dieſer worten fein kurtz vnd rund gefaſſet. Wie der fruͤchte ſaa - men der erden vertrawet muß werden zur fruchtbarkeit: Alſo ſollen die leichnam der menſchen / in die erden verwarlich beyge - leget gewiß vñ warhafftig wieder herfuͤr bluͤhen. Zur anzeigung welcher gewißheit ſie auch in die erde die fruchtbare mutter aller kreuter vnd gewechſe eingeſcharret / vnd danenhero wieder her - fuͤr kommen vnd auffſtehen werden. Wegen ſolcher hoffnung ohne zweifel / wie ſolches glaubens auch Abraham geweſen / auß lob der Epiſtel an die Hebræ: cap. 11. ꝟ. 19. hat auch Sara ſollen zur erden beſtetiget werden. Aber als dann / wie er Abra - ham in dem gantzen leben ſich der willigen armut hat befliſſen / daß er nichts eigenes hat vor ſich an heuſern vnnd gruͤnden ge - kaufft / hat ſich Abraham bloß muͤſſen außgeben / dieweil er nicht einen ort gehabet / da er ſeine leyche ehrlich vñ offentlich verwah - ren hat koͤnnen. Demnach wie im text es vmbſtendig vnnd weitleufftig iſt beſchriben / als daran viel gelegen / ſpricht er zu denen ſeinen leuten / die jhn als einen frembden freundlich vnd willig auffgenom̃en hatten / ſie wolten jhm noch ferner geſtattẽ / nach algemeinem heyden recht / ſeine leiche bey jhnen zuverwah - ren / welches er mit dieſen ſeinen eigenen worten alſo hat fuͤrge - bracht ꝟ. 4. Darnach ſtund Abraham auff / von ſei - ner leyche / vnd redet mit den kindern Heth / vnd ſprach. Jch bin ein frembder vnnd einwohner bey ench / gebet mir ein Erbbegraͤbnuß bey euch / daß ich meinen todten begrabe / der fuͤr mir liget. Biß hie -[17]Biß hieher die rede Abraham / zu welcher beſſerer verſtendnuß dieſes / ſo nachfolget / mag kuͤrtzlich dienen. Zu foͤrderſt die er anredet / ſind die Hethiter vom geſchlecht geweſen / herkommen von einem; der da hat Heth geheiſſen / einem Sohn Canaan 1. Moſ. 10. ꝟ. 15. Buͤrger zu Hebron der ſtadt nach / darin ſie ge - ſeſſen vnd er zuſampt Sara jhr gaſt geweſen / derer Land vnnd wohnung jhm auch erblich vnd ſeinem ſamen / zu ſeiner zeit von Gott verſprochen worden 1. Moſ. 15. ꝟ. 20. Die bittet er al - hie vmb eine eigene vnd erbliche leichſtette / mit dieſen eingefuͤhr - ten gruͤnden vnd motiven. Erſtlich / dieweil er ein frembder weh - re / denen man allerſeyts in aller Welt zu willen wehre auff jhre bitte / auch wol ohn dieſelbige / ſchuld vnnd ehren wegen. Zum andern / wegen der notturfft des begraͤbnuß / vmb der jhm ſo lie - ber leyche willen / vnd ſie jhm dieſelbige nicht als eine freye erde / ſondern vmb ſein gelt / weiches er hernach außgeboten vnd geza - let / geſtatten ſolten. Vnd zum dritten / vnd noch mehr / weil ſie jhn vnnd die ſeinige lebendig gaſtweiſe hetten auffgenommen / welches alles zuſammen bedacht / nicht anders hat wircken koͤn - nen / weder erhoͤrung vnnd gewehrung ſeiner ſo freundlichen / vnd ſo erbahren bitte. Worauff in geſtallten ſachen ſie ſich alſo bald willig alle ſampt erbotten haben / mit groſſem lob der wuͤr - den vnd perſchon Abraham / davon im 6. verſickel zu leſen (in dem ſie jhn einen Fuͤrſten