DVrchleuchtiger Hochgeborner Fuͤrſt / E. F. G. ſeyen mein vnderthaͤnig gehorſame Dienſt euſſerſtes vermoͤgens je - derzeit zuvor / Gnaͤdiger Fuͤrſt vnd Herr / Es iſt auß den Hiſtorien maͤnniglich kundt / mit was groſſem Fleiß / Luſt vnd Nutzen jhrer viel vnder den Alten vnd Jungen Koͤ - nigen / Fuͤrſten vnd andern groſſen Herren ſich in den Loͤblichen Sinn - reichen Mathematiſchen Kuͤnſten / bevorab in der Aſtronomi vnd Geometri geuͤbet / vnd jhre ſonderbare Freud / auch mit hindanſetzung anderer an ſich ſelbſten Rittermaͤſſigen Leibs Exercitien / in dieſer doppelen wiſſen - ſchafft geſuchet vnd gefundẽ haben. Vnd daß wir jetzund von den Aſtro -): (iijnomiſchenDEDICATIO. nomiſchen diſciplinen nichts ſagen / weil dieſelben etwas weitter von die - ſem Buch abweichen / darinnen der Newen Welt oder Weſt-Jndien Na - tuͤrliche vnd Hiſtoriſche Beſchreibung fuͤrgeſtellet wird / ſo iſt gewiß / daß / alß der vbertreffliche Philoſophus Plato auff eine Zeit gefragt wurd / was er wol meinte / das Gott am allermeiſten thete / gab er zur antwort / ipſum γεω - μετρεῖν, das iſt / Er regierte vnd erhielte alle ding nach Geometriſcher Pro - portion / welche meinung faſt vberein komt mit dem das die H. Schrifft ſagt (Sap. XI.) Gott hab alle ding nach dem Maß / Zahl vnd Gewicht ange - ordnet / wie dann er Plato vber die Thuͤr ſeines Auditorii, darinnẽ er profitirt / anſchreiben laſſen / daß keiner / der Geometri vnerfahren / hinein gehen ſolte.

Alexander der groſſe hat in ſeinen weiten vnd gefaͤhrlichen Reyſen ſich ſonderlicher Geographiſcher Tafeln mit nutz gebraucht / vnd ſeine Zuͤg ne - ben andern nachrichtungen darnach angeſtellet / zu welchem Ende er auch zween erfahrne Geographos Diognetum vnd Betonem mit ſich gefuͤhret. Marcus Agrippa, Keyſer Auguſti Tochtermann / hat nicht allein in der Beſchreibũg deß damal bekandten Erdbodens ſich fleiſſig geuͤbt / ſondern auch in einer ſchoͤnẽ gewelbten Gallerei eine Mappam oder Landtafel / der gantzẽ Welt / ſo gut man ſie zur ſelben zeit haben koͤnnen / offentlich auffgehenckt / damit maͤnniglich dieſelbe beſehen koͤnte / wie dann Plinius bekent / daß er ſich deren mit nicht geringem Nutz gebrauchet habe. Carolus Magnus hat die Coſmo - graphiſche Buͤcher / ſo er haben konte / nit allein fleiſſig geleſen / ſondern eine Weltbeſchreibung oder Landtafel auf ein gantz Silbern Tiſchblat kuͤnſt - lich graben oder ſtechen laſſen / vñ ſich in derſelben mit groſſem luſt geuͤbet / auch ſonſten ein groſſen Vorrhat Mathematiſcher Jnſtrumenten in ſei - ner Kunſt Kammer gehabt / wie Auentinus bezeugt. Mehr vnd friſchere Exempel einzufuͤhren iſt vnvonnoͤten / weil dieſelben bekandt / wie dann nit weniger / wie ſchaͤdlich dieſer dingen Vnwiſſenheit einem Herrn oder Re - genten zu Fried vnd Kriegszeitten ſeye.

Wann dann Gnaͤdiger Fuͤrſt vnd Herr / E. Fuͤrſtliche Gnaden / dem loͤblichen Exempel der oberwehnten Keyſer / Koͤnig vnd Herren nicht al - lein gantz rhuͤmlich nachfolgen / ſondern auch dieſelben vnd viel andere / de - ren mit lob in den Hiſtoriẽ gedacht wird / in dieſen ſehr ſchoͤnen vnd anmuͤ - tigen Studien vbertreffen / geſtalt ſolches E. F. G. mit gutem grund nachgeruͤhmet werden kan /

Alß hab in Anſehung deſſen ich mir die Vnderthaͤnige Freyheit ge - nommen / E. F. G. diß mein Ernewert vnd biß auff dieſe Zeit Continuirt Weſt-Jndianiſch Werck in gehorſam zuzuſchreiben vnd vnder E. F. G. hochgeehrtem Fuͤrſtlichen Namen an deß Tages liecht zu geben / der vn - derthaͤnigen Hoffnũg / E. F. G. werdẽ jhro ſolches nit zu wider ſeynlaſſen.

Dann Erſtlich werden E. F. G. hierin finden / hin vnd her eingemeng -tenDEDICATIO. ten Bericht von dem Theil deß Himmels oder Firmaments / ſo gegen dem Suderſtern zeucht / ſampt der Cruſera vnd andern Geſtirnen / welche von vns vnd allen denen / ſo diſſeits deß vergleichers oder Æquinoctial Lini gegen Norden wohnen / nicht moͤgen geſehen werden / vnd davon die Al - ten nichts gewuſt. Darnach augenſcheinliche vnnd auß vielfaltiger Er - fahrung hergenommene demonſtrationes, daß Antipodes, oder Leuth ſeyen / welche die Fuͤſſe gegen vns wenden / vnnd doch nicht weniger alß wir / den Himmel vber jhren Haͤuptern haben / zugleich auch ein Mittleiden tra - gen mit den guten Alten / welche ſolche nicht in jhren Kopff bringen koͤn - nen / vnd derwegen gar gelaͤugnet haben / auch vnder den frommen Gott - ſeligen Kirchenlehrern / alß mit Auguſtino, der lib. 16. de Ciuit. Dei cap. 9. ſolche darum̃ laͤugnet / weil er nicht begreiffen koͤnnẽ / woher ſie auß vnſerm theil der Welt in jenes moͤchten kommen ſeyn / vnnd derwegen ſorg gehabt / er muͤſſe einen Newen Adam vnd newe Eva tichten. Mit Lactantio Firmiano, der lib. 2. de Falſ. Sap. cap. 24. die außlacht / ſo die Erde Kugel rund haben woͤllen / vnd Antipodes gegen vns logiren / ſagend / daß / da ſolche Leut weren / ſie mit den Fuͤſſen an den Erdboden feſt gemacht ſeyn muͤſten / damit ſie nicht hin - ab fielen / darumb er ſie auch Pendulos nennet. Mit Iſidoro Hiſpalenſi in Etymol. der außtruͤcklich leugnet / daß ſolches muͤglich ſey / vnd demnach diß alles fuͤr ein Gedicht der Poetẽ haͤlt. Vnd daß wir noch etwas naͤher zu vnſern Zeitten ſchreitten / ſo hat Pabſt Zacharias vmbs Jahr Chriſti 745. den Biſchoff zu Saltzburg Vigilium der Kaͤtzerey beſchuldigt / weil er geſagt / die Erde were eine runde Kugel / vnd es gebe Antipodes daruff / Alſo dieſe meinung auß Paͤbſtlicher Authoritet gantz vnd gar verworffen.

Auch werden E. F. G. ein mitleiden tragen mit den Alten Geographis, welchen die Poeten nachgeſungen / vnd gemeinet haben / man koͤnne weit - ter / alß die Columnæ Herculis ſind / das iſt / El ſtretto de Gibraltar, nicht kommen / dann daſelbſt hab die Welt ein Ende / da doch vnſere Leute jhre Schiffar - ten in Oſt / vnd Weſten erſt daſelbſten anfangen / vnd biß dahin auß Grie - chenland ein Kinder Reyſe vnnd Spatzirgang iſt / wie dann auch mitlei - dens wehrt / daß die Griechen mit etlich hundert Schiffen außgefahren / vnnd die Statt Trojam nicht finden koͤnnen / die doch aller naͤchſt gegen vber lag / ſondern in Mœſiam kommen / vnd vom Koͤnig Telepho zu recht ge - wieſen worden / wie Strabo vnd Euſtathius melden.