Gottes vnter jhnen gennenet) vnnd bereyteſtem erbietem / jhm ſol es frey vnd vergoͤnnet ſtehen in ei - nem jhrer graͤber auch dem zierlichſtem vnd vornembſtem ſeine / wenn vnd wie er wolle / leyche zulegen vnd einverwahren. Wel - ches ferner Abraham alſo mit ehrerbietung vnd beding angenõ - men / daß er erſtlich ſich gebucket vor jhnen / vnnd damit bedan - cket / vnd benamentlich vor ſein gelt / vnd vormittelſt jhrer vnter - handlung / inſonderheit geheiſchet die zwiefache hoͤle Ephron des oberſten vnter jhnen / die jhm auch endlich alſo zuſtatten iſt worden. Wiewol ſich Ephron jhm deutlich wiederſetzet / daß er mit nichten von jhm als frembden / dafuͤr etwas nemen wolte /Cdavon[18]davon vmbſtaͤndig in der Hiſtori / vnd darauff hat Abraham / wie im ein ohn letzten / vnd letztẽ verſickel ſich befindet / ſeine Saram dahin verwahret / vnd ſolche erkauffte hoͤle / jhm vnd den ſeini - gen zu einem erblichen grabe erworben / vnd erlanget / welches meines erachtens / die ſumma iſt derſelben gantzen hiſtori / ſo fern hie dieſelbige hat ſollen bequemlich / vnnd zu vnſerm zweck dienſtlich muͤſſen eingefuͤhret werden. Daran wird nunmehro etwas mehr arbeit vnd zeit ſein anzuwenden / daß wir dannen - hero ſolche lehre herfuͤr holen / die als eigentlich auff dieſe vñ der - gleichen verſamblungen befuͤget / vnd bequem erfunden moͤgen werden. Vberdas vnd vielmehr / dieweil auch ſonſten die Hiſtori aus bloſſem anſchawen des texts ſo kundt / vnd ſo offenbahr iſt / daß ſie mit nichten von noͤthen hat / wie andere / einer muͤh - vnd langſamer erklehrung / vnd eroͤrterung. Worauff ich demnach nur alſobald dieſe lehre / E. L. wil fuͤrhalten / vnd wie die zeit mich errinnert nur an-vnd ein-vnd mit nichten / dieweil es nicht thun - lich iſt / außfuͤhren. Voran ſage ich iſt zuverſtehen auß dem ver - halten Abraham / bey vnd in dieſer handlung / daß denen auß dem Volck Gottes / vnd eben ſo wol denen auß den Chriſten / ſo in dieſem fall alle nach einer regel einhergehen muͤſſen / wil ge - buͤhren vnd geziemen / nicht allein ſich zu fleiſſigen / der gerechtig - keit vnnd eyfers im rechtſchaffenem glauben / ſondern auch der zucht / vnd des gebuͤrs im wandel gegen alle menſchen / ſo wol die todten / als die lebendigen / vñ vnter denen auch gegen die fremb - den / vnd am allermeiſten gegen dieſelbigen / daß ſo es moͤglich auch ſie ohne wort moͤchten gewonnen werden 1. Pet. 3. ꝟ. 1. oď ja verhuͤttet / damit dieſer verſeumnuß wegen / der name Got - tes nicht moͤge verleſtert werdẽ / Rom. 2. ꝟ. 24. welches wie es geſchiehet / das iſt in andern zuſammenkunfften gehoͤret worden. Worauß nothſchließlichen weiter folget / daß die im wiedrigen theil faſt wol zu rede moͤgen geſetzet werden / die beym fleiß vnd ruhm des glaubens / es ſey auch in was parthey es wolle / ſind vn - bedacht der gebuͤhr wegen / gegen die neheſten die einer ſchuldtdennoch[19]dennoch gleich ſollen gehalten werden / als auß der liebe herruͤh - rend zu den Roͤmern im 13. im 8. verſickel. Welcher liebe / wie auch der