Es werden E. F. G. hierin finden was die Eigenſchafft vnd Natur der Erden / der Lufft / der ſtehenden vnd flieſſendẽ Waſſer / der Berg vnd Thaͤ - ler / der Mineren vnd Metallen / der Brennenden Vulcanen vnd Schwe - felbergen / der ſiedenden vnd heilſamen Quellen / der vnderſchiedlichen / vñ vns gantz vnbekanten Thier / Voͤgel / Fiſch vnd Gewuͤrmes ſey / vnd dar - in die Weißheit vnd Krafft deß Allmaͤchtigen Schoͤpffers preyſen.

Es werden E. F. G. hierin finden ein warhafftigen Bericht / von der Grauſamkeit vnd vberauß Barbariſcher Greulichkeit deß meiſten theils der Leut in dieſer Newen Welt / welche gantz Mutternacket gehen / die Mẽ - ſchen / auch jre eigene Kinder dem Teuffel opffern / jhr Fleiſch gekocht / eins theils auch rohe freſſen / vnnd ſo grimmig / nur aus begird deß Menſchen Fleiſches einander verfolgen / daß einem die Haar zu berg ſtehen moͤchten / Jtem / wie ſie den Teuffel ſichtbarlich anbetẽ / von jm geſchlagen / betrogen / gar getoͤdtet werden / vñ die geringſte erkantnuß võ Gott vnd ſeinem wil - len nit haben / jhrer viel auch nichts davon hoͤren oder wiſſen wollen: vnd auß vergleichung der gnaden Gottes / ſo er vns in offenbarung ſeines hei - ligen Euangelii erzeigt / vns fuͤr ſeelige Leut billich preyſen.

Schließlich werden E. F. G. auch hierin finden eine immerwehrende vnd biß auf dieſes lauffend Jahr continuirte Hiſtoria von erſter Entde - ckung dieſer Newen Welt durch Columbum vnd Veſputium, vnd den folgen - den Schiffarten / ſo vor andern denckwuͤrdig / Jtem wie ſich die Spanier / Portugeſen / Frantzoſen / Engliſchen vnd Hollaͤnder / nicht zwar / wie man ſagt / vmb den Barchent / ſondern vmb das Mexicaniſche vnnd Peruani - ſche Gold vnnd Silber gejagt haben / welches gezaͤnck mit wandelbarem Gluͤck noch biß auff dieſen Tag wehret.

Dieſes nun alles / Gnaͤdiger Fuͤrſt vnd Herr / ſo theils mein Schweher - vatter Seeliger / Johan Theodor de Bry, theils ich ſelbſt von meiner Hand mit Schrifftmaͤſigen vnd verhoffentlich dem Leſer anmuthigen Kupfferſtuͤ - cken vnd nuͤtzlichen Landtafeln / gezieret / jetzo aber in dieſer Kuͤrtzern vnd Kaͤufflichen Form durch mich verlegt vnnd außgefertigt / an tag gegeben wird / will E. F. G. obangeregter maſſen / ich in vnderthaͤnigkeit verehret vnd hiemit offerirt haben / damit E. F. G. ſich in demſelben allen ſampt dero Fuͤrſtlichen Vielgeliebten Gemahlin / vnd andern lieben anverwan - ten nach genaͤdigem gefallen erſehen vnd beluͤſtigen / vnd alſo nebẽ andern mitteln / von ſchweren / der Regierung vnzertrennet anhangenden Ge - ſchefften / hieher vnderweilen jhren regreß zu ergetzligkeit nemen koͤnnen / mit dem fernern gehorſamen pitten vnd erpieten / daß E. F. G. mich fuͤr jhren Diener gnaͤdig annemen vnd halten / vnd darneben verſichert ſeyn wollen / daß ich ſolches nach meinem vermoͤgen / auff alle zutragende gele - genheiten in der that zu leiſten gefliſſen ſeyn vnd pleiben wolle. E. F. G. ſampt dero Hochgeliebten Gemahlin dem Schutz deß Allerhoͤchſten / mich aber denenſelben zu genaden in vnderthaͤnigkeit befehlende. Da - tum Franckfurt den 8. Septembris 1630.

E. F. G. Vnderthaͤniger Matthæus Merian, Buͤrger vnd Kupfferſtecher / auch Buchhaͤndler daſelbſt.

Vorrede vnd Kurtze Erinnerung an den Leſer.

DAmit dir / Guͤnſtiger / der Hiſtorien vnd Warheit liebhabender Leſer / Vnſere Meinung / Jntention vnd Procedur in dieſem volkommenen Weſt-Jndianiſchen Werck deſto beſſer bekant ſey / alß ſoltu mercken / daß wir daſſelbe in drey Theyl oder Buͤcher vnderſchieden haben.

Jm Erſten wird gehandelt von der Situation vnd Gelegenheit der Newen vnd vnſern Vaͤttern vnbekanten Welt (alſo zu nennen) wie groß dieſelbe / ſo viel deren entdecket / vnder welchen Himliſchẽ Zirckeln / Graden oder Linien / ſo wol von Oſt gegen Weſten / alß auch von Sud gegen Norden / ſie gelegen / wie die Elementa da - rin beſchaffen / waß es fuͤr Meteora, Gelaͤnde / Gewaͤſſer / Metall / lebendige / wachſen - de / vnnd todte Creaturen darinn gebe / ſonderlich die viel vnderſcheids von den vnſern haben / wie widerumb ein Land vnd Provintz dem andern gantz vngleich / Erſtlich zwar durchauß vnd ins gemein / darnach in abſonderlichen Koͤnigreichen vnd Landſchafften / dabey auch der groſſen differentz / anlangend die Art / Natur / Sitten / Policei / vñ gantz Weſen der Weſt-Jndianiſchen Voͤlcker / wie auch der Alten vnd Newen Wohnplaͤtz / Schiffreichen vnd ſtehendẽ Waſſer / Vorgebirg / Meerhafen vñ Anlendungẽ / weitlcuf - tig vnd zu guter nachrichtung gedacht wird / Auß Acoſta, Oviedo, Martyre, Herrera, Iohanne de Laet, vnd andern bewerten Weſt-Jndianiſchen Scribenten. Dann wir es eine Notturfft erachtet / daß zuvor das Subiectum, darin ſich alles folgendes zugetra - gen / beſchrieben vnnd vorgeſtellet wuͤrde / ehe die accidentia folgten / zu dem auch die Schiffarten nicht moͤgen mit luſt geleſen noch verſtanden werden / man wiſſe dann wo die Ort / da ſich eines vnd anders begeben / gelegen / vnd was deſſelben Lands oder Voͤl - cker Natur Art vnd Beſchaffenheit ſeye.

Jm andern Theyl werden 33 vnderſchiedliche Schiffarten beſchrieben / dadurch die - ſe deß gantzen Erdklotzes helfft / nach vnd nach erfunden / entdeckt / vnd von vnſern Eu - ropeiſchen Voͤlckern bewohnet wordẽ iſt / Der anfang wird genom̃en von den 4. Schif - fahrten Chriſtophori Columbi, dem dieſe Ehr vor allen andern von Gott gegonnet worden / daß er der Erſte erfinder dieſer halben vnd Newen Welt geweſt / vnd derwegen billicher nach jhm alß dem Florentiner Americo Veſputio genennet worden ſein ſolte / da ja ſolches einem Menſchen gebuͤrte. Jhm hat nachgefolget jetztgemelter Veſputius, vnd die Landſchafft Paria ſamt andern / jenſeit der Lini entdecket / auch daruͤber ſein Le - ben zugeſetzt. Die dritte Stelle goͤnnen wir billich (nicht zwar der Zeit / ſondern wuͤr - digkeit vnd verdienſts halber) Ferdinando Magellano auß Portugal / weil er im Jahr 1520. das Enge Meer zwiſchen Chile vnd del Fuoco erfunden / einen newen Weg ge - gen Orient entdeckt / vnd der erſte geweſt / deſſen Schiff Victoria vmb die gantze Welt geſegelt / wiewol er ſelbſt vor entlicher verrichtung dieſer Herrlichen Fahrt / von den Wilden erſchlagen worden iſt.