gegen ſich ſelbſten allgemeine vnnd auß der natur be - kante richtſchnur vnd regel iſt Luc. 7. ꝟ. 13. wie jhr wollet / daß euch die leute thun ſollen / alſo thut jhnen gleich auch jhr. Darzu noch ferner iſt herzuholen / die rede Chriſti zu den Juden / die ſich faͤlſchlich ruͤhmeten / daß ſie Abrahams kinder wehren / Johan. am 8. im 39. verſickel. Weret jhr Abrahams kinder / ſo thet jhr Abrahams wercke / ſpricht Chriſtus daſelbſten. Folget / Abra - ham hat ſeine leiche beweinet: So wil vns auch gebuͤhren / deß - gleichen zu thun bey vnſern leychen / damit vns herwieder ein gleiches geſchehe nach vnſerem todte vnd abſterben. Abraham hat ſich freundlich vnd ehrerbietig gegen die frembden erwieſen / die jhm mit wolthaten vñ freundtſchafft gedienet haben / folget / daß vns / ſo wir kinder Abrahams ſeyn wollen / auch ein gleiches zuthun obliget. Abraham hat nichts mit abbruch des naͤheſten / zu ſeinem vortheil vmbſonſt begehret / da ers hat zahlen koͤnnen: ſo wil vns auch ein ſolchs gemuͤt gehoͤren. Abraham hat ſich ge - fliſſen der gerechtigkeit in handel vnd zahlung / vnd richtige vnd wichtige muͤntze gezalet: folget / ſo wil auch ſoches den Chriſtli - chen Kauffleuten anſtehen / das ſie thun / die frembden wahren nicht vortheilhafftig an ſich ziehen / falſche muͤntze vnterſchieben / boͤſe wagen vnd maß gebrauchẽ / vnd dergleichen rencke uͤben / die wol moͤgen reich / aber nicht ſelig machen: die wol heut uͤblich vñ gemein ſeyn moͤgen / aber nicht mit dem geſetz / vnd mit dem exem - pel Abraham / davon alhie / vbereinſtimmen / vnnd zuſammen kommen. Den kindern Gottes vnd Abrahams / die ſind eines / denen wil / wie erwieſen / ein anders gebuͤhren. Worauß folg - lich mit leichter muͤhe zuerweiſen ſtuͤnde / daß die heutigẽ Juden / als ein boͤſſer eſſig / vom gutten wein herkommend / das iſt ein vnartiges geſchlecht von den frommen Patriachen herſpriſſend / nach dem fleiſch nicht der rechte ſamen Abrahams weren / die nit weniger / als in dieſen wercken jhres vaters / des ſie ſich ruͤhmen /C ijſich vben /[20]ſich vben / auch nicht alle Chriſten / die ſich vor den ſamen Jſraelis vnd Abrahams / nach dem Geiſt außgeben / alſo ſind. Weil auch an jhnen eine vnaͤhnligkeit vnd vngleichheit mit Abraham gleich wie mit fingern kan gezeiget werden. Aber auch eingeſtellet mit mehrem von dieſem exempel zu reden: ſo haben wir weiter bey handlung dieſer Hiſtori / auff das ander exempel der Heyden / der Hethiter die augen zu wenden / als an welchen dieſes zu foͤrderſt faſt loͤblich gehalten / vnd zur nach folg fuͤr geſtellet mag werden. Daß ſie ſo willig den frembdlingen / vnnd anderwerts herkom - menden gedienet haben mit herbergung / dieweil ſie Abraham vñ Saram auffgenommen / mit erbietung jhrer graͤber / mit willig - keit zur ſchenckung eines derſelbigen / vnd mit anderer freund - vnd leuttſeligkeit / derer argument vnnd kenzeichen mit leichter muͤhe auß der Hiſtory zunehmen ſindt. Hinweg hergegen mit dem ſchaͤndlichen frevel / der andern Heyden / der Sodomiter / die nit