Anlangend die Schiffarten Bobadillæ, Nicolai de Ouando, Bartholomæi de Ca - ſis, Didaci Niques, Alphonſi Hoiedi, Valboæ, Ariæ vnd anderer / ſind dieſelben meh - rertheils nur in die vorhin erfundene Laͤnder vnd Jnſulen abgangen. Dabey dañ diß zu mercken / daß dieſe Gubernatores vnd Amptleut die armen Jndianer zwar vnder das elende Joch der Tyranniſchen dienſtbarkeit gebracht / vnd es alſo gemacht / daß jnen der Todt lieber vnd nuͤtzer alß das Leben geweſt / Aber ſie / die Regenten / haben die Raach Gottes vnder ſich ſelbſt widerumb erfahren muͤſſen / daß einer den andern hingerichtet / ja der Schweher dem Tochtermann den Kopff abſchlagen laſſen.

Gleiches Gluͤck haben auch gehabt / Alphonſus Ninnus, die Pizarrer / Almagrus / Nunezvela, vnd andere / ſo ſich auß Goltgeitz vnd begierd der Ehren einander gemet - zelt / ob ſchon Pizarrus das Koͤnigreich Peru, vnd Corteſius die Statt vnd Land Mexi - co erobert.

Den Spaniſchen folgen zwo Schiffarten / ſo zween Hochteutſche / Vlrich Schmid von Straubingen / vnd Hanß Staden von Homburg in Heſſen / in dieſe Landen ver - richtet / denen vier Frantzoſen / Iohannes Lerius, Renatus von Laudonniere, Iohan - nes Ribaldus vnd Gurgues ſuccediren. Auff welche vier Engellaͤnder folgen / Fran - ciſcus Drach / Walter Raleig / Reinhart Greinwille / vnd Thomas Candiſch / welche mechtige Reyſen gethan / vnd vnglaͤubliche gefahr außgeſtanden / der erſt vnd letzte auch vmb die gantze Welt geſchiffet haben.

Den Teutſchen / Frantzoſen vnd Engliſchen folgen vier Niderlaͤnder / Olivier von der Nord / Jacob Mahu / Peter von der Does / vnd Georg Spielbergen / vnder denen gleicher geſtalt / wie bey den Engliſchen / der Erſte vnd Letzte / die gantze Welt vm̃ſegelt.

Dabey bleibt es nicht in dieſem Andern Theil / ſondern es wird noch hinbey gefuͤgt ein ſehr denckwuͤrdige Reyſe Wilhelm Schuttens von Horn in Holland / welcher die Newe Durchfahrt hinder dem Magellaniſchen Freto, ſo viel bequemlicher iſt / mit groſ - ſem rhum erfunden / vñ durch dieſelbe vmb den gantzen Erdenkreiß geſchiffet hat / daher er wol der zweyte Magellanus genennet werden mag. Jtem wie die Hollaͤndiſche Ar - mada die Statt Sanct Salvator zuſamt dem Hafen Totos los Sanctos erobert vnd wi - der verloren / beneben einſprengung allerhand erzehlungen / vom zuſtand Virginiæ, deß Newen Engellands / vnd anderer Engliſchen Colonien.

Jm Dritten Theil dieſes Wercks wird der Guͤnſtige Leſer neben Beſchreibung etli - cher Weſt-Jndianiſchen Landtſchafften in dem Nordertheil Americæ, alß New Mexi - co, Cibola, Cinaloa, Quivira, vnd anderer / deren bißher weder in dieſem vnſerm / noch dem groſſen Americaniſchen Werck ſonderlich gedacht worden / wie auch vielen wun - derbaren Miraculis Dei & Naturæ in New Hiſpanien / Iucatan, Fonduras vnd Gua - timala, finden drey denckwuͤrdige Schiffarten der Hollaͤnder in Weſt-Jndien. Die Erſte / ſo der Admiral Jacob Leremit mit eylff Schiffen vorgenommen / vnd damit vmb die gantze Weltkugel geſegelt. Die ander / wie die Hollaͤndiſche Schiff vnder dem Gene - ral Peter Heyn vnnd Admiral Loncken die vberauß reiche Spaniſche Silberflotta zu Matanza in der Jnſul Cuba erobert vnd gluͤcklich naher Hauß gebracht. Die dritte / welcher geſtalt angeregter Hollaͤndiſche Admiral / Heinrich Cornelis Lonck ſambt dem Obriſten Dieterich von Wartenburg / die Hauptſtatt vnd Port Olinda de Fernam - bucco in Braſilien eingenommen / vnd alſo ſich derſelben ſamt den beyliegenden Caſtel - len vnd ſehr bequemen Hafens bemaͤchtigt.

Dieſes alles / was obangeregter maſſen in den drey Theylen alſo begriffen / haben wir mit zugehoͤrigen Landtafeln / ſo gut vnd correct alß immer moͤglich / wie auch mit vielen theils alten / theils gantz newen Geſchichtmaͤſigen Kupfferſtuͤcken gezieret / da - mit ſolche nicht allein dem Kunſtliebenden Leſer zur beluͤſtigung vnd recreation, ſondern dem Grund - vnd Warheit begierigen zur gewiſſen nachrichtung vnnd mehrerm ver - ſtand dienen moͤchten. Worauß zweiffels ohne der Guͤnſtige Leſer leichtlich wird zu erachten haben / daß wir jhme zum beſten / keinen Fleiß / Muͤhe oder Coſten geſparet / dem wir dabey wuͤnſchen / daß er ſich ſolches alles geſund gebrauchen moͤge. Franck - furt den 8. Septembris im Jahr 1630.

Johan Ludwig Gottfried / Mattheus Merian.

Von den Namen Jndia vnd America.

JNdia / wirdt eygentlich genandt die groſſe Landt - ſchafft Aſiæ gegen der Sonnen Auffgang gelegen / ſo etwann von Alexandro vnd den Macedonibus beſichtiget / vnd mit Krieg vber - zogen worden. Wir halten aber darfuͤr / es habe Columbus dieſen Namen Indiæ, welcher eygentlich den Morgenlaͤndiſchen zuſteht / der Newen Welt / als der ſie erſtmals erfunden / darumb gegeben / dieweil / da er die Newe Welt zuerſt gefunden / gemeinet hat / es ſey die Jnſel Cipangnon, welche gegen Sina vnd Cataio vber gelegen / mehr der Mor - genlaͤndiſchen / als Nidergaͤngiſchen Grentzen vnd Frontier zugeeignet: Vnd daſſelbi - ge nach der Meynung Ariſtotelis vnd Senecæ, welche geſchrieben haben / India ſey nicht weit von Hiſpania gelegen.

America aber die Newe Welt / hat von Americo Veſputio, welcher nach Chri -Abtheyluͤg Americæ. ſtophoro Columbo auß deß Koͤnigs in Caſtilien Befehl Anno 1495. dahin geſegelt / den Namen behalten / vnd kan in drey Theyl abgetheylet werden.