alſo ſich gegen die frembde freundlich gehalten / ſondern ent - weder die nicht auffgenommen vnter jhre daͤcher: darauff ſehen die beyde ankommende Engel in jhren worten 1. Moſ. 19. ꝟ. 3. Oder ſie zu jhrem vnflaͤtigem willen mißbrauchet / im 5. ver - ſickel daſelbſten / vnd nur auch darumb Loth gequelet / dieweil er beydes frembd vnd gerecht geweſen 1. Moſ. 19. ꝟ. 9. vnnd 2. Petr. 2. ꝟ. 8. Vnd wolte Gott daß keines der laͤnder / ſtaͤtte / vñ oͤrter mehr zu nennen were / da vnter andern laſtern auch dieſes faſt geſpuͤret wird / daß man leicht die frembden gering helt / vnd jnen vnguͤttlich vnd vnfreundlich ſich bezeuget: Welches wie es zuwieder iſt / dem jtzo alhie geruͤmbten exempel / dieſer heiden der Hethiter: alſo / welches noch wol mehr iſt zubedencken / iſts auch entgegen / dem geſetz vnd der weiſe Gottes / der von jhm ſelbſten ſaget 5. Moſ. 10. ꝟ. 18. daß er lieb habe die frembdlingen / vnd ſolche liebe damit thaͤtlich bezeuge / daß er jhnen kleider vnd ſpei - ſe gebe. Darumb ſpricht Gott ferner / ſolt auch jhr die Fremb - lingen lieben: deñ jhr ſeyt auch fremblinge geweſen inEgypten - land. Niemand gedencke hiebey / daß Gott die kleider vnd ſpeiſevmb der[21]vmb der frembden willen herab regnen laſſe vom himmel: ſon - dern er hat ordnung vnnd geſetz gegeben / der frembdlingen we - gen / denen man alſo dienen ſolte / wie er gebotten / vnd ſo es alſo geſchiehet / ſo kompt es vrſpuͤnglich von jhm / vnd iſt alſo dahero ſeine liebe gegen dieſelbige zuerkennen / vnnd mit der nach folge außzudrucken. Noch mehr / weil ein jeglicher / jhm ſelbſten in der frembde weyland auch alſo gerne hat dienen / vnnd guttes thun laſſen. Aber davon moͤgen wenig verſtehen heimgewach - ſene neſt-kinder / hette faſt rinder doͤrffen ſagen / die ſollen es demnach goͤttliches gebotts wegen / billich ins werck richten / wiewol ſie vnwiſſent ſind des hertzens / wie einem das beſchaf - fen iſt / wenn einer inder frembde weilet / vñ mangel leydet. Gott ſey lob / daß ſich deßwegẽ die frembden kaum gegen dieſes ort zu beklagen haben / denen aber herwider zu thun ſtehet / nach dem exempel Abraham / ſich friedlich / freundtlich / vnd gerecht / mit jhren wirten vnnd wolthaͤtern zubegehen vnd zubegegnen / daß genugſam iſt / angedeutet zu ſeyn / wiewol es nicht außgefuͤhret mag werden. Jnſonderheit aber / iſt dieſes wol auß zudruͤcken / daß wie man ins gemein / den frembden bey jhrer notturfft dien - ſte iſt ſchuldig / alſo vnter andern dieſe Namhaffte / in jrer kranck - heit ſie zupflegen / noch mehr / wenn ſie gantz todt ſind jhrer war - zunemen / vnd in vnſere erde auffzunehmen Luc. am 10. Lobet der HErr Chriſtus / die gutthat des Samariters / an dem fremb - den verwundeten / vnnd ſaget / daß wir deßgleichen thun ſollen: ohn zweifel wird er auch hievon alſo ſagen / gehet hin vñ thut al - ſo / wie die Hethiter gethan haben / die Abraham bey jhnen ein begraͤbnuß geſtattet. Dieweil die noth eines todten frembdlingẽ groͤſſer iſt / weder eines krancken / als welcher jhm gar nicht hel - fen