Der eine Theyl ſo gegen Mitternacht gelegen / wird New Franckreich genandt /Der erſte Theyl Ame ricæ. dieweil im Jahr 1524. Johannes Verrazanus ein Florentiner / von Koͤnig Franciſco I. vnd ſeiner Mutter / die dem Reich fuͤrſtunde / in die newe Welt geſand / das gantze Ge - ſtadt deß Meers gemercket hat / welches ſich vom Tropico Cancri vom 28. Gradu biß auff den 50. vnd weiter gegen Mitternacht / erſtreckt / vnd hat daſelbſt deß Koͤnigs Wa - pen auffgericht / Alſo / daß die Spanier ſelbſt / die hernach dahin kommen ſeynd / dieſen Theyl Americæ, Franckreich genandt haben. Jhre Breyte iſt vom 25. Grad / biß auffNew Franck - reich. den 54. gegen Mitternacht / die Laͤnge von dem 280. biß auff den 330. grad. Der Theyl gegen Auffgang / wirdt von den newen Scribenten Norumbega genandt / vnd erſtreckt ſich biß in den Meerhafen Gamas, damit ſie von Canada (dahin Robertvallus vnnd Jacobus Carterius im Jahr 1535. kommen ſeynd) vnderſchieden iſt. Vmb dieſe ligen viel andere Jnſeln mehr / vnd vnter denſelbigen das Landt Labrador, das ſich biß gen Gronelandiam erſtreckt. Gegen Nidergang begreifft es viel Landſchafften / ſo nun - mehr etlicher maſen bekandt ſeynd / als Quivira, Cibola, Aſtatlan vnd Terlichichi - meni, das aber gegen Mittag ligt / wirdt Florida genandt / dieweil am Palmtag / den die Frantzoſen Floridum Paſcha nennen / man derſelbigen wahrgenommen. Der Theyl gegen Mitternacht iſt noch gar vnbekandt.

Dieſes new Franckreich iſt faſt ſo groß als vnſer Europa, vnd darinnen die Land - ſchafft Florida am beſten erbawet / als welchen viel Frantzoſen in mancherley Schif - farten angetroffen / vnd alſo die herrlichſte iſt. Sein Vorgebuͤrg erſtreckt ſich 100. Frantzoͤſiſche Meyl lang in das Meer / vnd zeucht ſich hinab gegen Mittag / dargegen vber ligt die Jnſul Cuba 25. Frantzoͤſiſche Meylen weit / welche ſonſten Iſabella genand wirdt. Gegen Auffgang Bahama vnd Lucaia. Gegen Nidergang hat es den Ha - fen deß Mexicaniſchen Meers.

Der ander Theyl Americæ wirdt new Spanien geheiſſen / hat ſeinen Anfang von Tropico Cancri vom 25. grad biß an den 9. darinnen Themiſtitan gelegen / vnnd begreifft viel Landtſchafften in ſich / ſampt andern anſtoſſenden Jnſeln / die ſie Antillas nennen / vnter welchen die fuͤrnembſten vnnd beruͤmbteſten Hiſpaniola vnnd Iſabella, auch viel vnzahlbare andere mehr ſeynd. Dieſes gantzen Theyls Laͤnge / darinnen auch obgemeldte Jnſel / vnd der Meerhafen Mexicon begriffen / iſt 70. grad hoch / nemblich von 245. biß auff den 315. vnd derhalben lang / aber ſchmal wie Italia.

Der dritte Theyl Americæ heiſſet Peru. Jſt ſehr groß. Seine Hoͤhe faͤhet ſich an vom 10. grad / diſſeyt deß Æquatoris, vnd langet biß an den 52. grad vber den Æqua - torem, nemblich / biß an das Magellaniſche Meer. Jſt in der Form einem Ey gleich / allenthalben bekandt. Nach der Laͤnge helt ſie 60. grad / von dannen ſie dann gegen beyde Ende ſchmaͤler wirdt. An einem Theyl / nemblich vnter dem Capricorno hat ge - wohnet Villagagno, der es das Mittagige Franckreich genandt / weil es ſich nach Mit - tag erſtreckt / wie Europa gegen Mitternacht / iſt aber nachmals von den Portugale - ſern eingenommen worden.

Das vnbekante Land / ſo ſich gegen dem Polo Antarctico erſtrecket / vnnd TerraTerra Au - ſtralis. Auſtralis genant wird / ſetzen etliche fuͤr den Vierdten Theil Americæ, andere (wel - ches auch mehr ſcheinbare vrſachen hat) fuͤr den Vierdten Theil der gantzen Erdkugel. Was hieran entdecket / iſt im Zweiten Theil dieſes Buchs an ſeinem Ort angezeigt worden.