kan / er hat jhm auch ſein ruhbette vnnd ſtelle / nicht mit neh - men koͤnnen / ſondern muß daſelbſten liegendt bleiben / wo er iſt nieder gefallen / wie ein baum im Prediger am 11. cap. ꝟ: 3. Gebe GOtt / das ſolches bey allen fuͤrfallenden gelegenheit - ten / als ein vornemes werck der barmhertzigkeit / ſo den kindernGottes[22]Gottes anſtendig iſt / von vns geuͤbet / vnd ins werck moͤge voll - zogen werden. Wozu / damit ich zum ende gelangen moͤge / noch eines auß dieſer hiſtory / vnd handlung / mit Sara vnd A - braham zu mercken. Jſt dieſes das ich / wenn ich die frage herfuͤr gebracht werde habẽ / wil hinzuthun / vnd alſo folglich dieſer pre - digt vnnd erklehrung / den ſchlus anfuͤgen. Alſo mag gefraget werden / wenn Abraham vnd Sara ſeyn reicher geweſen / da ſie gelebet / oder ſie todtes nunmehro verblichen? Das iſt die frage. Die antwort iſt / vnd was dabey zu mercken / das Abraham vnd Sara / wiewol ſie reich geweſen / in jrem leben / doch am reichſten nach jhrem todte geworden. Da ſie Sara im eigenem erkaufften begraͤbnuß / vnd alſo auch Abraham hernach gewohnet / geruhet vnd geweylet. Denn ſonſten hat Abraham in huͤtten gewohnet / als ein reyſender Hebr. 11. nicht ein fuß braͤit eigenes ge - habt / im Lande das jhm dennoch iſt erblich verſprochen Act. 7. ꝟ. 5. Nur das erbbegraͤbnuß / das er alhie gekaufft / vnd das hernach / da er es beſeſſen / vnnd bewohnet / ſein eigen geweſen. Wolten / wolten gleicher maſſen / geliebete zuhoͤrer / die reichen auß ewrem mittel wiſſen / was jhr eigenthumb eigentlich wehre / deſſen ſie am meiſten werden beduͤrffen vnd geniſſen / ſo ſolten ſie berichtet werden / es wehre nicht jhr gelt / darauff warten ins ge - mein die erben / bereit beyzeiten / vnd noch fuͤr der zeit / nicht die kleider die ſie haben / die werden jnen ab-vnd außgezogen / nit dz hauß vnd pallaſt / darin ſie weylandt im leben gewohnet haben / darauß werden ſie außgetragen / ſondern der ſtein / den ſie in der kirchen haben / vnnd das erbbegraͤbnuͤß da ſie ruhen ſollen vnnd wohnen werden / weit lenger wie ſie in jhren erbawten haͤuſern geweylet / oder vielmehr gewallet haben. Darumb ſind die faſt klug vnd reich / die nach dieſem ſo groſſem reichtumb trachten / erſtlich / nach des textes ſin / 1. Tim. 6. daß ſie nahrung vnd klei - dung haben: vnd zum andern nach dem exempel Abraham / daß wenn ſie ſterben / eine kammer vnter der erden haben moͤgen / da ſie moͤgen beygeſetzt vnd geduldet werden. Araham hat nichthaͤuſer /[23]haͤuſer / vnd liegende gruͤnde gekauffet vor das geldt / das er den - noch hat allezeit gehabet bey ſich / ſondern nur ein eignes begraͤb - nuͤß. Das iſt ſein eigen geweſen / vnd aller menſchen / ſo ſie etwas eigenes hie haben koͤnnen / hernach das ander iſt oben da vnſer vatterland vnd Erbſchafft iſt / dahin vns Gott helffen vnd fort - helffen wolle / wenn wir vnſer lebẽ / es wehre lang oder kurtz / wer - den ſelig geendet / vnd zuvoran Chriſtlich in gebuͤhr gegen Gott vnd menſchen / in liebe vnd dienſten gefuͤhret haben. Amen.